Luka 2 - Sumu Yedi ya Isa Masiya 1906 Kitamo 1897 Malumbo 1905

¹ Ikaoka misi ila, kiteto kikafuma ha Kaisari Augusto, ti masanga mose matamwe.

² Na lutamo ulu lwa kuwoka luokie Kirenio ekinatorie Shami.

³ Wakagura zia kutonga wose kuretamwa, mundu ose na kaa yakwe.

⁴ Yusuf naye akafuma Nazareti, kiongo cha Galilaya, akakwea isanga la Uyahudi, kutonga kiongo cha Daudi, kiitangwa Betlehemu, amu eokie mundu wa nyumba na mbare ya Daudi,

⁵ akutame hamwe na Maryamu eokie ekimwowoa, ekioka eemec.

⁶ Ikaoka wekiikaa kula, misi yakwe ya kuwona ikafishwa;

⁷ Akawona mwana wakwe mbele, akamchunga na suke ja kingerengere, akamgera ghati ya iboho la kirigha, amu teweokie na handu ghati ya nyumba ya wagheni.

⁸ Na warisha weoho isanga lila, weikee ishighati, wekirinda ifio lawo hena lukamba, magheri ma kio.

⁹ Yoa, malaika wa Mzuri akawafumia, ubaha wa Mzuri ukawawaiya; wakaingiwa ni fole muno.

¹⁰ Malaika akawawurra, Musiondoke, yoeni, namuetie mburi yedi ya luizihirwo lubaha, lunewafikia wandu wose;

¹¹ amu awonwa henyu yoo mkija, niye Masihi Mzuri, ghati ya kiongo cha Daudi.

¹² Na luwano lwenyu ni ulu; munembona mwana echungiwe na suke ja kingerengere, eyejwe ghati ya iboho la kirigha.

¹³ Turu na turu wakaoka na malaika weingi wa lweriri lwa wanga, wekimwisisa Izuwa, wekiteta,

¹⁴ Ubaha hena Izuwa wanga, Luworo masangeni hena wandu wamwizihira.

¹⁵ Ikaoka, wekinawafumie malaika wekitonga wanga, warisha wakawurrana, Tutonge na uswi mtano Betlehemu, tureyoa kiteto iki cheokie, Mzuri atutindia.

¹⁶ Wakasara, wakambona Maryamu na Yusufu, na mwana eyejwe ghati ya iboho la kirigha.

¹⁷ Wekinawone, wakawalia mburi ya kiteto wawurrwa wanga ya mwana uu.

¹⁸ Wose wasikia wakarighiwa hena vila wawurrwa na warisha.

¹⁹ Kake Maryamu akavigura viteto ivi vyose, akavigheshijia ngoroni.

²⁰ Warisha wakahunduka wekimwisisa na wekimwerewa Izuwa hena vindu vyose wevisikie, weviwona, sandu wewurrirwe.

²¹ Na ikinafike misi minane ya kutawana mwana, izina lakwe akaitangwa Yesu, lila lighambiwe ni malaika esimeemejwa.

²² Na misi ya kuzerrijwa kwawo, hena kiteto cha Musa, ikinafike, wakamwete Yerusalemi, wamng’olie Mzuri,

²³ (sandu itamiwe ghati ya kiteto cha Mzuri, Mwana ose wa kiume mbele aitangwe mshenete ha Mzuri;)

²⁴ wareng’ola itasi, sandu itetiwe ghati ya kiteto cha Mzuri, mabeta meri, kana vidongo viri vya vihunguru.

²⁵ Yoa, heokie na mundu Yerusalemi, izina lakwe Simeoni, na mundu uu wedi, mkunda Izuwa, ekiinda lughenjo lwa Israeli, Ngoma Mshenete ikaoka wanga yakwe.

²⁶ Naye etindiwe ni Ngoma Mshenete, ti tefwaye esimembona ini Masihi wa Mzuri.

²⁷ Akaza hekaluni hena Ngoma; na wambona wakwe wekinamwete mwana Yesu, wamketie sa miaghanyiwe na kiteto,

²⁸ ye akamwuhia mikononi, akamwisisa Izuwa, akateta,

²⁹ Ee Mzuri, ingeriaha umshige muzoro wako Sandu ughambie, nitonge na kiboha.

³⁰ Amu meso mangu meluwonie lukio lwako,

³¹ Uluarehe wushoni ha wandu wose;

³² Changaji cha kuangaja mbare, Na Kirumi cha wandu wako Israeli.

³³ Wakarighiwa wawee na mee hena ama metetiwe wanga yakwe.

³⁴ Simeoni akawatasia, akamburra Maryamu mee, Yoa, uu awikwa, weingi wagwe na waimuke ghati ya Waisraeli, aoke luwano lutetiwa.

³⁵ (Nawe mwenye muhandi unekuingia ngoroni) nesa makusaro ma ngoro nyiingi majughuke.

³⁶ Heokie na Hana mroti mche, mwana wa Fanueli, wa mbare ya Asher, naye eokie mcheku wa misi miingi, na ekinaoke mbora eokie na mume miaka fungate.

³⁷ Naye tena mume, wa sa miaka makumi manane na minne, esiwuke hekaluni, ekimwomba Izuwa hena kuchunga na kuomba kio na hemusi.

³⁸ Ekifumiria naye magheri mala akamwinga haika Izuwa, akaghamba mburi yakwe hena wose weokie wekiinda lukombola ghati ya Yerusalemi.

³⁹ Na wekinafishe vindu vyose viwawe hena kiteto cha Mzuri, wakahunduka Galilaya, ha kiongo chawo cha Nazareti.

⁴⁰ Mwana ula akaeha, akaongejeka zinya ekiizujwa kucha; mvono wakwe Izuwa ukaoka wanga yakwe.

⁴¹ Na mwaka ose wambona wakwe wetonga Yerusalemi, musi mbaha wa Pasaka.

⁴² Na ekinafishe miaka ikumi na miri, wakakwea hena miketiwe ya musi mbaha;

⁴³ na misi yawo ikinafike, wekihunduka, ula mwana Yesu akaikaa nyuma Yerusalemi; wambona wakwe wesitisiwe;

⁴⁴ kake wekigheshijia ti eoho kimwe na siri yawo, wakatonga mitongie ya musi mwe, wakamwenda ghati ya mbare yawo na waghenji wawo,

⁴⁵ wasimbone; wakahunduka Yerusalemi wekimwenda.

⁴⁶ Ikaoka kutera kwa misi mitatu, wakambona hekaluni ekiikaa ghati ya walosha, ekiwasikija, ekiwawujanya.

⁴⁷ Wakarighiwa muno wose wemsikie hena kucha kwakwe na kutalua kwakwe.

⁴⁸ Na wekinambone wakarighiwa muno: mee akamburra, Mwana wangu, nikini watuketa huwo? yoa, waweo na mi twakuenda na lusaro.

⁴⁹ Akawawurra, Nini kunienda? tomutisiwe ti yaniwe kuoka ghati ya ndima ya Apa wangu?

⁵⁰ Nawo tewetwarije kiteto kila ekiteta nawo.

⁵¹ Akasea nawo, akaza Nazareti, akakugera si yawo. Mee akavigura viteto ivi vyose ngoroni hakwe.

⁵² Yesu akaneta hena kucha na hena kizomba, na hena mvono ha Izuwa na ha wandu.