Luka 7 - Sumu Yedi ya Isa Masiya 1906 Kitamo 1897 Malumbo 1905

¹ Na ekinaidiwe viteto vyakwe vyose masikioni ha wandu, akaingia Kapernaum.

² Heokie na njama, muzoro wakwe eokie ewadjua ekienda kufwa, ekundiwe muno.

³ Ekinasikie mburi ja Yesu, akamwingijija waghosi wa Wayahudi, akamuomba aze amhodje muzoro wakwe.

⁴ Nawo wekinafike ha Yesu, wakamuomba hena lunyarki, wekiteta, ti Ni wedi aarehiwe knidu iki nawe,

⁵ amu ekundie mbare yetu, mtano etujengie sunagogi.

⁶ Yesu akatonga nawo. Na ekinaoke si hae na nyumba, njama ula akatuma hakwe wambuyae, ekimburra, Mzuri, usikurishe wukiwa: amu mi siidima uingie we si ya ghu yangu:

⁷ nete hena iyo siidime mwenye kuza hako, kake utete hena kiteto tiki, na mwana wangu enehoa.

⁸ Amu na mi ni mundu nigeriwe si ya wabaha, mwenye wabwange si yangu; nikimburra mwe, Tonga, etonga; na ungi, Izoo, eza; na muzoro wangu, Areha huwo, careha.

⁹ Yesu ekinasikie ivi akarighiwa hena lwakwe, akawagharukia matorano wemratere, akaghamba, Namburra unwi, mtano ghati ya Israeli siwoniemi luitikijo sa ulu.

¹⁰ Nawo wetumiwe wekinahunduke nyumbeni, wakambona muzoro ahoa.

¹¹ Ikaoka ikuade, akatonga kiongo kiitangwa Nain; wakatikana naye waanalosha wakwe na wandu weingi.

¹² Na ekinasongeria mbenge ya kiongo, heokie na kimba kitikiwe some, mwana mjenye wa mce, na efwiwe ni mume; na wandu weingi wa kiongo hamwe naye.

¹³ Na Mzuri ekinambone akamsaria, akamburra, Usiiya.

¹⁴ Akaza akilikuwara ilalo: wala watiki wakaimuka. Akaghamba, Mbwange, nakuwurra, wuka.

¹⁵ Ula efwie akaikaa, akawoka kuteta. Akamwinga mee.

¹⁶ Fole ikawagura wose, wakamwisisa Izuwa, wekiteta, Mroti mbaha awuka hetu: na, Izuwa awazia wandu wakwe.

¹⁷ Mburi jakwe iji jikafuma ghati ya Uyahudi wose, na ghati ya masanga mose mejunguluka.

¹⁸ Na waanalosha wakwe Yohana wakamtindia vindu ivi vyose.

¹⁹ Yohana akawaitanga waanalosha wakwe weri, akamwingijia Mzuri, ekiteta, We niwe ula eza, kana tumyoyie ungi?

²⁰ Na wandu awa wekinamzie wakaghamba, Yohana Mbatizaji atutuma hako, ekiteta, We niwe ula eza, kana tumyoyie ungi?

²¹ Hena magheri mala akahodja weingi ndwari jawo, na kuwadjua, na maluhungu mawiwi, webajike‐meso weingi akawainga kuwona.

²² Akatalua akawawurra, Tongeni, mremtindia Yohana vila mwaviwona na mwavisikia; webajike‐meso wewona, wechingilika wetonga, wenye kusumura wezerrijiwa, weming’ani wasika, wefwie wawuka, wakiwa watindiwa sumu yedi.

²³ Na keba niye esishishirwa hangu.

²⁴ Wekinatonge hawo wasu wa Yohana, akawoka kuteta na matorano mburi yakwe Yohana, Nikini mufumie mtano ishighati kuyoa? Igugu likidedemishwa ni ngungu.

