Luka 4 - Sumu Yedi ya Isa Masiya 1906 Kitamo 1897 Malumbo 1905

¹ Akahunduka Yesu eizue ni Ngoma Mshenete kufuma Yardeni, akarongojwa na Ngoma ishighati misi makumaane,

² ekigheshwa ni Shetani; nete telie kindu misi ila, nayo ikinafike, ikuade akasikia nzaa.

³ Shetani akamburra, Kwakicha niwe Mwana wa Izuwa, uliwurre ibwe ili lioke ibumunda.

⁴ Yesu akamtalua, ekiteta, Yatamwa, ti mundu tekia hena ibumunda tiki.

⁵ Akamkweja akambondja matorio mose ma masanga chwi ila.

⁶ Shetani akamburra, Ninekuinga matorio ama mose na ubaha wawo, amu nami naingiwe, nami namwinga ose nimkundie; ukiniinamia, vyose vineoka vyako.

⁷ Yesu akatalua akateta,

⁸ Shetani, itamiwe, Unemwinamia Mzuri Izuwa wako, unemtumikia naye mwenye.

⁹ Akamrongoja Yerusalemi, akamgera wanga ya msudu wa hekalu, akamburra, Kwakicha niwe Mwana wa Izuwa, ukuwirite si kufuma aha,

¹⁰ amu itamiwe, ti, Eneaghanya malaika wakwe wakurinde,

¹¹ na ti, Wenekutika mikononi, usikubighe kughu kwako hena ibwe.

¹² Yesu akatalua akamburra, Itetiwe Tounemghesha Mzuri Izuwa wako.

¹³ Shetani ekinaidiwe maghesho mose, akatana naye magheri mala.

¹⁴ Yesu akahunduka hena zinya ja Ngoma, akaza Galilaya, luisiso lwakwe lukafuma ghati ya isanga lose la mbai na mbai.

¹⁵ Akaoka ekilosha ghati ya masunagogi mawo, ekiisiswa ni wandu wose.

¹⁶ Akaza Nazareti, handu ehie, musi wa sabato akaingia sunagogi hena mikayie yakwe, akaimuka kusoma.

¹⁷ Akaingwa kitamo cha Mroti Isaya, na ekinakijughue kitamo, akawona handu hetamiwe,

¹⁸ Ngoma ya Mzuri wanga yangu, Amu iyo anigera mafuta niwatindie wakiwa Sumu Mshenete; Akanituma kuwatindia matahwa lushigio, Na webajikemeso kuwona, Na kuwachungua wewinywa,

¹⁹ Nitinde mwaka wa mvono wa Mzuri.

²⁰ Akakikoda kitamo, akamwinga mwindi, akaikaa si, na meso ma wandu wose weoho ghati ya sunagogi makamyoa ye.

²¹ Akawoka kuwawurra, Yoo matamo ama mafishwa masikioni henyu.

²² Wose wakamyoa, wakarighiwa hena viteto vya mvono vyafuma itumbu lakwe. Wakateta, Siye uu mwana wakwe Yusufu?

²³ Akawawurra, Tomna huwo kuniwurra mfwanano uu, Mughanga, ukuhodje mwenye; vyose tuvisikia viarehika ghati ya Kapernaum, uarehe na aha kiongo chako.

²⁴ Akateta, Kididi namburra, tehena mroti eguriwe nganyi kiongo chakwe.

²⁵ Kake hena kididi namburra, weokie ghati ya Israeli wache weingi wesina wome magheri ma Eliya, wanga ikinachungwe miaka mitatu na mieji mitandatu, ikinaoke nzaa mbaha ghati ya masanga mose;

²⁶ nete Eliya tetumiwe hena mwe wawo, nde hena mche mwe esina mume, wa Sarepta, kiongo cha Sidona.

²⁷ Na wandu weingi wenye kusumura weokie ghati ya Waisraeli magheri ma Elisha mroti, esizerrijwe mwe wawo nde Naaman mundu wa Sham.

²⁸ Wakaizua na oro wose weoho ghati ya sunagogi, wekisikia viteto ivi.

²⁹ Wakaimuka wakamfunya some ya kiongo chawo, wakamtika mtano iwongo la nduwi kijengiweho kiongo chawo, wamshindikiesi;

³⁰ kake ye akavetia ghati yawo, akagura nzia.

³¹ Akasea Kapernaum, kiongo cha Galilaya, akawalosha musi wa sabato.

³² Wakarighiwa muno hena kulosha kwakwe, amu kiteto chakwe cheokie na zinya.

³³ Na ghati ya sunagogi heokie na mundu, eokie na ngoma ya luhungu luwiwi, naye akaloza na ighonda ibaha,

³⁴ ekiteta, Ee, tuna kini nawe Yesu wa Nazareti? Waza kututesha? Nakutisiwa ti niwe Mshenete wa Izuwa.

³⁵ Yesu akambohia, ekiteta, Huja chwi, fuma hakwe. Luhungu lukamghusha ghati, lukafuma lusimbinye.

³⁶ Kurighiwa kukawaingia wose, wakawurrana wonawo, wekiteta, Nikini kiteto iki? amu hena zinya na luidimo aaghanya maluhungu mawiwi, namo mefuma.

³⁷ Luisiso lwakwe lukavifumia viongo vyose vya masanga mejunguluke.

³⁸ Akafuma sunagogi, akaingia nyumbeni hakwe Siman. Mkwee Siman akaoka eguriwe ni lutighana muno, wakamwomba hena lwakwe.

³⁹ Akaimuka mbai wanga yakwe, akalubohia lutighana lula, lukamshiga, akawuka chwi ila, akawatumikia.

⁴⁰ Mtano hekiswa wose weokie na wewadjua wa ndwari nyingi wakawaete hakwe,

⁴¹ naye akagera mikono wanga mundu ose wawo, akawahodja. Maluhungu makafuma wandu weingi, mekiiya na mekiteta, Niwe Masihi, Mwana wa Izuwa; naye akamabohia, esimashige kuteta; amu memtisiwe ti niye Masihi.

⁴² Na hekinaoke hemusi, akafuma akatonga handu hesina wandu, matorano wakamratera, wakaza hakwe, wakakunda kumkinda asitonge.

⁴³ Kake ye akawawurra, Yaniwe kutindia Sumu ya ufumwa wa Izuwa viongo vingi, amu hena iyo nitumiwe.

⁴⁴ Akaoka ekitinda ghati ya masunagogi ma Galilaya.