Malumbo 18 - Sumu Yedi ya Isa Masiya 1906 Kitamo 1897 Malumbo 1905

¹ Ninekukunda We: Ee Mzuri, zinya yangu.

² Mzuri ni ibwe langu, na boma yangu, na mkija wangu; Izuwa wangu, ibwe langu lidindie, ninemwitikija: ngao yangu na luhembe lwa lukio lwangu, mnara wangu ukweie.

³ Ninemwitangia Mzuri, Eye einarwe kuisiswa: huwo ninekijwa ghati ya maring’a mangu.

⁴ Nzighi ja kifwa jinijunguluke: viroro vya Belial vikaniitusha.

⁵ Nzighi ja Sheol jikanijunguluka: mitegho ya kifwa ikanizia.

⁶ Ghati ya wasi wangu nikamwitangia Mzuri, nikamwiyia Izuwa wangu: akalisikia kufuma hekalu lakwe ighonda langu, kiiyo kyangu msongorana wakwe kikamafikia masikio makwe.

⁷ Niho masanga makakushwa, makadedema: migi pia ya nduwi ikadedemishwa ikakushwa, amu eokie na oro.

⁸ Moshi ukakwea kufuma na fua yakwe: moto wa itumbu lakwe ukala, makaa makaaka henao.

⁹ Akainamija wanga pia, akasea: kija kibaha kikaoka si ya maghu makwe.

¹⁰ Akatonga ekikwea wanga ya Kerubi, akaburuka: ee, akaburuka wanguwangu wanga ya mazawu ma ngungu.

¹¹ Akaosha kija handu hakwe ha kukuwisa, hema yakwe ya kumjunguluka: kija kya mbombe, majumbi mawurutu ma wanga.

¹² Hena kuangaja kwa msongorana wakwe majumbi mawurutu makavetia: mabwe ma mvua, na makaa na moto.

¹³ Mzuri akaruruma pia wanga, Eye wanga ya vyose akang’ola ighonda: mabwe ma mvua na makaa ma moto.

¹⁴ Akagera mivwi yakwe, akawabarasakanya: ee, kumereteka kwingi, akawaghusha.

¹⁵ Niho maluchoro ma mbombe makawonwa, migi ya masanga ikafunukurwa: hena kudewera kwako, Ee Mzuri, hena kuhema kwa luhemo lwa fua yako.

¹⁶ Akaingija kufuma wanga, akaniuha: akaning’ola ghati ya mbombe nyingi.

¹⁷ Akanikija ghati ya mring’a wangu edindie: na ghati ya wala wenisuie, amu weokie waaria kukela mi.

¹⁸ Wakanizia musi wa wasi wangu: kake Mzuri akaoka ludindijo lwangu.

¹⁹ Akanifisha pia na handu haarame: akanikija, amu eisejwa nami.

²⁰ Mzuri akaniketia hena ngalo yangu: hena kuzerra kwa mikono yangu akaniuhia.

²¹ Amu nagura nzia jakwe Mzuri: nete siwotoka mi nimshighe Izuwa wangu hena owiwi.

²² Amumawuchili makwe mose meokie msongorana wangu: na sikuwushijia mi maitanawo makwe.

²³ Nikairowili msongorana wakwe: nikakuswija ghati ya owiwi wangu.

²⁴ Amu ya iyo Mzuri eniketia hena ngalo yangu: hena kuzerra kwa mikono yangu mesoni hakwe.

²⁵ Hamwe na mwenye lusario unekuwondja mwenye lusario: hamwe na mundu eirowili unekuwondja uirowil.

²⁶ Hamwe nawo wezerre unekuwondja uzerre: hamwe na wagolong’i unekuwondja ugolong’a.

²⁷ Amu unewakija wandu wenye wasi: kake unemaseja meso ma mafuti.

²⁸ Amu uneasha taa yangu: Mzuri Izuwa wangu eneniangajia kija.

²⁹ Amu hena we ninedindikia lweriri: na hena Izuwa wangu natoroka wanga ya lusarigho.

³⁰ Na Izuwa, nzia yakwe iirowili: kiteto kya Mzurikyagheshwa; Eye ngao hena wose wemwitikija.

³¹ Amu niani Izuwa, nde Mzuri: na niani ibwe, nde Izuwa wetu?

³² Izuwa Eye enigera zinya kikudini: Eye eiosha nzia yangu iirowili.

³³ Emaosha maghu mangu sa maghu ma sarigha: na eniwika wanga ya handu hekweie.

³⁴ Eilosha mikono yangu hena kubighana: mtano mikono yangu inehinda wuta wa usango.

³⁵ Ukaniinga pia ngao ya lukio lwako: na mkono wako wa kuume unitiricha, na uhoji wako uniwushija.

³⁶ Umanetija mawato mangu si yangu: na maghu mangu temetandarikamo.

³⁷ Ninemaratera maring’a mangu, ninemafikia: nete sikahundukewa mtano weneikaweidiwe kunyamarwa.

³⁸ Ninewasoma wasiidime kuwukika: wenegwa si ya maghu mangu.

³⁹ Amu unichungia zinya kikudini hena ngondo: uwainamija si yangu wala wewukie wanga yangu.

⁴⁰ Ukawaosha maring’a mangu wagharuka nyuma msongorana wangu: nesa niwatesha wala wenisua.

⁴¹ Wakaiya, kake tehenaho wa kukija: wakamwiyia Mzuri, asiwatalwe.

⁴² Niho nikawabighabigha sa purughushe msongorana wa ngungu: nikawatagha sa matondo ma nzieni.

⁴³ Unikija ghati ya malelano ma wandu; uniosha mbaha wa mbare: wandu nisiwatisiwa wenenitumikia.

⁴⁴ Chwi wekisikia mburi yangu weneniinga isikio: wagheni wenekugera si yangu.

⁴⁵ Wagheni wenesoweka: wenefuma na handu hawo ha mbiso wekidedema.

⁴⁶ Mzuri eoho; na ibwe langu litasiwe: na Izuwa wa lukio lwangu akwejwe.

⁴⁷ Eye Izuwa eihija lawi hena mi: na ewika mbare si yangu.

⁴⁸ Enikija ghati ya maring’a mangu: ee, uniwushija wanga ya wala wewuka wanga yangu uning’ola mkononi ha mwenye kuketa na zinya.

⁴⁹ Amu ya iyo ninekung’olia haika, Ee Mzuri, ghati ya mbare: na ninelivinia malusiso izina lako.

⁵⁰ Emng’olia mfumwa wakwe malukio mabaha: embondjia egeriwe‐mafuta wakwe lukundo, Daudi na waana wakwe, ndarasi.