Luka 22 - Sumu Yedi ya Isa Masiya 1906 Kitamo 1897 Malumbo 1905

¹ Ukasongeria musi mbaha wa mabumunda mesigeriwe chachu, uitangwe Pasaka.

² Wakara wabaha na watama wakaenda nzia wamkome, amu weokie wekiituka wandu.

³ Shetani akamwingia Yuda, eitangwe Iskariota, ekioka mwe wa wala ikumi na weri.

⁴ Akatonga akateta na wakara wabaha na njama sawundu enemng’ola hawo.

⁵ Wakaizihirwa, wakatemiana kumwinga fetha.

⁶ Naye akakunda, akaenda handu ha kumng’olia hesina matorano.

⁷ Na musi wa mabumunda mesigeriwe chachu ukafika, ikinawawe kusiza pasaka.

⁸ Akawatuma Petro na Yohana, ekiteta, Tongeni mutuarehie pasaka ii, turela.

⁹ Wakamburra, Nihi uhakundie turearehia?

¹⁰ Akawawurra, Yoa, mukioka mukiingia kiongo, munetorana na mundu etikie nyungu ya mbombe; mratereni handu ehaingia.

¹¹ Mburreni mwenye nyumba, Mlosha akuwurra, Nihi nyumba ya wagheni niidima kula pasaka na waanalosha wangu?

¹² Naye enembondja ghu mbaha ihambiwe; hala arehieni.

¹³ Wakatonga wakawona sandu ewawurrire, wakaarehia pasaka.

¹⁴ Na magheri mekinafike akaikaasi kimwe na wasu wala ikumi na weri.

¹⁵ Akawawurra, Niokie nikikunda muno kula hamwe na unywi pasaka ii magheri nisimekomwa:

¹⁶ amu namburra unywi, sineilawa, mtano magheri inefishwa ghati ya ufumwa wa Izuwa.

¹⁷ Akauhia ndemwa, akainga haika, akateta, Uheni ndemwa ii, muighawane unywi na unywi;

¹⁸ amu namburra unywi, Too ingeriaha sinywa kila chafuma ndunda ja mzabibu, mtano uneikauze ufumwa wa Izuwa.

¹⁹ Akauha ibumunda, akainga haika, akalibaa, akawainga ekiteta, Ili nilo muri wangu, ung’olwa hena lwenyu; areheni huwo hena kunikumbuka mi.

²⁰ Huwo na ndemwa kutera kwa kidjo, ekiteta, Ndemwa ii niyo luaghano lusha hena sakame yangu, iitika hena lwenyu.

²¹ Kake yoa, mkono wa mwenye kuning’ola uoho hamwe nami mezeni.

²² Ni kididi, Mwana wa Adamu atonga sandu iaghanywe, kake wukiwa wakwe mundu ula emng’ola!

²³ Wakawoka kuwujanyana wonawo, ti niani ghati yawo eneketa kindu iki.

²⁴ Heokie na ngani ghati yawo, ni uhi wawo eye mbaha.

²⁵ Akawawurra, Wafumwa wa mbare watoria wanga yawo, na wenye zinya wanga yawo weitangwa waori.

²⁶ Kake unywi si huwo: kake mbaha wenyu aoke sa mdongo; na mfumwa sa muzoro.

²⁷ Na niani mbaha, ula aikaa kidjoni kana ula etumika? Kake mi ghati yenyu ni sa ula etumika.

²⁸ Kake unywi ni wala weikee nami ghati ya maghesho mangu.

²⁹ Nami nambikia unywi ufumwa, sandu apa eniwikie mi;

³⁰ mule na munywe mezeni hangu ghati ya ufumwa wangu, muneikaa ghati ya vichumbi vya ubaha mukijichilia mbare ikumi na mbiri ja Israeli.

³¹ Siman, Siman, Yoa, Shetani emkundie unyi, nesa amuhete sa mbeke.

³² Kake mi nakuombia, luitikijo lwako lusiduhuke; nawe uneikauchwe muti, uwadindije wandwenyu.

³³ Akamburra, Mzuri, hamwe nawe mi naidima kutonga hena kichungo na hena kifwa.

³⁴ Akateta, Nakuwurra we, Petro, nguruwi teneiya yoo usimenikana kando katatu ti tonitisiwe.

³⁵ Akawawurra, Nineikamutume musina mbinda, nete kikuchu, nete viratu, mduhuke kindu? Wakamburra, Hai.

³⁶ Akawawurra, Kake ingeriaha, ula ena mbinda, aiuhe, huwo na kikuchu; na ula esina, ataghe suke yakwe, azore muhandi.

