Luka 21 - Sumu Yedi ya Isa Masiya 1906 Kitamo 1897 Malumbo 1905

¹ Akayoa akawawona wamasi wekigera itasi lao ghati ya sanduku ya matasi.

² Akawona na mche mwe efwiwe ni mume, mkiwa, ekigera pesa mbiri.

³ Akateta, Kididi namburra, ti Mche uu efwiwe ni mume, mkiwa, agera nyingi kukela wose.

⁴ Amu awa wose ghati ya mashigajiko mawo wagera ghati ya matasi; kake uu ghati ya wukiwa wakwe agera vindu vyakwe vyose.

⁵ Na wekinaoke wekiliteta hekalu, sandu lihambiwe na mabwe medi na maingijo,

⁶ akaghamba, Ivi muviyoa, misi ineza lisishigwe ibwe wanga la ibwe aha lisiboworwa.

⁷ Wakambujanya wekiteta, Mlosha, ivi vineoka rini? Na luwano lwavyo nikini ivi vineikavioke.

⁸ Akaghamba, Yoeni musikengwe; amu weingi weneza hena izina langu, wekiteta, Nimi; na, Magheri masongeria; musitonge nyuma yawo.

⁹ Na muneikamusikie ngondo na vilinganyo, musiingiwe ni fole; amu yawe vindu ivi virongore, kake kuidiwika si chwi ila.

¹⁰ Akawawurrawa, Mbare inewuka wanga ya mbare, na ufumwa wanga ya ufumwa:

¹¹ meneoka na madedemo mabaha ma isanga, na handu handu nzaa na ndwari; vineoka na vindu vya kuitusha, na maluwano mabaha ma wanga.

¹² Kake kuwoka kwa ivi vyose wenemgera unywi mikono, wenemkinya, wenemng’ola hena masunagogi na kichungoni mukiingijwa msongorana wa wafumwa na wachili hena lwa izina langu.

¹³ Inemugharukia unywi hena luwondjo.

¹⁴ Huwo gereni ngoroni henyu musikusare kuwoka munetalua kini.

¹⁵ Amu ninemuinga itumbu na kucha, wasiidime kulelana nete kukana wala wose wateta na unywi.

¹⁶ Kake muneng’olwa ni waweo na mamako, na wandwenyu, na mbare na wambuya; na wengi wenyu wenewakoma.

¹⁷ Muneoka mukishishirwa ni wandu wose hena lwa izina langu.

¹⁸ Nete na lujui lwa mitwini henyu toluteka.

¹⁹ Hena kugumiria kwengu munejikija ngoro jenyu.

²⁰ Na muneikambone Yerusalemi yajungulukwa na lweriri lwa wabwange, tisiweni ti kunyarmarwa kwakwe kwasongeria.

²¹ Magheri mala wandu weikee isanga la Uyahudi wamatuke nduwini, na weoho ghati ya kiongo wafume shighati, na weoho mtemeni wasiingie.

²² Amu misi ii ni misi ya kuihiwa lawi, vindu vyose vitamiwe vifishwe.

²³ Wukiwa wawo weemee na wawo weamusha ghati ya misi ila, amu wuneoka wukiwa ubaha ghati ya masanga, na oro wanga ya wandu awa.

²⁴ Wenegwa hena kukaiha kwa muhandi, wenetikwa wekichungwa na mbare jose: na Yerusalemi inewatwa na mbare, mtano magheri ma mbare menefika.

²⁵ Na maluwano meneoka ghati ya zano, na mweji, na ndondo; na ghati ya masanga wukiwa wa mbare, hena kurighiwa kwa kururuma ndiwa na visibwi;

²⁶ wandu wekisokea hena fole na hena kuyoyia vindu vimazia masanga, amu zinya ja wanga jinededemika.

²⁷ Niho wenembona Mwana wa Adamu ekiza ghati ya majumbi hena zinya na uwedi ubaha.

²⁸ Na ivi vikiwoka kuoka, yoeni wanga, wushijeni mitwi yenyu, amu ukombolo wenyu wasongeria.

²⁹ Akawawurra mfwanano, Yoeni mtini na miti yose.

³⁰ Ukioka usheghusha, mwawona mwatisiwa wenye ti ingeriaha cha‐mbombe chasongeria.

³¹ Na huwo unywi mukiwona vindi ivi vyaoka, tisiweni ti ni afuhi ufumwa wa Izuwa.

³² Kididi namburra, Irika ili telinevetia, mtano vyose vyaoka.

³³ Wanga na si jinevetia, kake viteto vyangu tevivetia.

³⁴ Kake kurindeni ngoro jenyu, musinetiwe ni kukunda kula na uengeji, na mahiro ma ingeriaha, nete musi ula usimwzie unywi turu.

³⁵ Amu sa mtegho unewazia wandu wose weikee wanga ya isanga lose.

³⁶ Kake cheweni magheri mose, mkiomba mbone kuoka na zinya ja kuvimatuka vindu ivi vyose vineoka, na kuimuka msongorana wa Mwana wa Adamu.

³⁷ Na misi yose eokie hekaluni ekilosha, na magheri ma kio akafuma, akaikaa nduwini iitangwa nduwi ya zeituni.

³⁸ Na wandu wose wakamzia heyawo kerre hekaluni wamsikije.