²⁵ Kake nikini mufumie kuwona? Mundu edokie suke nana? Wenye suke ya kuisiswa na kidjo chedi waikaa nyumbeni ha wafumwa.

²⁶ Kake nikini mufumie kuwona? Mroti? Kididi, namburra, na mbaha kukela mroti.

²⁷ Uu niye etamiwe, Yoa, namtuma msu wangu msongorana wa wusho wako, Eneareha nzia yako msongorana wako.

²⁸ Namburra unwi, Ghati ya wandu wewoniwe ni wache tehena mbaha kukela Yohana: kake ula mdongo ghati ya ufumwa wa Izuwa ni mbaha kukela ye.

²⁹ Na wandu wose wekinasikie, na weuha lushango, wakamwisisa Izuwa, wekibatijwa hena lubatijo lwa Yohana.

³⁰ Kake Wafarisayo na waana wa Kiteto wakasua mburi ya Izuwa wekioka tewebatizwa naye.

³¹ Ninewafwananisha na kini wandu wa irika ili?

³² Na nikini wafwanana nacho? Wafwanana na waana weikaa si kichindeni, wekighambana wekiteta, Twamubighia unwi mtorito, nete musiwine; twamuiyiya, nete musiije masoji.

³³ Amu Yohana Mbatizaji eza, esila kidjo nete esinywa mawa, mukateta, Ena luhungu.

³⁴ Mwana wa Adamu eza ekila na ekinywa, mukaghamba, Yoa mundu mkunda kula na mwengeji, mbuyae weuha lushango na wenye ng’oki!

³⁵ Kucha kukaisiswa hena waana wakwe wose.

³⁶ Mfarisayo mwe akamuomba ale hamwe naye, akaingia nyumbeni hakwe Mfarisayo, akaikaa si.

³⁷ Na mche wa kiongo kila mwenye ng’oki, ekinatisiwe aikaa nyumbeni ha Mfarisayo, akaete alabastro ya marhamu,

³⁸ akaimuka nyuma maghuuni hakwe, eiya, akawoka kumiminia masoji maghuni, akamahaija na nyui ja mtwi wakwe, akamanyonyoza muno maghu makwe, akamawira marhamu.

³⁹ Ekinawone Mfarisayo ula emwitanga, akaghamba ngoroni hakwe ekiteta, Uu kwakicha ni mroti kwakicha ekitisiwe niani na ni mche ani uu emkuwara, ya kuoka ni mwenye ng’oki.

⁴⁰ Akatalua Yesu akamburra, Siman, nina kiteto cha kukuwurra. Akateta, Mlosha, teta.

⁴¹ Heokie na mundu muhakui fetha mwenye wasile weri; mwe eawa niye denari maghana masano, wa keri makumi masano.

⁴² Wekioka tewena cha kuiha, akawashigia wose weri. Haya, ni uhi enemkunda muno?

⁴³ Akatalua Siman, akaghamba, Nagheshijia, ula eshigiwe muno. Akamburra, Waghamba kididi.

⁴⁴ Ekimgharukia mche akamburra Siman, Wambona mche uu? Niingie nyumbeni hako, touniinga mbombe ya maghu; uu animiminia maghu masoji makwe na amahaija na nyui jakwe.

⁴⁵ Touninyonyoze we; uu too nikinaingie, teshiga kuninyonyoza muno maghuu.

⁴⁶ Twaniwira mafuta mtwi; uu aniwira maghu na marhamu.

⁴⁷ Hena lwa ii, nakuwurra, ashigiwa ng’oki jakwe nyingi, amu akunda muno: naye eshigiwe kadongo akunda kadongo.

⁴⁸ Akamburra, Washigiwa ng’oki jako.

⁴⁹ Wala weikee naye wakawoka kuteta ngoroni hawo, Niani uu ashighia ng’okiwa?

⁵⁰ Akamburra mche, Luitikijo lwako lwakukija; tonga na kiboha.