Malumbo 147 - Sumu Yedi ya Isa Masiya 1906 Kitamo 1897 Malumbo 1905

¹ Mwisiseni Mzuri, amu ni kyedi kumbinia Izuwa wetu maluisiso: amu kyaiseja: na luisiso ni lwedi.

² Mzuri ejengawa Yerusalemi: ewawunganya hamwe wala wetaghwa ghati ya Israeli.

³ Ewahodja wala webaike ngoro: ejichunga arata jawo.

⁴ Ekutisiwa kutara kwa ndondo: ejiinga jose mazina majo.

⁵ Mzuri wetu ni mbaha, na mwenye zinya nyingi: kutwarija kwakwe kusina mng’ana.

⁶ Mzuri ewaimusha wahoo: ewaseja wawiwi mtano na si.

⁷ Mbinieni Mzuri hamwe na kuanjela: mbinieni Izuwa wetu maluisiso hena kinubi.

⁸ Eye efinikira wanga na majumbi, na eareha mvua hena masanga: emeja mani nduwini.

⁹ Eing’olia nyama kidjo kyakwe: na waana wa malukuru wekiiya.

¹⁰ Teisejwaye na zinya ya frasi: teizihirwaye na maghu ma mundu.

¹¹ Mzuri eizihirwa ghati yawo wemwondoka: ghati ya wala weing’idaki hena luasrio lwakwe.

¹² Mwisise Mzuri, ee Yerusalemi: mwisise Izuwa wako, ee Sayuni.

¹³ Amu emadindija machungo ma mbenge jako: ewatasia waana wako ndeni hako.

¹⁴ Eareha luworo ghati ya mihaka yako: ekuizuja na ngano yedi muno.

¹⁵ Eliingija aghanyo lakwe masangeni: kiteto kyakwe kyadindika wangu muno.

¹⁶ Eng’ola theluji sa pamba: emiza jalidi sa maivu.

¹⁷ Etagha barafu yakwe sa malumong’o: niani eidima kuimuka msongorana wa mbeho yakwe.

¹⁸ Eingija kiteto kyakwe, ejichangarusha: eiosha ngungu yakwe kururuma na mbombe jatonga.

¹⁹ Embondja Yakobo kiteto kyakwe: na Israeli maitanawo makwe na mawuchili makwe.

²⁰ Teketa huwo na mbare ingiwa: na mawuchili makwe, tewematisiwa. Mwisiseni Mzuri.