Malumbo 144 - Sumu Yedi ya Isa Masiya 1906 Kitamo 1897 Malumbo 1905

¹ Atasiwe Mzuri ibwe langu: eye eilosha mikono yangu kuingia na ngondo, na vichaa vyangu kubighana.

² Lukundo lwangu, na boma yangu, mnara mweza wangu na mukija wangu: ngao yangu, na ula namwing’idaki, ewawika wandu wangu si yangu.

³ Mzuri, mundu niani umtisiwe: kana mwana wa mundu, umyoe.

⁴ Mundu efwanana na kihaya: misi yakwe sa mvuri uvetia.

⁵ Umainamije majumbi mako, ee Mzuri, usee: ujikuware nduwi, na jinefuma moshi.

⁶ Uwirite kimereteko uwamije: ugere mivwi yako, uwarishe wukiwa.

⁷ Uronge mkono wako kufuma wanga: unikije, uning’ole ghati ya mbombe nyingi, ghati ya mkono wa wagheni.

⁸ Itumbu lawo lateta kihaya: na mkono wawo wa kuume ni mkono wa kuume wa maongo.

⁹ Ninekuvinia kivino kisha, ee Izuwa: hena kinubi kya nzighi ikumi ninekuvinia maluisiso.

¹⁰ Niye eng’ola lukio hena wafumwa: emkija Daudi mzoro wakwe ghati ya ndenga ya muhandi.

¹¹ Unikije, uning’ole mkononi ha wagheni: itumbu lawo lateta kihaya, na mkono wawo wa kuume mkono wa kuume wa maongo.

¹² Na waana wetu wa kiume weneoka sa mimeo ghati ya wubwange wawo: na waana wetu wa kiche sa mabwe ma ngandeni mesongowe hena fwana la nyumba ya kifumwa.

¹³ Na vilalo vyetu vineizua, vikioka na vindu vya mbare jose: na maghonji metu memogha elfu na elfu ikumi ngondeni hetu.

¹⁴ Ng’ombe jetu jikioka na miagho mibaha: isioke nete kubaa, nete kufuma: nete kiiyo kisioke nzieni hetu.

¹⁵ Wetasiwa wandu, weikee huwo: ee, wetasiwa wandu wenye Izuwa hena Mzuri wawo.