Luka 18 - Sumu Yedi ya Isa Masiya 1906 Kitamo 1897 Malumbo 1905

¹ Akawawurra mfwanano, iwaweze kuomba misi yose, wasiremwe:

² akateta, Heokie na mchili ghati ya kiongo kimwe, temwondoka Izuwa, nete temyoa mundu.

³ Heokie na mche efwiwe mume ghati ya kiongo kila; naye akaza hakwe, ekiteta, Unichilie na mzo wangu.

⁴ Magheri makwe tekundie, ikuade akaghamba ngoroni hakwe, Nikioka simwondoka Izuwa, nete simyoa mundu;

⁵ kake hena mche uu kunirema, ninemchilia, esinirishe wukiwa na kunizia.

⁶ Akaghamba Mzuri, Sikieni mchili uu mbiwi atetawo.

⁷ Na Izuwa tenewaihia lawi wasawurwa wakwe wemwiyia hemusi na kio, naye mgumiria hawo?

⁸ Namburra unywi enewaihia lawi wangu wangu. Kake Mwana wa Adamu ekiza, enewona luitikijo masangeni?

⁹ Akawawurra mfwanano uu wala wekugheshijia ngoroni kuoka wedi, wekiwadaa wengi.

¹⁰ Wandu weri wekwee hekaluni kuomba; mwe Mfarisayo, wa keri mwuhia‐lushango.

¹¹ Mfarisayo akaimuka, akaomba huwo mwenye, Izuwa, nakuinga haika amu mi si sa wandu wengi, wasoki, wawiwi, washindi, nete si sa mwuhia‐lushango uu.

¹² Nichunga kando keri hena juma; naiha itasi ngata ya ikumi ya mali mangu mose.

¹³ Naye mwuhia‐lushango akaimuka hae, asikunde mtano kuwushija meso makwe wanga; kake akakubigha mbafu, ekiteta, Ee Izuwa, unisarie mi mwenye ng’oki.

¹⁴ Namburra unywi, Uu eseie nyumbeni hakwe mwenye luisiso kukela ula; amu ose ekukweja enesejwa; naye ekuseja enekwejwa.

¹⁵ Wakawaete waana wadongo hakwe, awakuware, waanalosha wekinawone wakawabohia.

¹⁶ Kake Yesu akawaitanga hakwe ekiteta, Washigeni waana waze hangu, nete usiwaswije; amu weokie sa awa ufumwa wa Izuwa ni wawo.

¹⁷ Amin namburra, Esikunde nfumwa wa Izuwa sa mwana mdongo, teingia uko.

¹⁸ Mundu mwe mbaha akambujanya ekiteta, Mlosha wedi, niareheze niuhodje moo wa tendarasi?

¹⁹ Yesu akamburra, Nini wateta mi wedi? Tehena wedi, nde mwe, niye Izuwa.

²⁰ Wavitisiwa viteto, Usishinde, usikome, usihiwe, usighamba maongo, uwagurie nganyi waweo na mamako.

²¹ Akaghamba, Ivi vyose nivigurie too uwana wangu.

²² Ekinasikie Yesu akamburra, Kiteto kimwe chakuduhukiawa: uvitaghe vyose uvina, ureghawie wakiwa; nawe uneoka na mali wanga; uzewa uniratere.

²³ Naye ekinavisikie ivi akaingiwa ni wukiwa wingi, amu eokie mmasi.

²⁴ Naye Yesu ekimbona akaghamba, Hena wukiwa ani wenye mali weneingia ufumwa wa Izuwa!

²⁵ Amu kianguhe ngamela kuvetia iworo la sindano, kukela mmasi kuingia ufumwa wa Izuwa.

²⁶ Wakaghamba wesikie, Nianiwa aidima kukijwa?

²⁷ Akaghamba, Kila kisiidimike hena wandu chaidimika ha Izuwa.

²⁸ Aghamba Petro, Yoa, uswi twavishiga vyetu, twakuratera.

²⁹ Akawawurra, Amin namburra unywi, Tehena mundu eshiga nyumba, kana mche, kana wandwawo, kana wambona, kana waana, hena lwa ufumwa wa Izuwa,

³⁰ esiwonawa kando keingi ghati ya magheri ama, na ghati ya magheri meneza moo wa tendarasi.

³¹ Akawauha wala ikumi na weri, akawawurra, Yoeni, twakwea mtano Yerusalemi, navyo vinefishwa vyose Mwana wa Adamu evitamiwe ni waroti.

³² Amu eneng’olwa hena Mbare, enesolwa, enelinganywa, enetufiwa mate;

³³ nawo wenembigha, wenemkoma; mtano musi wa katatu enewuka.

³⁴ Nawo tewetwarije ivi mtano kadongo, kiteto iki kikaoka kiwiswe hawo, nete tewemaije vila vitetwe.

³⁵ Ikaoka ekinasongeria Yeriko, heokie na ebajikemeso eikee mbai ya nzia ekiomba;

³⁶ ekinasikie matorano wekivetia, akawujanya mburi, Hena kini?

³⁷ Wakamlia ti Ni Yesu Mnazareti avetia.

³⁸ Akaloza ekiteta, Yesu, Mwana wa Daudi, unisarie.

³⁹ Na wala werongorie wahambohia, nesa ahuje: kake ye akaneta muno kuloza, Mwana wa Daudi, unisarie.

⁴⁰ Akaimuka Yesu akaaghanya aetwe hakwe: naye ekinasongeria akambujanya, Wanikunda nikuarehieze?

⁴¹ Akaghamba, Mzuri, niwone.

⁴² Yesu akamburra, Waingwa kuwona: luitikijo lwako lwakuhodja.

⁴³ Chwii akawona, akamratera ekimwisisa Izuwa, na wandu wose wekinawone wakamwisisa Izuwa.