Malumbo 104 - Sumu Yedi ya Isa Masiya 1906 Kitamo 1897 Malumbo 1905

¹ Mtasie Mzuri, ee ngoma yangu: ee Mzuri Izuwa wangu, uokie mbaha muno; udokie nganyi na ubaha.

² Wakufinikira na kyangaji sa na suke ya kudoka: uwanika majumbi sa pazia.

³ Eye eiwika mighamba ya ghuu yakwe mbombeni; eye emaosha majumbi igari lakwe: eye esela wanga ya mazaghu ma ngungu.

⁴ Eye ejiosha ngungu waondo wakwe: wahiri wakwe moto uaka.

⁵ Eye ewika mawoko ma masanga: masiwone kuwushijwa ndarasi.

⁶ Wamafinikira na bahari sa na nguo: mbombe jikaimuka wanga ya nduwi.

⁷ Hena kudewera kwako jikamatuka: hena ighonda la kururuma kwako jikamanga kutonga.

⁸ Jikakwea hena nduwi, jikasea hena mawongo: mtano handu hala ujiwikie.

⁹ Wawika muhaka jisikele: jisihundukewa kufinikira masanga.

¹⁰ Eingija maluchoro mawongoni: mevetia ghati na ghati ya nduwi.

¹¹ Meng’ola kya‐kunywa hena nyama jose ja shighati: maloitiko meiting’ija ngiru.

¹² Mbai yamo ndeghe ja wanga jina kutua kwawo: javina ghati ya mbagha.

¹³ Ejinyosha nduwi kufuma vijiwo vyakwe: masanga maighuta hena kugera kwa ndima jako.

¹⁴ Emeeja mani hena ng’ombe, na vimeo hena ndima ya wandu: nesa ang’ole kidjo kufuma si.

¹⁵ Mvinyo ula uiseja ngoro ya wandu, na mafuta ma kuangaja wusho wakwe: na kidjo kya kudindija ngoro ya wandu.

¹⁶ Miti yakwe Mzuri yaighuta: mierezi ya Lebanoni, eihandie.

¹⁷ Hala ndeghe jaareha machanja mawo: na ngongolo, mirie nyumba yakwe.

¹⁸ Nduwi ndeza hena mbuji ja shighati: mabwe matukio hena mbelele.

¹⁹ Eaghanya mweji hena magheri: nzano yatisiwa kusea kwakwe.

²⁰ Waareha kija, na kio kioho: magheri nyama jose ja kititoni jafuma.

²¹ Waana simba waruruma wekienda mayemo: na weenda kidjo kyawo kufuma hakwe Izuwa.

²² Nzano yakwea, wetonga: wekuyaja si ghati ya mararo mawo.

²³ Mundu efuma hena mhiro wakwe na hena ndima yakwe: mtano chamagheri.

²⁴ Ee Mzuri, nize ndima jako ni nyingi! hena kucha ujiareha jose: masanga meizua na vilungiwe vyako.

²⁵ Hala ni bahari, mbaha na iarame: ghati yakwe vindu vibulutika visiidime kutarika, nyama ndongo na mbaha.

²⁶ Hala merikebu jatonga, na hala lewiathani: umwarehie aseke hala.

²⁷ Awa wose wekuinda we: uwainge kidjo kyawo magheri ma kuwe.

²⁸ Wekiwunganya kila uwang’olia: wajughua mkono wako, na weighuta na vyedi.

²⁹ Wauwisa wusho wako, wela wasi: waluwushija luhemo lwawo, wefwa, na weihundukia purughushe yawo.

³⁰ Waingija ngoma yako, welungwa: na wauarehawa wusho wa si.

³¹ Kirumi kyakwe Mzuri kiikae ndarasi: Mzuri aizihirwe ghati ya ndima jakwe.

³² Eye emayoa masanga, na mededema: ejikuwara nduwi, jafuma moshi.

³³ Ninembinia Mzuri misi yose nioho na moo: ninembinia Izuwa wangu luisiso, nikioka nakia.

³⁴ Kukusara kwangu kumnonie: nineizihirwa ghati ya Mzuri.

³⁵ Wenye ng’oki waiting’o masangeni, na wawiwi wasiokewa: mtasie Mzuri, ee ngoma yangu; mwisiseni Mzuri.