Malumbo 109 - Sumu Yedi ya Isa Masiya 1906 Kitamo 1897 Malumbo 1905

¹ Usihuje, ee Izuwa wa luisiso lwangu: amu itumbu la wawiwi, itumbu la wakeleki lanijughukia.

² Wenitetia na lumi lwa maongo: wenijunguluka na viteto vya lusuwo, webighana nami wesina lukake.

³ Hena lukundo lwangu niwo wazo wangu: kake nakung’ola hena kuomba.

⁴ Nawo weniwikia viwiwi hena vyedi: na lusuwo hena lukundo lwangu.

⁵ Uwike mundu mbiwi wanga yakwe: na mzo aimuke hena mkono wakwe wa kuume.

⁶ Ekichiliwa, afume mwenye kutekwa: na luombo lwakwe lugharushwe kuoka ng’oki.

⁷ Misi yakwe iduhuke: na ungi agure ndima yakwe.

⁸ Waana wakwe waoke wesina wawee: na mche wakwe aoke ngawiani.

⁹ Waana wakwe waoke wenye kuzarazara, na kuomba: waende kidjo kyawo kufuma handu ha nzaa.

¹⁰ Mwenye kuinyala avigure vyose evihete: na wagheni waitahe ndima yakwe.

¹¹ Asioke nete mundu mwe wa kumbondjia lusario: nete asioke wa kuwasaria waana wakwe wesina wawee.

¹² Kuwonwa kwakwe kuchike: ghati ya irika liza izina lawo lihaijwe deng’e.

¹³ Owiwi wa wawawee wakwe ukumbukwe hakwe Mzuri: nete kutekwa kwa mee kusihaijwe.

¹⁴ Matekwa ama maoke msongorana wa Mzuri misi yose: nesa achwe lukumbusho lwawo kufuma masangeni.

¹⁵ Amu tekumbukaye kuwondja lusario: kake emkinya mkiwa na mwenye kuwaiya, na webaike ngoro, awakome.

¹⁶ Ee, ekundie kusesa, kukamzia: na teisejwaye na kutasia, na kuneoka hae kufuma hakwe.

¹⁷ Akakudoka na kusesa sa na suke yakwe: kukaingia ndeni hakwe sa mbombe, na mawindini hakwe sa mafuta.

¹⁸ Kuoke hakwe sa nguo ila eidoka: na sa ngana ekuchungia kikudini misi yose.

¹⁹ Iki nikyo kiingijo kya wazo wangu kufuma Mzuri: na kya wala weitetia ngoro yangu viwiwi.

²⁰ Kake uniketie, ee Izuwa Mzuri, hena lwa izina lako: amu lusario lwako ni lwedi, unikije.

²¹ Amu ni mkiwa na mwenye kuwaiya: na ngoro yangu yawinywa ndeni hangu.

²² Nateka sa kivuri kikirongeshwa: nawiritwa uko na uko sa nzighe.

²³ Makunguro mangu maoka manana hena kuchunga: na muri wangu waduhuka ghati ya kubanda.

²⁴ Niokiewa nguruna hawo: wekiniwona, wekushakusha mtwi.

²⁵ Unighenje, ee Mzuri Izuwa wangu: unikije hena lusario lwako.

²⁶ Nesa watisiwe ti uu ni mkono wako: ti we, Mzuri, ukiketie.

²⁷ Wala wasese, kake we utasie: wekiwuka, wenegurwa ni soni, kake mzoro wako eneizihirwa.

²⁸ Wazo wangu wadoke nguruna: wakufinikire na soni yawo wenye sa nguo.

²⁹ Ninemwanjela Mzuri muno na itumbu langu: ee, ninemwisisa ghati ya matorano.

³⁰ Amu eneimuka hena mkono wa kuume wa mwenye kuwaiya: nesa amkije mikononi ha wala weichilia ngoro yakwe.