Luka 15 - Sumu Yedi ya Isa Masiya 1906 Kitamo 1897 Malumbo 1905

¹ Na weokie wekimsongeria weuhia lushango wose, nawo wenye ng’oki, wamsikije.

² Wakanunuwikia Wafarisayo na watama, wekighamba, Uu etigha wenye ng’oki, ela nawo.

³ Akawawurra mfwanano uu, ekiteta,

⁴ Mundu ani wenyu eokie na maghonji ighana, imwe lamo likimtekia, esishige mala makumi kenda na kenda ishighati, ekilitongia lila lateka, mtano ekiliwona?

⁵ Na ekiliwona, eliwikia kituroni hakwe ekiizihirwa.

⁶ Naye ekiza hakwe, awaitanga wambuyae na walatya wakwe, awawurra, Izihirweni hamwe nami, amu naliwona igonji langu litekie.

⁷ Namburra unywi, huwo kuneoka kuizihirwa wanga hena mwenye ng’oki mwe echwamuti, kukela hena wedi makumi kenda na kenda, wesikundie kuchwa‐muti.

⁸ Kana mche ani ekioka na rupia ikumi, imwe ikimtekia, esiwasha taa, na kuhaiya nyumba, ekienda hena lunyarki, mtano ekiwona?

⁹ Na ekiiwona, ewaitanga wambuyae na walatya, ekiteta, Izihirweni hamwe nami, amu naiwona rupia ila itekie.

¹⁰ Huwo namburra unywi, kuoho kuizihirwa msongorana wa malaika wa Izuwa hena mwenye ng’oki mwe echwa muti.

¹¹ Akaghamba, Mundu mwe eokie na waana weri; mdongo wawo akamburra wawee,

¹² Apa, ununge ifungu langu la mali liniguia.

¹³ Akawaghawia mali makwe. Na kutera kwa misi si miingi mwana mdongo akawunganya vyose akazoka kutonga isanga la hae; uka akazarazara mali makwe hena kuketa viwiwi.

¹⁴ Na ekinaidiwe vyose, ikaoka nzaa mbaha isanga lila; akawoka naye kuwona wukiwa.

¹⁵ Akatonga akakuguranya na inoti mwe wa isanga lila, ula akamtuma ngondeni hakwe kurisha nguwe.

¹⁶ Akalangwa kuighuta hena makanda welie nguwe, esiingwe ni mundu.

¹⁷ Na ekikuhundukia mwenye akaghamba, Wazoro awo wa apa weighuta wekishiga kidjo, nami nakomwa ni nzaa.

¹⁸ Ninewuka, ninetonga ha apa, ninemburra, Apa, natekwa wanga ya Izuwa na msongorana wako;

¹⁹ tekiniwe kuitangwa mwana wako; unioshe sa mwe wawo wazoro wako.

²⁰ Akawuka akamzia wawee; naye ekioka hae, wawee akambona, akamsaria, akasara, akamguia singoni, akamnyonyoza.

²¹ Mwana akamburra, Apa, natekwa wanga ya Izuwa na msongorana wako; tekiniwewa kuitangwa mwana wako.

²² Kake wawee akawawurra wazoro wakwe, Ng’oleni wangu suke ila yedi, mumudoke; mwingeni pete kichaeni na viratu maghuni.

²³ Eteni na ndama ibandie, mreisiza, tule tuizihirwe.

²⁴ Amu uu mwana wangu eokie atefwa, naye awuka; eokie ateteka, naye awonwa.

²⁵ Wakawoka kuizihirwa. Na mwana wakwe mbaha eokie mtemeni; naye ekiza akasongeria nyumba, akasikia ngori na vivino.

²⁶ Akamwitanga mwanake mwe, akambujanya mburi, Hena kini?

²⁷ Akamburra, mundwenyu aza; na waweo amsiza ndama ibandie, amu ya kumbona na kiboha.

²⁸ Akaregija nete tekundie kuingia; wawee akafuma akamsemba.

²⁹ Naye akatalwa akamburra wawee, Yoa miaka ii yose nakutumikia, nete kiteto chako kimwe sishigie mi; nete touniingie mi mtano kidaghina, nuzihirwe na wambuyaa wangu.

³⁰ Kake mwana wako uu, elie mali mako hamwe na wabuya, ekiidiwa kuza, wamsizia ye ndama ibandie.

³¹ Naye akamburra, Mwana wangu, we misi yose uoho hamwe nami, na vindu vyangu vyose nivyo vyako.

³² Huwo kuizihirwa na kuizihirwa kuna ngalo, amu mundwenyu uu eokie atefwa, naye akia; eokie ateteka, naye awonwa.