Luka 16 - Sumu Yedi ya Isa Masiya 1906 Kitamo 1897 Malumbo 1905

¹ Akawawurra waanalosha wakwe, Heokie na mundu mmasi, eokie na kirote; uu akalinganywa hakwe, ti ezarazara mali makwe.

² Akamwitanga akamburra, Nikini iki nikisikia wanga yako? Ng’ola lutaro lwa urote wako, amu touidimawa kuoka kirote.

³ Kirote ula akaghamba ngoroni, Niareheze amu mzuri wangu aniwushijia urote? Siidima kuima; nawona soni kuomba.

⁴ Naidiwa kutisiwa ninearehaze, nesa, nineikaniwushijwe ghati ya urote wangu, wanitighe nyumbeni hawo.

⁵ Akawaitanga wasile wa mzuri wakwe mundu ose, akamburra wa kuwoka, Uawa kini na mzuri wangu?

⁶ Akaghamba, Vighesho ighana vya mafuta. Akamburra, Uha karatasi yako, ikaa si utame makumi masano.

⁷ Ekiidiwa akamburra ungi, Na we uawa kini? Akaghamba, Vighesho ighana vya ngano. Akamburra, Uha karatasi yako utame makumaane.

⁸ Mzuri wakwe akamwisisa kirote kila wa kucha: amu waana wa magheri ama wechee kukela waana wa kyangaji hena irika lawo.

⁹ Nami namburra unywi, Mukuarehie wambuya hena Mamona ma uwiwi, nesa meneikamaduhuke wamutighe unywi ghati ya kaa ja tendarasi.

¹⁰ Ula emwitikiji hena kindu kidongo; mwitikiji naye kibaha; na ula mbiwi hena kindu kidongo, mbiwi naye hena kibaha.

¹¹ Huwo musioke waitikiji hena mamona ma uwiwi, niani enemwinga kindu chedi?

¹² Na musioke waitikiji hena kindu cha wandu, niani enemwinga kila chenyu?

¹³ Tehena muzoro aidima kuwatumikia wazuri weri; amu enemshishirwa mwe, ekimkunda wa keri; kana enemgura mwe, ekimdaa wa keri: tomuidima kumtumikia Izuwa na Mamona.

¹⁴ Wakavisikia ivi vyose Wafarisayo, weokie wekunda mali, wakamsola.

¹⁵ Akawawurra, Unywi mukuareha wenye uwedi msongorana wa wandu; kake Izuwa atisiwa ngoro jenyu: amu kila keba ghati ya wandu ni ushishiro msongorana wa Izuwa.

¹⁶ Kiteto na waroti mtano Yohana; too magheri mala Sumu Yedi ya ufumwa wa Izuwa yatindwa, na mundu ose euingia hena zinya.

¹⁷ Kake ianguhe wanga na isanga kuvetia, kukela kadongo ka Kiteto kugwa.

¹⁸ Ose emshiga mche wakwe ekiaika ungi ashinda; na ula emwaika ula eshigiwe ni mume ashinda.

¹⁹ Heokie na mundu mmasi, edokie bandera na bafuta, ekiizihirwa misi yose na uwedi.

²⁰ Na mkiwa mwe, izina lakwe Lazaro, akaoka agerwa mbengeni hakwe, mwenye vionda,

²¹ ekilangwa kuighuta navyo vigwie mezeni hakwe mmasi; mtano nguro najo jaza jisone vionda vyakwe.

²² Ikaoka, mkiwa akafwa, akatikwa ni malaika mbafuni hakwe Ibrahimu. Akafwa na mmasi ula, akajikwa.

²³ Na ghati ya ahera akawushija meso makwe, ekioka ghati ya kuwawiwa, akambona Ibrahimu hae, na Lazaro mbafuni hakwe.

²⁴ Akaiya akaghamba, Apa Ibrahimu, unisarie, umtume Lazaro, adunye mtoo wa kichaa chakwe na mbombe, anidofijie lumi lwangu; amu nawawiwa ghati ya moto uu.

²⁵ Akaghamba Ibrahimu, Mwana wangu, kumbuka, uingiwe vyedi vyako ghati ya kukia kwako, na Lazaro huwo viwiwi; kake ingeriaha ye asowoka, na we wawawiwa.

²⁶ Na wanga ya ivi ghati hetu uswi na unywi hena iwongo ibaha ligeriwe, wasiidime wala wekundie kufuma aha kuza henyu, nete wa uko wasikele hetu.

²⁷ Akaghamba, Nakuomba, apa, umtume nyumbeni ha apa wangu;

²⁸ amu nina wandwetu wasano: awang’olie mburi, wasize nawo handu aha ha kuwawiwa.

²⁹ Ibrahimu akateta, Wena Musa na waroti, wawasikije woo.

³⁰ Akaghamba, Hai, apa Ibrahimu; kake ekitonga hawo mwe ghati ya wefwie, wenechwa‐muti.

³¹ Akamburra, Wesiwasikie Musi na waroti, nete mwe ghati ya wefwie ekiwuka ekiza teweneitikija.