³⁷ Amu namburra unywi, Kiteto iki kifishwe hangu, kitamiwe, ti Atarika kimwe na wawiwi: amu vindu vyangu vina kuidiwika.

³⁸ Wakateta, Mzuri, yoa, mihandi miri ii. Akawawurra, Yafika.

³⁹ Akafuma akatonga nduwini ya zeituni, sandu emanyerre; waanalosha nawo wakamratera.

⁴⁰ Ekinafike handu hala akawawurra Ombeni musiingie ghati ya kugheshwa.

⁴¹ Naye akakukemba hawo sandu kugera kwa ibwe, akadung’uta akaomba, ekiteta;

⁴² Apa, ukikunda, univetijie ndemwa ii, kake si kila nakikunda mi, kake kila ukikunda we kioke.

⁴³ Akamfumia malaika wa wanga, ekimgera zinya.

⁴⁴ Naye ekioka ghati ya wukiwa ubaha, akaneta kuomba hena zinya; na ndughuri yakwe ikaoka sa madofi ma sakame, mekidoroka si.

⁴⁵ Akawuka ghati ya kuomba, akaza hena waanalosha wakwe, akawakicha washinjia hena lukusaro.

⁴⁶ Akawawurra, Nini kushinjia? wukeni muombe, musiingie ghati ya kugheshwa.

⁴⁷ Na ekinaoke ekiteta, yoa, matorano ma wandu, naye eitangwa Yuda, mwe wawo wala ikumi na weri, akawarongoria, akamsongeria Yesu, akamnyonyoza.

⁴⁸ Yesu akamburra, Yuda, we wamng’ola Mwana wa Adamu hena kumnyonyoza?

⁴⁹ Na wala weokie hamwe naye, wekinawone kindu kineoka, wakamburra, Mzuri, tubighane na muhandi?

⁵⁰ Mwe wawo akambigha muzoro wa mkara mbaha, akamchwa isikio la kuume.

⁵¹ Yesu akatalua, akateta, Washigeni huwo. Akakuwara isikio lakwe, akamhodja.

⁵² Yesu akawawurra wala wemzie wakara wabaha, na njama wa hekalu, na waghosi, Sa wanga ya msoki mwafuma na mihandi na masibo?

⁵³ Nami misi yose niokie hamwe na unywi hekaluni, tomunirongie mkono; kake ama magheri menyu na zinya ja kija.

⁵⁴ Wakamgura, wakamtika, wakamwete nyumbeni ha mkara mbaha. Kake Petro akamratera cha hae.

⁵⁵ Na wekinaoke waasha moto ghati na ghati ya kiwaza, wekiikaa hamwe, Petro akaikaa ghati yawo.

⁵⁶ Na mbora mwe ekinambone ekukaa ghati ya kyangaji, akamyoa, akateta, Na uu eokie naye.

⁵⁷ Akakana ekiteta, Mche we, simtisiwemi.

⁵⁸ Na kutera kadongo mundu ungi ekinambone akateta, Nawe mughenji wawo. Kake Petro akateta, Mundu we, si mi.

⁵⁹ Na ikuade sandu saa mwe, mundu ungi akamtumburia, ekiteta, Hena kididi na uu eokie hamwe naye, amu ni Mgalilaya.

⁶⁰ Petro akateta, Mundu we, sitisiwemi uviteta. Na chwi ila, ekioka ekiteta, nguruwi ikaiya.

⁶¹ Mzuri akagharuka, akamyoa Petro, Petro akakumbuka kiteto cha Mzuri, ekimburra, ti Nguruwi isimeiya unenikana kando katatu.

⁶² Akafuma some, akaiya hena wukiwa.

⁶³ Na wandu wala wemgurie Yesu wakamsolawakambigha.

⁶⁴ Na wekimfinikira meso, wakambujanya wekiteta, Mtwarije, niani akubigha.

⁶⁵ Na vindu vingi viingi wakamtetea hena utiri.

⁶⁶ Na kekinaoke hemusi, waghosi wa wandu na wakara wabaha na watama wakatorana, wakamwete hena chila yawo,

⁶⁷ wekiteta, Ukioka niwe Masihi, utuwurre. Akawawurra, Nikimburra, tomuneitikija:

⁶⁸ na nikimbujanya unywi, tomunenitalua.

⁶⁹ Kake too ingeriaha Mwana wa Adamu eneoka ekiikaa mkono wa kuume wa zinya ja Izuwa.

⁷⁰ Wawo wose wakateta, We niwe Mwana wa Izuwa? Akawawurra, Sandu muteta, nimi.

⁷¹ Wakateta, Twakundawa mburi ani? Amu uswi wenye twasikia hena itumbu lakwe.