Malumbo 17 - Sumu Yedi ya Isa Masiya 1906 Kitamo 1897 Malumbo 1905

¹ Sikia ngalo, Ee Mzuri, ukikumbuke kiiyo kyangu: usikije luombo lwangu, lusifume na miomo ya ukeleki.

² Wuchili wangu ufume msongorana wako: meso mako maiyoe singisi.

³ Unigheshe ngoro yangu; uniyoie magheri ma kio: unigheshe, usiwone kindu; nagura nzia itumbu langu lisitekwe.

⁴ Mihiro ya wandu, hena kiteto kya miomo yako: nakurinda nisiingie na nzia yawo wenyamara.

⁵ Mawato mangu magurana nezo na nzia jako: maghu mangu temetandarikamo.

⁶ Nakuitangia, amu unenitalwa, Ee Izuwa: uniinamijie isikio lako, usikie kuteta kwangu.

⁷ Uwondje lukundo lwako lwa kuing’asija, We uwakija wala wekuitikija: ghati ya wala wewawukia, hena mkono wako wa kuume.

⁸ Unirinde sa kimee kya ijiso: uniwise si ya kiwuri kya mazawu mako.

⁹ Ghati yawo wawiwi weniinyala: maring’a ma moo wangu, wenijunguluka mbai jose.

¹⁰ Wechungwa na kubanda kwawo: weteta vindu vya mafuti na itumbu lawo.

¹¹ Wetujunguluka ingeriaha ghati ya mawato metu: wegera meso mawo watughushe si.

¹² Efwanana na simba ikundie muno mayemo makwe: na sa mwana simba iyayia handu ha mbiso.

¹³ Uwuke, Ee Mzuri, umrongorie, umghushe si: uikije ngoma yangu ghati ya wawiwi hena muhandi wako.

¹⁴ Ghati ya wandu, hena mkono wako, Ee Mzuri; ghati ya wandu wa masanga, ngata yawo ni ya kukia uku, na ndeni yawo uiizuja na vindu vyako: weighuta na waana, na weshigha mashighajiko ma mali mawo hena waana wawo.

¹⁵ Na mi, nineuyoa wusho wako ghati ya ngalo: nineighuta, nineikaniwuke, na mfwanano wako.