Luka 17 - Sumu Yedi ya Isa Masiya 1906 Kitamo 1897 Malumbo 1905

¹ Akawawurra waanalosha wakwe. Teviidimika vindu vya kutekwisha visize: kake wukiwa wakwe eviete.

² Keba hakwe, ibwe la kushaghia kuchungwa singoni hakwe naye kutaghwa ndiweni, kukela kumtekwisha mwe awa wadongo.

³ Kurindeni; mundwenyu ekitekwa, mtetee; ekichwa muti, mshigie.

⁴ Na ekitekwa kandu kafungate musi mwe, na kandu kafungate ekihunduka hako, ekiteta, Nachwa muti; yakuwe kumshigia.

⁵ Wasu wakamburra Mzuri, Utunetijie luitikijo.

⁶ Akaghamba Mzuri, Mukioka na luitikijo sa ndembe ya kyardali muneuwurra mforsadi uu, Ng’oleka, urehandwa ndiweni; ukimsikia.

⁷ Kake niani wenyu, ekioka na muzoro ekiima, kana ekirisha maghonji, enemburra, ekiingia ekifuma mtemeni, Izoo chwi urela kidjo?

⁸ Asimburre, Uniarehie kidjo nile; ukuchunge uniinde mtano nikiidiwa kula na kunywa; ikuade unela na unenywa mwenye?

⁹ Ze? amwinga awahache muzoro ula, hena kuareha vila eviwurrwa?

¹⁰ Na huwo unywi muneikamuidiwe kuareha vyose muviwurrwa, teteni, Wazoro wesiwe uswi; vila vituwe kuareha, nivyo tuviarehe.

¹¹ Ikaoka wekinaoke nzieni kutonga Yerusalemi, evetie ghati ya Samaria na Galilaya.

¹² Ekinaingie kiongo kimwe, wakamtorana wandu ikumi wenye kusumura, weimuke hae,

¹³ nawo wakawushija ighonda lawo wekiteta, Yesu Mzuri, utusarie.

¹⁴ Ekinawawone akawawurra, Tongeni, murekuwonyanya hena wakara. Ikaoka ghati ya kutonga kwawo wakazerrika.

¹⁵ Mwe wawo ekiwona ti ahoa, akahunduka akamwisia Izuwa hena ighonda ibaha;

¹⁶ akagwabu maghuni hakwe, ekimwinga haika: naye eokie Msamaria.

¹⁷ Akatalwa Yesu akaghamba, Si wose ikumi wezerrika?

¹⁸ Wala kenda weohi? Tewewonwa wehunduke kumwinga Izuwa luisiso lwakwe, nde mugheni uu.

¹⁹ Akamburra, Wuka, tonga hako; luitikijo lwako lwakuhodja.

²⁰ Akawujanywa ni Wafarisayo, Ufumwa wa Izuwa waza rini? Akatalwa akaghamba, Ufumwa wa Izuwa touza hena kuwonwa;

²¹ nete teweneghamba, Yoa aha! kana Hala! amu yoeni, ufumwa wa Izuwa uoho ndeni henyu.

²² Akawawurra waanalosha, Misi ineza, muneikamukunde kuwona mwe wa misi ya Mwana wa Adamu, nete tomuneuwona.

²³ Wenemburra, Yoa aha! Yoa hala! musitonge nete musiratere.

²⁴ Amu sandu kiremera kibigha mbai mwe ya wanga, ikiwaa mtano mbai ingi ya wanga, ni huwo Mwana wa Adamu eneoka musi wakwe.

²⁵ Kake kuwoka yambe kunyamarwa viingi, na kusuwa ni irika ili.

²⁶ Na sandu iokie misi ya Nuhu, ni huwo ineoka misi ya Mwana wa Adamu.

²⁷ Wala wanywa, weaika, weaikwa, mtano musi ekinaingie Nuhu ghati ya safina, ikaza mlombia, ikawakoma wose.

²⁸ Huwowa viokie misi ya Lot: wala, wanywa, wazora, watagha, wahanda, wajenga:

²⁹ na musi ula Lot ekinafume Sodoma, ikabigha moto na kibiriti wanga, ikawakoma wose.

³⁰ Huwo ineoka musi eneikaajughuwe Mwana wa Adamu.

³¹ Na musi ula, ula eoho ghuni, na vindu vyakwe nyumbeni, asisee kuviuha; naye eoho mtemeni huwo asihunduke nyuma.

³² Mkumbukeni mche wakwe Lot.

³³ Mundu ekienda kukukija moo wakwe, eneutesha, na mundu ekiutesha eneukija.

³⁴ Namburra unywi, Kio kila weneoka weri wui wumwe: mwe eneuhwa, wa keri eneshigwa.

^35-36 Wache weri weneoka wekishaga hamwe; mwe eneuhwa, wa keri eneshigwa.

³⁷ Wekitalwa wakamburra, Iohi, Mzuri? Akawawurra, Handu kimba kioho, niho na ndei jinewunganyika.