Malumbo 118 - Sumu Yedi ya Isa Masiya 1906 Kitamo 1897 Malumbo 1905

¹ Mwanjeleni Mzuri, amu ni wedi: amu lusario lwakwe lwaikaa ndarasi.

² Israeli aghambe ingeriaha: ti lusario lwakwe lwaikaa ndarasi.

³ Nyumba yakwe Harun ighambe ingeriaha: ti lusario lwakwe lwaikaa ndarasi.

⁴ Wala wemwondoka Mzuri waghambe ingeriaha: ti lusario lwakwe lwaikaa ndarasi.

⁵ Ghati ya wasi wangu nimwitangie Mzuri: Mzuri akanitalwa akaniwika na mwanya mbaha.

⁶ Mzuri ni wa hangu, siitukami: nikini mundu eidima kuniarehia.

⁷ Mzuri ni wa hangu ghati ya wala wenighenja: hena iyo ninewona sandu nikundie wanga ya wala wenisua.

⁸ Keba kumwitikija Mzuri: kukela kuitikija mundu.

⁹ Keba kumwitikija Mzuri: kukela kuitikija wafumwa.

¹⁰ Mbare jose wenijunguluka: kake hena izina la Mzuri ninewanyamara.

¹¹ Wenijunguluka, ee, wenijunguluka: kake hena izina la Mzuri ninewanyamara.

¹² Wenijunguluka sa nyoki; wejimika sa moto wa mivwa: hena izina la Mzuri ninewanyamara.

¹³ Unishukumie niwone kugwa: kake Mzuri enighenje.

¹⁴ Mzuri ni zinya yangu na kivino kyangu: eidiwa kuoka lukio lwangu.

¹⁵ Ighonda la luizihiro na lukio lioho ghati ya hema jawo wenye ngalo: mkono wa kuume wakwe Mzuri waketa viaria.

¹⁶ Mkono wa kuume wakwe Mzuri wakwejwa: Mkono wa kuume wakwe Izuwa waketa viaria.

¹⁷ Sifwami, nde ninekia: na ninejitoranya ndima jakwe Mzuri.

¹⁸ Mzuri enibigha muno: kake tening’olaye hena kifwa.

¹⁹ Unijughuiye mbenge ja ngalo: ninejiingia, ninemwanjela Mzuri.

²⁰ Ii niyo mbenge yakwe Mzuri: wenye ngalo weneiingia.

²¹ Ninekuanjela, amu wanitalwa: na waidiwa kuoka lukio lwangu.

²² Ibwe lila wajengi welisuie: laidiwa kuoka mtwi wa ngandeni.

²³ Kuketa uku ni kwa Mzuri: na ni kwa kurighiwa mesoni hetu.

²⁴ Musi uu ni ula euarehie Mzuri: tuneizihirwa a tuneisejwa hena musi uu.

²⁵ Ukije ingeriaha, twakusemba, ee Mzuri: ee Mzuri, twakusemba, uingije ingeriaha nguwari.

²⁶ Atasiwe ula eza hena izina lakwe Mzuri: twamutasia kufuma nyumba yakwe Mzuri.

²⁷ Mzuri niye Izuwa, naye etuinga kyangaji: lichungeni itasi na nzighi, mtano na mbembe ja kisiko.

²⁸ Niwe Izuwa wangu, ninekung’olia haika: niwe Izuwa wangu, ninekurumisha.

²⁹ Mwanjeleni Mzuri, amu ni wedi: amu lusario lwakwe lwaikaa ndarasi.