Malumbo 105 - Sumu Yedi ya Isa Masiya 1906 Kitamo 1897 Malumbo 1905

¹ Mwanjeleni Mzuri liitangeni izina lakwe: toranyeni mihiro yakwe ghati ya mbare.

² Mbinieni, mbinieni maluisiso: lieni mburi ya marighio makwe mose.

³ Ng’areni ghati ya izina lakwe lishenete: ngoro yawo wemwenda Mzuri iizihirwe.

⁴ Mwendeni Mzuri na zinya yakwe: endeni wusho wakwe ndarasi.

⁵ Kumbukeni marighio makwe emaarehie: vindu vyakwe vibaha, na mawuchili ma itumbu lakwe.

⁶ Unywi mbeu ya Ibrahimu muzoro wakwe: unywi waana wa Yakobo, wasaghurwa wakwe?

⁷ Niye Mzuri Izuwa wetu: mawuchili makwe meoho ghati ya masanga mose.

⁸ Elikumbuka aghanyo lakwe ndarasi: kiteto ekiaghanyie hena marika elfu.

⁹ Lila eliarehie na Ibrahimu: kiraro kyakwe hena Isaak.

¹⁰ Lila emdindijie Yakobo hena itanawo: na Israeli hena aghanyo la ndarasi.

¹¹ Ekighamba, Ninekuinga isanga la Kanaan: ifungu la uhoja wenyu.

¹² Wakinaoke hena kutara wandu wafaa tiki: ee, wafaa muno, na wagheni isangeni.

¹³ Wakajunguluka kufuma mbare mtano mbare: kufuma ufumwa mwe mtano mbare ingi.

¹⁴ Teshighaye mundu ose kuwaketia viwiwi: ee, ewadewere wafumwa hena lwawo.

¹⁵ Ekighamba, Usiwakuware wegeriwe‐mafuta wangu: nete usiwawinye waroti wangu.

¹⁶ Akaitanga nzaa ize wanga ya isanga: akalibaa isibo lose la kidjo.

¹⁷ Akaingija mundu msongorana wawo: Yusuf akataghwa kuoka muzoro.

¹⁸ Wakamawinya maghu makwe na mapingu: akayajwa ghati ya minyororo.

¹⁹ Mtano magheri kiteto kyakwe kikinafishwe: kiteto kyakwe Mzuri kikamghesha.

²⁰ Mfumwa akaingija akamchungua: eye mwitoria mbare, akamshighiria atonge.

²¹ Akamwosha mzuri wa nyumba yakwe: na mwitoria mali mose makwe.

²² Awachunge wabaha wakwe sandu ekundie: na awaloshe waghosi wakwe kucha.

²³ Israeli pia akaingia na Misri: Yakobo akaikaa na isanga la Ham.

²⁴ Akawanetija wandu wakwe muno: akawaosha kudinda kukela maring’a mawo.

²⁵ Akajigharusha ngoro yawo wawasue wandu wakwe: wakete ukeleki na wazoro wakwe.

²⁶ Akamwingija Musa mzoro wakwe: na Harun emsaghurie.

²⁷ Wakawondja maluwano makwe ghati yawo: na marighio ghati ya isanga la Ham.

²⁸ Akaingija kija, akahaosha ha kija: tewevigolong’ie viteto vyakwe.

²⁹ Akagharusha mbombe jawo kuoka sakame: akajikoma nguluma jawo.

³⁰ Isanga lawo likaizua machua: ghati ya vijiwo vya wafumwa wawo.

³¹ Akateta, makaza mafio ma shindaki: na sawa ghati ya mihaka yawo yose.

³² Handu ha mvua akawainga mabwe ma mvua: na moto uaka isangeni hawo.

³³ Akaibigha mizabibu yawo pia na mitini yawo: akaibaa miti ya mihaka yawo.

³⁴ Akateta na nzighe jikaza: na manyongo, mesiidime kutarika.

³⁵ Jikavila vimeo vyose vya isanga lawo: jikala kugera kwa miteme yawo.

³⁶ Akawabigha pia wa‐mbele wose isangeni hawo: wabaha wa zinya yawo yose.

³⁷ Akawang’ola na fetha na thahabu: asioke mundu mnana mwe ghati ya mbare jakwe.

³⁸ Misri akaizihirwa wekinafume: amu fole yawo iokie yawaguia.

³⁹ Akawanika ijumbi hena kufinikira: na moto hena kuangaja kio.

⁴⁰ Wakaomba, akaete vitatakule: akawaighusha na kidjo kya wanga.

⁴¹ Akajughua ibwe, mbombe jikafuma: jikatonga na handu heomie sa mfuro.

⁴² Amu ekikumbuke kiteto kishenete kyakwe: na Ibrahimu muzoro wakwe.

⁴³ Akawang’ola wandu wakwe na luizihiro: na wasaghurwa wakwe na kuvina.

⁴⁴ Akawainga masanga ma mbare: wakaiuha ndima ya wandu waigure.

⁴⁵ Nesa wamagure maitanawo makwe; na wajiyoe sheria jakwe: Mwisiseni Mzuri.