Luka 3 - Sumu Yedi ya Isa Masiya 1906 Kitamo 1897 Malumbo 1905

¹ Ghati ya mwaka wa ikumi na misano wa kutoria kwakwe Kaisari Tiberio, Pontio Pilato ekinaoke mchili wa Uyahudi, na Herode ekinaoke mfumwa wa Galilaya, na mundwawo Filipo ekinaoke mfumwa wa Iturea na isanga la Trakoniti, na Lusanio ekinaoke mfumwa wa Abilene,

² na Hana na Kayafa wekinaoke wakara wabaha, kiteto cha Izuwa kikamzia Yohana mwana wa Zachariya ishighati.

³ Akaza mbai jose ja Yardeni, ekitinda lubatizo lwa kuchwa muti hena kuwushijiwa ng’oki,

⁴ sandu itamiwe ghati ya kitamo cha viteto vya mroti Isaya, Ighonda lakwe eiya ghati ya ishighati, Areheni zia ya Mzuri, Rongesheni mavetio makwe.

⁵ Mawongo mose meneizujwa, Ma nduwi jose na matuwi mose jinesejwa, Na kila kigwie kinerongeshwa; Na zia jina mawongo jinerongeka.

⁶ Na kyose kina muri kinewona lukio lwa Izuwa.

⁷ Akawawurra matorano wefumie ishighati nesa mabatizwe naye, Unwi irika la nyoka, niani ambonya kumatuka oro ineza?

⁸ Amu iyo eteni ndunda jiwe kuchwa muti, nete musiwoke kuteta ngoroni, Tuna apa wetu Ibrahimu: amu mi namburra, ti Izuwa aidima kumwarehia Ibrahimu waana hena mabwe ama.

⁹ Ingeriaha izoka laidivika kugerwa kikoloni cha muti, na muti ose usigera ndunda jedi utemwa uwiritiwe motoni.

¹⁰ Matorano wakambujanya, wekiteta, Tuketeze ingeriaha?

¹¹ Akawatalua akawawurra, Ula ena kanzu mbiri amghawie mughenji esina; na ula ena kidjo, akete huwo.

¹² Weuhia lushango nawo wakaza wabatizwe, wakamburra, Mlosha, tuketeze?

¹³ Akawawurra, Musiuha kukela wundu muaghanyiwe.

¹⁴ Wakambujanya nawo wabwange, wekiteta, Na uswi tuketeze? Akawawurra, Musiitushe mundu, nete musilinganye; nawa muhoiwe hena mshahara wenyu.

¹⁵ Na wandu wose wekigheshijia, wekikusara ngoroni hawo mburi ya Yohana, ngea ti niye Masihi;

¹⁶ Yohana akatalua akawawurra wose, Mi namubatiza na mbombe, kake eza mwenye zinya kukela mi, nete siidima kumterua mkwa wa kiratu chakwe: ye enemubatiza hena Ngoma Mshenete na hena moto;

¹⁷ mkononi hakwe kihadjo, enehaiya kiwaza chakwe, enewunganya ngano kilaloni hakwe, kake makekeshwa enemashota na moto Usijimika.

¹⁸ Na viteto viingi vingi akawawondja ekiwatindia wandu Sumu yedi;

¹⁹ kake Herode tetrako, ebohiwa niye hena lwa Herodiade mche wa m’dwawo, na hena lwa viwiwi vyose Herode eareha,

²⁰ wangawa ya vyose akaongeja, akamchunga Yohana gerezeni.

²¹ Ikaoka, wandu wose wekibatizwa, na Yesu naye ekibatizwa, na ekiomba, wanga ikajughuka,

²² Ngoma Mshenete akamseia hena fwano la kimuri sa ibeta, ighonda likafuma wanga, likiteta, We niwe mwana wangu, mkundwa wangu; naizihirwa nawe.

²³ Akaoka Yesu mwenye, ekinawoke, sa miaka makumi matatu, ekioaka (sandu egheshijiwe) mwana wa Yusuf, wa Eli,

²⁴ wa Matati, wa Lawi, wa Melki, wa Jana, wa Yusufu,

²⁵ wa Matatia, wa Amos, wa Nahum, wa Esli, wa Nagai,

²⁶ wa Maathi, wa Matatia, wa Simeini, wa Yosek, wa Yoda,

²⁷ wa Yohana, wa Resa, wa Zorobabel, wa Salatheil, wa Neri,

²⁸ wa Melki, wa Addi, wa Kosam, wa Elmadam, wa Eri,

²⁹ wa Isa, wa Eliezer, wa Yorim, wa Matati, wa Lawi,

³⁰ wa Sumeon, wa Yuda, wa Yusuf, wa Yonam, wa Eliakim,

³¹ wa Melea, wa Menna, wa Matatha, wa Nathan, wa Daud,

³² wa Yese, wa Obedi, wa Boaz, wa Salmon, wa Nahason,

³³ wa Aminadab, wa Arni, wa Esrom, wa Fares, wa Yuda,

³⁴ wa Yakob, wa Isaak, wa Ibrahimu, wa Tara, wa Nahor,

³⁵ wa Saruhu, wa Ragau, wa Faleg, wa Eber, wa Sala,

³⁶ wa Kainan, wa Arfakasad, wa Shem, wa Nuhu, wa Lamek,

³⁷ wa Metusala, wa Enok, wa Yaredi, wa Mahaleleel, wa Kainan,

³⁸ wa Enos, wa Sethi, wa Adamu, wa Izuwa.