Luka 5 - Sumu Yedi ya Isa Masiya 1906 Kitamo 1897 Malumbo 1905

¹ Ikaoka matorano wekimdudura wekisikija kiteto cha Izuwa, naye akaoka ekiimuka mbai ya ndiwa ya Galilaya;

² akawona ngalawa mbiri jiokie mbai ya ndiwa; kake waloi wefuma waoja nyavu jawo.

³ Akaingia ngalawa mwe, iokie ya Siman, akamwomba asongeje hadongo kufuma kiwambara, akaikaa si, akalosha matorano ghati ya ngalawa.

⁴ Na ekinaidiwe kuteta, akamburra Siman, Songeria mtano handu hena mbombe nyingi, museje nyavu jenyu, kusakia.

⁵ Siman akamtalua, akamburra, Mzuri, Tuhirie kio bagha, tusiwone kindu: kake hena kiteto chako ninejiseja nyavu.

⁶ Na wekinaarehe huwo, wakagura nguluma nyingi; nyavu jawo jikawoka kubajika.

⁷ Wakawakonyia waghenji weokie ghati ya ngalawa ingi, wakaza, wakajiizuja ngalawa jose mbiri mtano kujizamija.

⁸ Siman Petro ekinaviwone, akagwa maghuni ha Yesu, ekiteta, Mzuri, fuma hangu, amu mi ni mwenye ng’oki.

⁹ Amu erighiwe, ye na wose weoho hamwe naye, hena nguluma jila wajiwonie.

¹⁰ Na Yakobo huwo, na Yohana, waana wa Zebedayo, weokie washanga Siman. Yesu akamburra Siman, Usiondoke; too ingeriaha uneoka ukihora wandu.

¹¹ Na wekinajiete ngalawa kiwambara, wakashiga vyose, wakamratera.

¹² Ikaoka ekinaoke ghati ya kiongo kimwe, yoa, mundu egurwe muno kusumura: naye ekimbona Yesu, ekigwabu, akamwomba, ekiteta, Mzuri, ukikunda, waidima kunizerrija.

¹³ Akaronga mkono, akamkuwara, ekiteta, Nakunda, uzerrike. Chwi kusumura kukamtana.

¹⁴ Akamwaghanya asimburre mundu, kake, Tonga, ukuwondje hena mkara, ung’ole vya kuzerrika kwako, sandu Musa eaghanye, hena luwondjo hawo.

¹⁵ Kake mburi jakwe jikaneta kutoranyika, na matorano meingi wakatorana kumsikija na kuhodjwa naye ndwari jawo.

¹⁶ Kake ye eokie ekikukemba shighati ekiomba.

¹⁷ Ikaoka musi mwe, akaoka ekilosha, na Wafarisayo na wetama weoho weikee si, weokie wefuma viongo vyose vya Galilaya na Uyahudi na Yerusalemi, Na zinya ja Mzuri jikaoka naye kuhodja.

¹⁸ Na wandu watika mundu na wui, eokie ena ndwari ya kuwia, wakaenda handu ha kumwingija, na kumbika msongorana wakwe,

¹⁹ na wesihawone ha kumwingija, hena matorano kuoka meingi; wakakwea ghuni, wakamseja ghati ya matofali hamwe na wui ghati na ghati msongorana wakwe Yesu.

²⁰ Naye ekinawone luitikijo lwawo, akamburra, Mundu, wawushijiwa ng’oki jako.

²¹ Watama na Wafarisayo wakawoka kukanana, wekiteta, Niani uu eteta utiri? Niani aidima kuwushija ng’oki, esioke Izuwa mwenye?

²² Akatwarija Yesu makusaro mawo, akatalua akawawurra, Nikini mukusara ngoroni henyu?

²³ Nikihi kianguhe kuteta, Wawushijiwa ng’oki jako, kana kuteta, Imuka, utonge?

²⁴ Kake nesa mutisiwe, ti Mwana wa Adamu ena zinya ghati ya masanga ajiwushije ng’oki, (akamburra ula mwenye ndwari ya kuwia), Nakuwurra, Imuka, tika wui wako, tonga nyumbeni hako.

²⁵ Chwi akaimuka msongorana wawo, akatika kila ekiyayia, akatonga nyumbeni hakwe, ekimwisisa Izuwa.

²⁶ Wakarighiwa wose, wakamwisisa Izuwa, wakaizua ni fole, wekiteta, Twawona vindu vibaha yoo.

²⁷ Ikuade akafuma, akawona mwuhia lushango, izina lakwe Lawi, ekiikaa handu ha lushango, akamburra, Uniratere.

²⁸ Akashiga vyose, akawuka, akamratera.

²⁹ Lawi akamwarehia kidjo kibaha nyumbeni hakwe, na weuhia lushango weingi na wandu wengi weokie wekiikaa hamwe nawo.

³⁰ Wafarisayo na wetama wakawanunuwikia waanalosha wakwe, wekiteta, Nikini kula na kunywa hamwe na weuhia lushango na wandu wenye ng’oki?

³¹ Yesu akatalua akawawurra, Wala wesiwawiwa teweenda mughanga, nde wewadjua.

³² Nami sizie kuitanga wandu wedi, nde wenye ng’oki, wachwe muti.

³³ Nawo wakamburra, Waanalosha wa Yohana wachunga keingi, na waomba muno, na waanalosha wa Wafarisayo huwo, kake wako wala na wanywa.

³⁴ Akawawurra Yesu, Muidima kuchungisha wandu weoho na ngasu, mwenye kuaika ekioka hamwe nawo?

³⁵ Kake misi ineza, mwenye kuaika eneikaewushijwe hawo, niho weneikawachunge misi ila.

³⁶ Akawawurra na mfwanano, Ti tehena mundu egera kidame cha suke sha wanga ya suke isakae; ekigera, ila sha ibaja, na kidame cha suke sha tekigurana na ila isakae.

³⁷ Nete tehena mundu agera mawa masha ghati ya vikuchu visakae; ekigera, mawa masha menebaja vikuchu vila, na mawa meneitika, na vikuchu vinenyamarika.

³⁸ Kake mawa masha ni kugerwa ghati ya vikuchu visha, na vyose viri vinekia.

³⁹ Nete tehena enywa mawa ma kae akunda masha; amu eghamba, Keba ma kae.