Malumbo 103 - Sumu Yedi ya Isa Masiya 1906 Kitamo 1897 Malumbo 1905

¹ Mtasie Mzuri, ee ngoma yangu: na kyose kioho ndeni hangu, litasie izina lakwe lishenete.

² Mtasie Mzuri, ee ngoma yangu: nete usiviiwae vyedi vyakwe vyose.

³ Eye eshighia matekwa mako mose: eye ehodja ndwari jako jose.

⁴ Eye ekombola moo wako ghati ya kunyamarwa: eye ekugera lumerisia lwa lukundo na lusario.

⁵ Eye eighusha itumbu lako na vindu vyedi: mtano wudongo wako wuhunduka sa mbarambako.

⁶ Mzuri eketa mibiro ya ngalo: na mawuchili hena wose weinyalwa.

⁷ Emtisiwija Musa nzia jakwe: na waana wa Israeli mihiro yakwe.

⁸ Mzuri eizua lusario na mvono: mhoo hena kureghija, na wa lusario lwingi.

⁹ Tekadewereye misi yose: nete tekagureye kureghija kwakwe ndarasi.

¹⁰ Tetuketiaye hena ng’oki jetu: nete tetuingaye hena matekwa metu.

¹¹ Amu sandu majumbi mekoiye wanga ya masanga: lubaha huwo lusario lwakwe hena wala wemwondoka.

¹² Hae sa kifuma‐nzano kufuma kigwa‐nzano: hae huwo emawushija mateshanyo metu kufuma hetu.

¹³ Sandu wawee ewasaria waana wakwe: huwo Mzuri ewasaria wala wemwondoka.

¹⁴ Amu eutisiwe muri wetu: ekumbuka ti uswi tu purughushe.

¹⁵ Mundu, misi yakwe ni sa mani: sa kiwaro kya mbuweni, huwo eeha.

¹⁶ Amu ngungu yavetia wanga yakwe, na kyateka: na handu hakwe tekakitisiwewa.

¹⁷ Kake lusario lwakwe Mzuri ni lwa kufuma ndarasi wanga ya wala wemwondoka: na ngalo yakwe hena waana wa waana.

¹⁸ Hena wala weligura aghanyo lakwe: na hena wala wemakumbuka malosho makwe wamakete.

¹⁹ Mzuri ekiduwija kiikayo kyakwe majumbini: na wufumwa wakwe uitoria wanga ya vyose.

²⁰ Mtasieni Mzuri, unywi malaika wakwe: unywi wabaha hena zinya, muketa kiteto kyakwe, mukisikia ighonda la kiteto kyakwe.

²¹ Mtasieni Mzuri, unywi wose malweriri makwe: unywi wahiri wakwe, muketa sandu ekundie.

²² Mtasieni Mzuri, unywi wose ndima jakwe, ghati ya handu hose ha kuitoria kwakwe: umtasie Mzuri, ee ngoma yangu.