Luka 23 - Sumu Yedi ya Isa Masiya 1906 Kitamo 1897 Malumbo 1905

¹ Wakawuka matorano mose mawo, wakamtika ha Pilato.

² Wakawoka kumlinganya, wekiteta, Twambona uu agharusha wandu, awaima wasimwinge Kaisari lushango, ekikughamba mwenye kuoka Masihi Mfumwa.

³ Pilato akambjanya, ekiteta, Niwe mfumwa wa Wayahudi? Akamtalua akateta, Sandu wateta ni huwo.

⁴ Pilato akawawurra wakara na matorano mala, Mi siwonami lukake ghati ya mundu uu.

⁵ Kake wala wakaneta kuteta, Ewaeleja wandu, ekilosha ghati ya isanga lose la Uyahudi, ekiwoka kufuma Galilaya mtano aha.

⁶ Pilato ekinasikie, akawujanya kwakicha ni Mgalilaya.

⁷ Na ekinatisiwe ti ni ghati ya lutorio lwa Herode, akamwingija ha Herode, eokie naye mwenye ghati ya Yerusalemi misi ii.

⁸ Naye Herode ekinambone Yesu, akaizihirwa muno, amu eokie ekikunda kumbona misi miingi, hena lwa kusikia mburi yakwe, akaing’idaki kumbona ekiareha kindu kibaha.

⁹ Akambujanya viteto viingi, kake ye temtalue kiteto kimwe.

¹⁰ Wakara wabaha na watama wakaimuka, wekikudindija kumlinganya.

¹¹ Herode akamseka hamwe na wabwange wakwe, akamsola, akamdoka suke ya kuwaa, kuidiwika akamhundua hakwe Pilato.

¹² Niho wakakundana musi ula Pilato na Herode, amu kuwoka weokie wazo.

¹³ Na Pilato ekinawaitange wala wakara wabaha na wandu wengi,

¹⁴ akawawurra, Unywi munietie mundu uu, sa mwe ewagharusha wandu; na yoa mamsikija msongorana wenyu, kake siluwonie lukake wanga ya mundu uu ghati ya vila mumlinganyie:

¹⁵ nete si Herode, amu amhundua hetu; nete tehena kindu kimbeiye kufwa ekiketie.

¹⁶ Nikiidiwa kumbigha ninemchungua.

¹⁷ (Amu tena huwo kuwachunguiya mundu mwe hena itasi.)

¹⁸ Wakaloza wote hamwe, wekiteta, Mbushije uu, utuchunguyie Baraba.

¹⁹ Na uu niye egeriwe kichungoni hena lwa kilinganya kiokie kiongoni, na hena lwa ukomi.

²⁰ Kake Pilato akatetawa nawo, ekikunda kumchungua Yesu.

²¹ Kake wala wakaiya wekiteta, Mbankie, mbanike.

²² Akawawurra kandu katatu, Ni uwiwi ani euarehe uu? Siwonie nete kindu kimbeiye kufwa: amu ii ninembigha ninemchungua.

²³ Kake wakaloza na maghonda mabaha, wekikunda asulibiwe, Maghonda mawo makalela.

²⁴ Pilato akakunda kiketike sawundu wakunda.

²⁵ Akamchungua ula egeriwe kichungoni hena lwa kilinganya na ukomi, wemkundie; kake akamng’ola Yesu sandu wekundie.

²⁶ Na wekinamtike wakamgura Siman, Mkurene, afuma mteme, wakambushija msalaba, autike nyuma ya Yesu.

²⁷ Na matorano mabaha ma wandu wakamratera, na wache wekikubighabigha na wekimwiyia.

²⁸ Kake Yesu akagharuka akateta, Unywi wache wa Yerusalemi, musiniiye mi, kake mukuiiye wenye na waana wenyu,

²⁹ Amu yoeni, misi ineza, wandu weneikawaghambe, Keba wala ndasa, na ndeni isimewona, na mawee mesimeamshwa.

³⁰ Niho wenewoka kuwurra nduwi, Tugwieni, na utuwi, Tushiyeni.

³¹ Amu wekiareha ivi hena mti mbisi, hena ula uomie ineokaze?

³² Wakatikwa weriwa, wawiwi, wakomwe kimwe naye.

³³ Na wekinafike handu haitangwe Ha kiborong’, niho wembanika, na wala wawiwi, mwe kuume, mwe kumoso.

³⁴ Yesu akateta, Apa, uwashigie, amu tewetisiwe wearehaze. Wakaghawa suke jakwe, wekijigeria zaro.

³⁵ Wandu weokie weimuke wekiyoa. Wabaha wakamsola, wekiteta, Ekijie wengi, akukije mwenye, kwakicha niye Masihi wa Izuwa, msawurwa.

³⁶ Na wabwange wakamseka, wekimzia,

³⁷ wekimwingija siki, wekighamba, Kwakicha we niwe mfumwa wa Wayahudi, ukukije mwenye.

³⁸ Heokie na lutamo wanga yakwe, Uu niye Mfumwa wa Wayahudi.

³⁹ Na mwe wa wawiwi wala wewanikwe kimwe naye akamtetia na lung’endo, ekiteta, We siwe eye Masihi? ukukije mwenye na uswi.

⁴⁰ Kake mughenji akatalwa, akambohia ekiteta, We toumwondoka Izuwa, ukioka ghati ya uchili uu?

⁴¹ Na uswi kyatuwe, amu twaingwa sandu vila twaviketa; kake uu teketie kindu kiwiwi.

⁴² Akateta, Yesu, unikumbuka mi, uneikauze ghati ya ufumwa wako.

⁴³ Akamburra, Amin nakuwurra, yoo uneoka hamwe nami paradisoni.

⁴⁴ Ikifika sa saa ya katandatu, kikaoka kija wanga ya isanga lose mtano saa ya kenda, izano ikiduhuka:

⁴⁵ pazia la hekalu likabajika ghati.

⁴⁶ Na Yesu ekinaiye na ighonda ibaha, akateta, Apa, nawika ngoma yangu mikononi hako. Na ekinavitete ivi, akachika ngoro.

⁴⁷ Na njama ekinawone vila viokie, akamwisisa Izuwa, ekiteta, Hena kididi mundu uu eokie wedi.

⁴⁸ Na matorano mose weokie wekiyoa, wekiwona vindu viokie, wakakubigha mbafu, wakahunduka.

⁴⁹ Na wandwawo wose na wache wetikana naye kufuma Galilaya, weokie wekiimuka hae, wekiyoa vindu ivi.

⁵⁰ Na mundu mwe, izina lakwe Yusuf, eokie mbaha, mundu wedi na ewe

⁵¹ (uu teokie mshanga hena ngiliwata yawo), naye eokie inoti wa Arimathaya, kiongo cha Wayahudi, naye mwenye eokie ekiinda ufumwa wa Izuwa:

⁵² uu akamtongia Pilato, akaomba muri wakwe Yesu.

⁵³ Akauseja, akaukoda sukeni, akamjika ghati ya mbira iforiwe mabweni, hesimegerwa mundu.

⁵⁴ Ukaoka musi wa kuarehia, na sabato ikasongeria.

⁵⁵ Na wache wefumie Galilaya hamwe naye wakaza wakayoa mbira, na muri wakwe wagerwaze. Wakahunduka, wakaarehia vindu vya mbungu yedi na mafuta.

⁵⁶ Musi wa sabato wakasowoka sandu kiokie kiteto.