Luka 20 - Sumu Yedi ya Isa Masiya 1906 Kitamo 1897 Malumbo 1905

¹ Ikaoka musi mwe ekinaoke ekiwalosha wandu hekaluni, na kutinda sumu yedi, wakamzia wakara wabaha na watama hamwe na waghosi;

² wakaghamba, wekimburra, Utuwurre, hena zinya ani waareha ivi, kana niani ekuingie zinya ii?

³ Akatalua akawawurra, Ninembujanya nami kiteto kimwe, muniwurre:

⁴ lubatizo lwa Yohana lwafuma wanga, kana lwa wandu?

⁵ Wakala ngiliwata wonawo wakateta, Tukighamba, lwafuma wanga;

⁶ eneteta, Nini musimwitikije: kake tukighamba, lwa wandu; wandu wose wenetugera mabwe; amu wemmaije Yohana kuoka mroti.

⁷ Wakatalua, ti tewetisiwe lwafumahi.

⁸ Yesu akawawurra, Nete mi simburra unywi hena zinya ani naviareha ivi.

⁹ Akawoka kuwawurra wandu mfwanano uu: Mundu ehandie mteme wa mizabibu, akauhakuiya waimi, akazoka misi miingi.

¹⁰ Na magheri makwe akatuma mzoro hawo waimi, nesa wamwinge ndunda ja mizabibu: waimi wakambigha wakamfunya esina kindu.

¹¹ Akaneta kuingija muzoro ungi, wakambigha uu naye, wakamketa uwiwi wakamfunya esina kindu.

¹² Akaneta kuingija na wa katatu; wakambinya uu naye, wakamkinya.

¹³ Akaghamba mzuri wa mizabibu, Niketeze? ninemwingija mwana wangu mkundwa: ngea wenemguria nganyi uu.

¹⁴ Kake wekinambone waimi wakala ngiliwata wonawo, wekiteta, Uu niye mhodji: tumkome uhodje uoke wetu.

¹⁵ Wakamtagha some ya mizabibu, wakamkoma. Enewaketaze mzuri wa mizabibu?

¹⁶ Eneza enewanyamara waimi wala, nayo mizabibu enewainga wengi. Wekinasikie wakaghamba, Isioke huwo.

¹⁷ Akawayoa akaghamba, Nikini iki kitamiwe, Ibwe welisuie wajengi Ili liokie ibaha la nganda?

¹⁸ Ose egwa wanga ya ibwe ili enebaikabaika; naye wanga yakwe linegwa linemshagha.

¹⁹ Wakaenda watama na wakara wabaha kumgera mikono magheri mala; wakaondoka wandu; amu wetwarije ti awatetia wenye mfwanano uu.

²⁰ Wakamnyatia, wakatuma wazighani wekikuosha wedi, wamgure kiteto, natiri wawone kumgera hena lutorio na zinya ja mchili.

²¹ Wakambujanya, wekiteta, Mlosha, twakutisiwa kuteta na kulosha kwako kwedi, nete touyoa mundu, kake walosha nzia ya Izuwa hena kididi:

²² Yatuwe uswi kumng’olia Kaisari lushango?

²³ kana hai? Akatwarija ukeleki wawo, akawawurra, Niwondjeni dinari.

²⁴ Lwa mundu ani luwano ulu na lutamo? Wakaghamba, Lwa Kaisari.

²⁵ Akawawurra, Muiheni Kaisari vindu vya Kaisari, na Izuwa vindu vya Izuwa.

²⁶ Nete teweidime kumgura hena kiteto iki msongorana wa wandu; wakarighiwa hena kutalwa kwakwe, wakahuja.

²⁷ Wakamzia wandu Wasadukayo, niwo wateta ti tehena kuwuka;

²⁸ wakambujanya wekiteta, Mlosha, Musa etutamie, ti mundu ekifwiwa ni mundwawo, eokie na mche, nete tena waana, mundwawo amuhe mche ula, ambonie mundwawo mbeu.

²⁹ Heokie na wandu wafungate wa mcheku mwe; naye wa kuwoka akauha mche, akafwa, tena mwana, naye wa keri.

³⁰ Naye wa katatu akamuha,

³¹ na huwo wala wafungate, teweshige waana, wakafwa.

³² Ikuade mche akafwa naye.

³³ Ghati ya kuwuka eneoka wakweni mche? amu wafungate weokie wemuhie.

³⁴ Yesu akawawurra, Waana wa masanga ama weaika, weaikwa:

³⁵ Kake wala waidima kuwona masanga mala, na kuwuka kwa wefwie, nete teweaika nete teweaikwa.

³⁶ Amu teweidima kufwawa: amu waoka sa malaika; niwo waana wa Izuwa, wekioka waana wa kuwuka,

³⁷ Kake ti wawuka wefwie mtano Musa ewondje hena Kamuti, ekimteta Mzuri, Izuwa wa Ibrahimu, na Izuwa wa Isaak, na Izuwa wa Yakobo.

³⁸ Siye Izuwa wa wefwie, kake wawo wenye moo, amu wose wena moo hakwe.

³⁹ Wakatalwa na watama wekiteta, Mlosha, waghamba nezo.

⁴⁰ Amu tewekarawa kumbujanya kiteto.

⁴¹ Akawawurra, Wamtetaze Masiya ni Mwana wa Daudi?

⁴² Amu Daudi mwenye aghamba ghati ya kitamo cha lumbo, Mzuri akamburra Mzuri wangu, Uikae hena mkono wangu wa kuume

⁴³ Mtano nineikanigere maring’a mako si ya maghu mako.

⁴⁴ Daudi huwo amwitanga Mzuri, aokaze mwana wakwe?

⁴⁵ Wekioka wamsikija wandu wose, akawawurra waanalosha wakwe,

⁴⁶ Mukurinde hena watama, wekundie kusela na suke ndeza, wekundie kukeziwa na kichinda, na kuikaa handu ha wanga ghati ya masunagogi, na vichumbi vya wabaha ghati ya masizo:

⁴⁷ wejimija nyumba ja wache wefwiwe ni wome, na hena ukeleki waomba muno: niwo weneingwa kuchiliwa kubaha.