Malumbo 139 - Sumu Yedi ya Isa Masiya 1906 Kitamo 1897 Malumbo 1905

¹ Ee Mzuri, waniendaenda: na niwe wanitisiwa.

² Watisiwa kuikaa kwangu na kuwuka kwangu: watwarija kukusara kwangu hae.

³ Waiendaenda nzia yangu na kushinjia kwangu: wamatisiwa mavetio mangu mose.

⁴ Amu tehenaho kiteto lumini hangu: kake yoa, ee Mzuri, wakitisiwa deng’e.

⁵ Waniarehia mbai jose: wauwika mkono wako wanga yangu.

⁶ Kutisiwa uku kwaing’asija mtano kunilela: ni kwa wanga muno, siidimami kukufikia.

⁷ Nihi nitonge kufuma ngoma yako: kana nihi nidindike wushoni hako?

⁸ Nikikwea na wanga, hala uoho: nikiareha wui wangu ghati ya Sheol, yoa, hala uoho.

⁹ Nikiuha mazaghu ma heyawo: na nikitua na miidiwiko ya bahari;

¹⁰ Mtano na hala mkono wako unenirongoria: na mkono wako wa kuume unenigura.

¹¹ Nikighamba, Kididi kija kinenifinikira: na kiangaji kinijunguluka kineoka kio.

¹² Mtano na kija tekikuwisia, kake kio kyawaa sa hemusi: kija na kiangaji vyose viri vyaringanana hako.

¹³ Amu niwe uarehie vikudi vyangu: ukanifinikira ndeni hakwe iya.

¹⁴ Ninekuanjela; amu naarehwa hena nzia ya kuitusha na kuing’asija: ndima jako jaing’asija; na ngoro yangu yakitisiwa nezo.

¹⁵ Muri wangu touwiswa hako, nikinaarehwe na mbiso: na nikinawumbwe hena mbai ja si ja masanga.

¹⁶ Meso mako makaniwona magheri nisimearehwa, na ghati ya chuo chako marungo mangu mose makatamwa: mewumbwe musi hena musi, magheri temeokie nete limwe.

¹⁷ Nize makusaro mako mekundike hangu, ee Izuwa: nize kutara kwawo ni kubaha!

¹⁸ Nikimatara, nimo meingi kukela mzangazi: nikiwuka, nioho na we.

¹⁹ Kididi unewakoma wawiwi, ee Izuwa: hena iyo fumeni hangu, unywi wandu wa sakame.

²⁰ Amu weteta viwiwi wanga yako: na maring’a mako weliranga izina lako wesho.

²¹ Siwasua wala, ee Mzuri, wekusua we: sireghijami na wala wewuka wanga yako?

²² Nawasua na lusuwo luirowili: nawatara kuoka maring’a mangu.

²³ Uende hangu, ee Izuwa, na uitisiwe ngoro yangu: unigheshe, na umatisiwe makusaro mangu.

²⁴ Na uyoe kwakicha hena nzia ya owiwi hangu: na unitike na nzia ya ndarasi.