Malumbo 145 - Sumu Yedi ya Isa Masiya 1906 Kitamo 1897 Malumbo 1905

¹ Ninekurumisha, Izuwa wangu, ee mfumwa: ninelitasia izina lako ndarasi na ndarasi.

² Misi yose ninekutasia: na nineliisisa izina lako ndarasi na ndarasi.

³ Mzuri ni mbaha, na wa kuisiswa muno: na ubaha wakwe usiidima kutisiwika.

⁴ Irika limwe lineliisisa izina lako mtana lingi: na lineitoranya mihiro mibaha yako.

⁵ Ninekusara ghati ya ubaha urumishwe wa nganyi yako: na ghati ya marighio mako.

⁶ Na wandu wenelia mburi ya mihiro yako yenye kuitusha: na nineutoranya ubaha wako.

⁷ Weneteta lukumbusho lwa uwedi wako wingi: na weneivina mburi ya ngalo yako.

⁸ Mzuri ni mwenye mvono, eizua lusario: mwanguhe hena kureghija, na wa lusario lwingi.

⁹ Mzuri ni wedi hena wose: na masario makwe menyoie wanga ya ndima jakwe jose.

¹⁰ Ndima jako jose jinekung’olia haika, ee Mzuri: na washenete wako wenekutasia.

¹¹ Wenelia mburi ya kirumi kya ufumwa wako: na weneitetia zinya yako.

¹² Wawatisiwije waana wa wandu mihiro mibaha yakwe: na kirumi kya ubaha wa ufumwa wakwe.

¹³ Ufumwa wako ni ufumwa wa ndarasi: na kuitoria kwako kwaikaa ghati ya marika mose.

¹⁴ Mzuri ewaimusha wose wala wegwa: ewawushija wose wala weinama.

¹⁵ Meso ma wose mekuinda we: uwang’olia kidjo kyawo hena magheri.

¹⁶ Wajughua mkono wako: waighusha vyose vina moo.

¹⁷ Mzuri ni mwenye ngalo ghati ya nzia jakwe jose: na mwenye mvono ghati ya ndima jakwe jose.

¹⁸ Mzuri ni afuhi na wose wemwitangia: wose wemwitangia kididi.

¹⁹ Enefisha kukunda kwa wala wemwondoka: na enekisikia kiiyo kyawo, na enewakija.

²⁰ Mzuri ewarinda wose wemkundie: kake enewanyamara wawiwi wose.

²¹ Itumbu langu lineteta luisiso lwakwe Mzuri: na muri ose ulitasie izina lakwe lishenete ndarasi na ndarasi.