Luka 24 - Sumu Yedi ya Isa Masiya 1906 Kitamo 1897 Malumbo 1905

¹ Na musi wa kuwoka ghati ya misi ila mifungate, magheri ma heyawo kerre, wakaza mbireni, wekitika vindu vila weokie wekiareha, na wengi hamwe nawo.

² Wakawona ibwe libingilishwa mbireni.

³ Wakaingia, wasiwone muri wakwe Mzuri Yesu.

⁴ Ikaoka wekirighiwa hena vindu ivi, yoa, wandu weri wakaimuka msongorana wawo wedokie suke ja kumereteka:

⁵ na wekinagurwe ni fole na wekinainamije wusho si, wakawawurra, Nini kumwenda eoho na moo ghati ya wefwie?

⁶ Teoho aha, awuka; kumbukeni sandu emburrire unywi, ekioka ghati ya Galilaya,

⁷ ekiteta, ti yambe Mwana wa Adamu kung’olwa mikononi ha wang’oki, na kuwanikwa, na kuwuka musi wa katatu.

⁸ Wakakumbuka viteto vyakwe,

⁹ wakahunduka mbireni, wakaliya mburi ya vindu ivi vyose hena wala ikumi na mwe na wala wengi wose.

¹⁰ Wakaoka Maryamu Magdalene, na Yoanna, na Maryamu mee Yakobo, na wengi hamwe nawo, wewawurrire wasu vindu ivi.

¹¹ Kake viteto ivi viokie hawo sa sola, nete teweviitikija.

¹² Kake Petro akawuka, akasara kutonga mbireni, akainama akawona suke jila tiki, akatonga, ekirighiwa ngoroni hena vindu viokie.

¹³ Na yoa, musi ulaula, weri wawo weokie wekitonga kiongo, izina lakwe Emmao, kufuma Yerusalemi stadio makumi matandatu.

¹⁴ Wakaoka wekitederisho vindu vila vyose viokie hawo.

¹⁵ Ikaoka wekioka wekitederishiana, wekiwujanyana, Yesu mwenye akawasongeria, akatonga hamwe nawo.

¹⁶ Kake meso mawo makaoka mekiswijwa wasimtwarije.

¹⁷ Akawawurra, Ni viteto ani ivi muviteta mukisela? Wakaimuka, wekiyoa kikikiwa.

¹⁸ Na mwe wawo, izina lakwe Kleopa, akatalwa akamburra, Niwe mjenye ghati ya wagheni wa Yerusalemi usitisiwe vindu viokie ghati yakwe misi ii?

¹⁹ Akawawurra, Vindu ani? Wakamburra, Vindu vya Yesu Mnazareti, eokie Mroti, mwenye zinya hena kuareha na kuteta, msongorana wa Izuwa na msongorana wa wandu wose;

²⁰ na sandu wakara wabaha na wabaha wetu wemng’olie hena uchili wa kukoma, wakambanika.

²¹ Na uswi tweing’idaki ti niye enekombola Israeli. Na hamwe na vindu ivi vyose, yoo ni musi wa katatu too vindu ivi viokie.

²² Henawa wache wa hetu, wakatuirutuja, wetongie mbireni heyawo;

²³ wasiwone muri wakwe, wakaza, wekiteta ti wefumiwe ni malaika, wawawurra ti eoho na moo.

²⁴ Na wengi wa wala wa hetu wakatonga mbireni, wakawona huwo sandu wache wetetie, kake ye mwenye tewembonie.

²⁵ Akawawurra, Unywi mutomoda, na wenye ngoro jiemee, ghati ya kuitikija viteto vyose mroti wevitetie!

²⁶ Teimbe Masihi kunyamarwa uku, na kuingia ghati ya kirumi chakwe?

²⁷ Na ekiwoka too Musa na waroti wose akawatindia ghati ya vitamo vyose, viteto vya mburi yakwe.

²⁸ Wakasongeria kiongo wekikitonga; naye akakuitaa sa ekundie kuvetia.

²⁹ Wakamsingirija, wekiteta, Ikaa hamwe na uswi, amu ni chamagheri, na haswa.

³⁰ Akaingia kuikaa nawo. Ikaoka ekiikaa kidjoni hamwe nawo, akauha ibumunda, akalitasia, akalibaa, akawainga.

³¹ Meso mawo makajughuka, wakamtwarija; naye akamerukia asiwonekane nawo.

³² Mwe wawo akamburra mughenji, Ngoro jetu tejiokie jikiaka ndeni hetu, ekioka ekiteta na uswi nzieni, ekitutindia vitamo.

³³ Wakawuka magheri mala, wakahunduka Yerusalemi, wakawona wala ikumi na mwe wewunganyike,

³⁴ na wala hamwe nawo, wekiteta, Mzuri awuka kididi, akamfumia Siman.

³⁵ Nawo wakawaliya mburi ila ya nzieni, sandu atwarijike nawo ekiwabaiya ibumunda.

³⁶ Na wekioka wekiteta, Yesu mwenye akaimuka ghati yawo, akawawurra, Luworo henyu.

³⁷ Wakaituka, wakaingiwa ni fole, wakaitaa watewona kisuka.

³⁸ Akawawurra, Nini kuituka na nini kuitalua ngoroni henyu?

³⁹ Yoeni mikono yangu na maghu mangu, ti ni mi mwenye; nibabateni, yoeni; amu kisuka tekina nyama na mawindi, sandu mwaniwona mi kuoka namo.

⁴⁰ Na ekinatete huwo, akawawondja mikono na maghu.

⁴¹ Na wekioka teweitikija hena kuizihirwa wekirighiwa, akawawurra, Muna kindu cha kula aha?

⁴² Wakamwinga kibarandu cha nguluma kishotiwe.

⁴³ Akakiuha, akala msongorana wawo.

⁴⁴ Akawawurra, Ivi ni viteto vyangu namburrire nikinaoke hamwe na unywi, ti yaviwe kufishwa vyose vitamiwe ghati ya kiteto cha Musa na waroti na malumbo hena mburi yangu.

⁴⁵ Akawawijia kucha, nesa watwarije vitamo.

⁴⁶ Akawawurra, ti Huwo vitamiwe, Masihi anyamarwe na kuwuka ghati ya wefwie musi wa katatu;

⁴⁷ na ti kuchwamuti na kushigiwa kwa ng’oki kutindwe ghati ya wandu wose, hena izina lakwe, kukiwoka Yerusalemi.

⁴⁸ Na unywi ni wang’ola mburi ya vindu ivi.

⁴⁹ Na yoeni, namwingijija lutemiano lwa Apa wangu wanga yenyu, na unywi muikae ghati ya kiongo mtano muneikamudokwe na zinya jifuma wanga.

⁵⁰ Akawatika mtano Betania, akawushija mikono yakwe akawatasia.

⁵¹ Ikaoka, ekioka ekiwatasia, akakukemba hawo, akakwejwa wanga.

⁵² Nawo wakamwinamia, wakahunduka Yerusalemi hena kuizihirwa kubaha.

⁵³ Wakaoka hekaluni misi yose, wekimwisisa Izuwa. KUIDIWIKA.