Luka 19 - Sumu Yedi ya Isa Masiya 1906 Kitamo 1897 Malumbo 1905

¹ Akaingia Yeriko, akaoka ekivetia.

² Heokie na mundu eitangwe izina lakwe Zakayo, mbaha wa wauhia‐lushango, naye mmasi.

³ Akaenda ambone Yesu, ni mundu ani; asiidime amu ya wandu kuoka weingi, amu mwenye eokie mundu mfuhi.

⁴ Akarongora ekisara, akakwea wanga ya mkuu ambone; amu ekundie kuvetia nzia ila.

⁵ Na ekinafike hala, Yesu akayoa wanga, akambona, akamburra, Zakayo, sea wangu; amu yoo yaniwe kuikaa nyumbeni hako.

⁶ Akasea wangu akamtigha hena kuizihirwa.

⁷ Na wekinawone wakanunuwikia wose wekiteta, Aingia kusowoka hakwe mundu mwenye ng’oki.

⁸ Zakayo akaimuka, akamburra, Mzuri, mondo ma mali mangu, Mzuri, nawainga wakiwa: na kwakicha namlinganye mundu kiteto huwo, Namhunduia kandu kaanne.

⁹ Yesu akamburra, Yoo lukio lwaza nyumbeni kunu, ekioka naye mwana wa Ibrahimu.

¹⁰ Amu Mwana wa Adamu ezie aende akije kila kitekie.

¹¹ Wekisikia ama akaongeja akateta mfwanano, amu asongeria Yerusalemi, nawo wakaghhshijia chwii ufumwa wa Izuwa unewonwa.

¹² Huwo akaghamba, Mundu mbaha mwe ezokie kutonga isanga la hae, akuuhie ufumwa, na kuhunduka.

¹³ Akawaitanga wazoro wakwe ikumi, akawainga mina ikumi ya fetha, akawawurra, Areheni zora mtano nineikanihunduke.

¹⁴ Manoti wakamshishirwa, wakatuma wasu kumratera, wekiteta, Totukundie uu aitorie wanga yetu.

¹⁵ Ikaoka ekinaoke euha ufumwa akahunduka, akaaghanya waitangwe hakwe wazoro wala ewaingie fetha, awone kutisiwa mbucha jawo ja zora.

¹⁶ Wa kuwoka akaza akateta, Mzuri mina yako yabigha mbucha mina ikumi.

¹⁷ Akamburra, Kyedi, Ee muzoro wedi, amu ya kuoka wa lwitikijo hena kindu kidongo, uoke na zinya wanga ya viongo ikumi.

¹⁸ Akaza wa keri, ekiteta, Mina yako, Mzuri, yabigha mbucha mina sano.

¹⁹ Akamburra naye, Uoke nawe wanga ya viongo visano.

²⁰ Ungi akaza akateta, Mzuri, yoa mina yako ii, niokie nayo igeriwe na kidame:

²¹ amu nikuondoke hena kuoka we mundu udindie, wauha kila usikigera, wafindika kila usikihanda.

²² Amburra, Hena itumbu lako ninekuchilia, muzoro mbiwi. Wanitisiwe mi ni mundu nidindie, nikiuha kila nisikigera, nifindika kila nisikihandie;

²³ nini tougera fetha yangu hena nyumba ya fetha, nikiza niiuhe na mbucha yakwe? Akawawurra wala weimuke afuhi,

²⁴ Muhieni mina yakwe mwe, mremwinge mwenye mina ikumi.

²⁵ (Wakamburra, Mzuri, ena mina ikumi)

²⁶ Namburra unywi, Ose ena mali eneingwa; naye esina, na mala ena eneuhiwa.

²⁷ Kake wala wazo wangu wesikundie nitorie wanga yawo, waeteni uko, muwakome msongorana wangu.

²⁸ Naye ekiidiwa kughamba ivi, akatonga, ekikwea kutonga Yerusalemi.

²⁹ Ikaoka ekinasongerie Betfage na Betania hena nduwi iitangwe ya Zeituni, akatuma waanalosha wakwe weri,

³⁰ ekighamba, Tongeni mtano kiongo kioho msongorana wenyu; na mukiingia munewona mwana wa njoe achungiwe, esimekwewa ni mundu; mchungueni mumwete.

³¹ Na mundu ekimbujanya unywi, Nini kumchungua? ni huwo muneghamba, Mzuri emkundie.

³² Wala wetumiwe wakatonga, wakawona sandu ewawurrie.

³³ Nawo wekioka wekimchungua mwana njoe, wenye wakawawurra, Mwamchunguyia kini mwana njoe uu?

³⁴ Wakaghamba, Mzuri emkundie.

³⁵ Wakamwetie Yesu: wakatandika suke jawo wanga ya mwana njoe, wakamkweja Yesu.

³⁶ Naye ekinaoke ekitonga wakaala suke jawo nzieni.

³⁷ Na ekinaoke ekisongeria, ghati ya kusea kwa nduwi ya Zeituni, matorano mose ma waanalosha wakawoka kuizihirwa na kumwisisisa Izuwa hena ighonda ibaha hena vindu vibaha vyose weviwonie,

³⁸ wekiteta, Etasiwe Mfumwa eza hena izina la Mzuri: luworo wanga, na uwedi wanga ya vyose.

³⁹ Wakamburra wandu Wafarisayo ghati ya matorano, Mlosha, uwabohie waanalosha wako.

⁴⁰ Akatalwa akaghamba, Namburra, wekihuja awa, mabwe meneloza.

⁴¹ Naye ekinasongeria, akakiwona kiongo,

⁴² akakiiyia, ekiteta, Kwakicha watisiwe mtano na we musi uu vindu vya luworo! kake ingeriaha vyawiswa mesoni hako.

⁴³ Amu misi inekuzia, maring’a mako wenekawakujengee lusarigho, wenekujunguluka, wenekuchunga mbai jose;

⁴⁴ Wenekughusha si, na waana wako ndeni hako; wasikushigie ibwe wanga ya ibwe; amu toutisiwe magheri ma kuyowa kwako.

⁴⁵ Akaingia hekaluni akawoka kuwang’ola wetaghi;

⁴⁶ ekiwawurra, Itamiwe, nyumba yangu ineoka nyumba ya kuomba; na unywi muiosha mbango ya wasoki.

⁴⁷ Akaoka ekilosha misi yose hekaluni; wakara wabaha, na watama, wakaenda wamteshe, nawo wabaha wa wandu:

⁴⁸ wasiwone kiteto cha kumwarehia, amu wandu wose weokie wegurane naye, wekimsikija.