Malumbo 106 - Sumu Yedi ya Isa Masiya 1906 Kitamo 1897 Malumbo 1905

¹ Mwisiseni Mzuri; mng’olieni Mzuri haika, amu ni wedi: amu lusario lwakwe lwaikaa ndarasi.

² Niani eidima kuteta mihiro mibaha yakwe Mzuri: kana kutoranya luisiso lwakwe lwose.

³ Wetasiwa wala wegura wuchili: na ula eketa ngalo magheri mose.

⁴ Unikumbuke, ee Mzuri, na mvono uwaketie wandu wako: unizie na lukio lwako.

⁵ Nesa niwone nguwari ya wasawurwa wako: nesa niisejwe na luizihiro lwa mbare yako; nesa ning’ole haika hamwe na uhoja wako.

⁶ Twaketa ng’oki hamwe na waapa wetu: twaareha visiwe, twaketa viwiwi.

⁷ Waapa wetu tewetwarijawo marighio mako ghati ya Misri, tewekumbukawo wiingi wa masario mako: kake weokie wegolong’e ha bahari, ha bahari ya Sham.

⁸ Kake ewakijie hena lwa izina lakwe: nesa aioshe zinya mbaha yakwe kutisiwika.

⁹ Akaibohia bahari ya Sham, ikaoma: huwo akawatika ghati ya heforeke, sa ghati ya shighati.

¹⁰ Akawakija mkononi ha ula ewasuie: akawakombola mkononi ha mring’a.

¹¹ Mbombe jikawafinikira wazo wawo: teokie mwe wawo eshighajike.

¹² Niho wekaviitikija viteto vyakwe: wakavina luisiso lwakwe.

¹³ Chwii wekaiwaa ndima yakwe: wasiinde mburi yakwe.

¹⁴ Kake wakalangwa muno shighati: wakamghesha Izuwa hala hesina wandu.

¹⁵ Akawainga kila wekikundie: akaingija pia kunyonga ngoroni hawo.

¹⁶ Wakamneng’a Musa pia matuoni: na Harun mshenete wakwe Mzuri.

¹⁷ Isanga likajughuka likammija Dathan: likaifinikira siri yakwe Abiram.

¹⁸ Moto ukaaka ghati ya siri yawo: luwerwere lukawashota wawiwi.

¹⁹ Wakaareha ndama ghati ya Horebi: wakaomba sanamu ichangarushwe.

²⁰ Huwo wakakoranya kirumi kyawo: hena mfwanano wa ng’ombe ila mani.

²¹ Wakamwiwaa Izuwa mukija wawo: eketie vindu vibaha ghati ya Misri.

²² Ndima ja kuing’asija ghati ya isanga la Ham: na vindu vya kuitusha mbai ya bahari ya Sham.

²³ Hena iyo akaghamba enewanyamara, isioke Musa msaghurwa wakwe eimuke msongorana wakwe mwanyeni: agharushe hae oro yakwe, asiwanyamare.

²⁴ Ee, wakalidaa isanga ledi lila: wasikiitikije kiteto kyakwe.

²⁵ Kake wakanunuwika hemeni hawo: wasilisikije ighonda lakwe Mzuri.

²⁶ Hena iyo akawawushijia mkono wakwe: nesa awagushe shighati.

²⁷ Na nesa aigushe mbeu yawo ghati ya mbare: na awabarasakanye ghati ya masanga.

²⁸ Wakakuguranya pia na Baal‐peori: wakamala matasi mawo wefwie.

²⁹ Wakamreghija na mihiro yawo: ndwari ikawafumiria.

³⁰ Niho Finehasi akaimuka, akaketa wuchili: huwo ndwari ikasuijwa.

³¹ Iki ikatarwa hakwe hena ngalo: hena marika mose ndarasi.

³² Wakamreghija pia ha mbombe ja Meriba: mtano ikaoka kiwiwi hena Musa hena lwawo.

³³ Amu weigolong’ia ngoma yakwe: mtano akateta visiwe na miomo yakwe.

³⁴ Tewejinyamarawo mbare: sandu Mzuri ewaaghanyie.

³⁵ Kake wekurunganya na mbare: wakakulosha ndima jawo.

³⁶ Wakajitumikia sanamu jawo: iji jikaoka mtegho hawo.

³⁷ Ee, wakawang’ola waana wawo wa kiume na wa kiche: kuoka matasi hena maluhungu.

³⁸ Wakaitisha sakame isina kutekwa, sakame ya waana wawo wa kiume na wa kiche: wewang’olie matasi hena sanamu ja Kanaan, isanga likagerwa ikwe hena sakame.

³⁹ Huwo wakagerwa ikwe na ndima yawo: wakatonga wekishinda ghati ya mihiro yawo.

⁴⁰ Hena iyo oro yakwe Mzuri ikaaka wanga ya wandu wakwe: akashishirrwa na uhoja wakwe.

⁴¹ Akawagera mkononi ha mbare: wala wewasuie wakawaitoria.

⁴² Maring’a mawo wakawainyala: wakawikwa si ya mkono wawo.

⁴³ Kandu keingi akawang’ola: kake wakamregija na mburi yawo, wakasejwa si ghati ya owiwi wawo.

⁴⁴ Kake akauyoa wasi wawo: ekinasikie kiiyo kyawo.

⁴⁵ Akawakumbukia aghanyo lakwe: akatajaiye hena wingi wa malusario makwe.

⁴⁶ Akawaosha pia kusariwa: na wala wose wewatika wechungiwe.

⁴⁷ Utukije, ee Mzuri Izuwa wetu, na utuwunganye kufuma mbare: tulianjele izina lishenete lako na tukuisise ghati ya luisiso lwako.

⁴⁸ Atasiwe Mzuri, Izuwa wa Israeli, too ndarasi mtano ndarasi: na wandu wose waghambe, Esai; Mwisiseni Mzuri.