Malumbo 148 - Sumu Yedi ya Isa Masiya 1906 Kitamo 1897 Malumbo 1905

¹ Mwisiseni Mzuri. Mwisiseni Mzuri kufuma wanga: mwisiseni ghati ya handu ha wanga.

² Mwisiseni, malaika wakwe wose: mwisiseni, lweriri lwake lwose.

³ Mwisiseni, nzano na mweji: mwisiseni unywi ndondo ja kyangaji jose.

⁴ Mwisiseni, unywi wanga ja wanga: mwisiseni, unywi mbombe jioho wanga ya majumbi.

⁵ Waliisise izina lakwe Mzuri: amu eaghanyie, wakalungwa.

⁶ Akawaimusha pia ndarasi na ndarasi: akaareha itanawo lisivetia hae.

⁷ Mwisiseni Mzuri masangeni: unywi wabaha wa bahari, na heforeke hose.

⁸ Moto na mvua ya mabwe, theluji na majumbi: ngungu ya zinya, iketie kiteto kyakwe.

⁹ Nduwi na vituwi vyose: miti yagera ndunda na mierezi yose.

¹⁰ Nyama na ng’ombe jose: vindu viarufa na ndeghe jiburuka.

¹¹ Wafumwa wa masanga na mbare jose: waana wa wafumwa na wachili wose wa masangeni.

¹² Na wabwange na wabora: waghosi na waana wadongo.

¹³ Waliisise izina lakwe Mzuri, amu izina lakwe lakwejwa lijenye: kirumi kyakwe kioho wanga ya masanga na majumbi.

¹⁴ Na ekweja luhembe lwa wandu wakwe, luisiso lwa washenete wakwe wose: niwo waana wa Israeli, wandu afuhi naye: mwisiseni Mzuri.