Luka 13 - Sumu Yedi ya Isa Masiya 1906 Kitamo 1897 Malumbo 1905

¹ Heokie na wandu magheri mala wemtindia mburi ya Wagalilaya, sakame yawo Pilato eirunganye na itasi lawo.

² Akatalua akawawurra, Mwaghamba Wagalilaya awo weokie wenye ng’oki kukela Wagalilaya wose, amu ya mawiwi ama mewagura?

³ Si huwo, namburra; kake musichwa muti, na unywi wose muneteka huwo.

⁴ Kana wala ikumi na wanane uwagwie mnara ghati ya Siloam, ukawakoma, mwaghamba awo weokie watekwa kukela wose weikee Yerusalemi?

⁵ Si huwo, namburra, kake musichwa muti, na unywi wose muneteka huwo.

⁶ Akateta mfwanano uu: Mundu mwe eokie na mtini uhandiwe ghati ya mizabibu yakwe; akaza ekienda ndunda wanga yakwe asijiwone.

⁷ Akamburra mwimi wa mizabibu, Yoa, mtano miaka mitatu naza nikienda ndunda wanga ya mtini uu, nisiwone: Uuteme; nini unyamara teri huwo.

⁸ Naye akatalua, akamburra, Mzuri, uushige na mwaka uu, mtano niuforie mbai na mbai, nigere kitondo:

⁹ na ukigera ndunda ikwade, chedi; kwakicha hai, nineutema.

¹⁰ Akaoka ekilosha ghati ya sunagogi musi mwe wa Sabato.

¹¹ Heokie na mche mwenye luhungu lwa wunana miaka ikumi na minane, naye eokie ekikukoda, asiidime kukurongesha.

¹² Na Yesu ekinambone akamwitanga, akamburra, We mche, wachunguwa hena wunana wako.

¹³ Akamgera mkono; chwi akarongeka, akamwisisa Izuwa.

¹⁴ Akatalwa mbaha wa sunagogi ekishishirwa amu ya Yesu kuhodja musi wa sabato, akawawurra matorano, Hena misi mitandatu ya ndima imbe kuhira; ghati ya ii izoni muhodjwe, kake musi wa sabato musize.

¹⁵ Kake Mzuri akatalwa akaghamba, Unywi wakeleki, mundu ose wenyu techungua ng’ombe yakwe musi wa sabato, kutonga nayo aiinge mbombe?

¹⁶ Na uu, eokie mwana wa Ibrahimu, Shetani emchungie ingeriaha miaka ikumi na minane, teimbe kuchunguwa kichungo iki musi wa Sabato?

¹⁷ Naye ekioka evighamba ivi wose weteta naye wakagurwa ni soni; matorano mose wakaizihirwa hena vindu vyose vya ubaha eviarehe.

¹⁸ Akateta, Ufumwa wa Izuwa wafwanana na kini? niufwananishe na kini?

¹⁹ Ufwanane sa ndembe ya kyardali, mundu eiuhie, akaiwirita mtemeni hakwe, ikamea, ikaoka muti: ndeghe ja wanga jikaikaa mbagheni hakwe.

²⁰ Akaghambawa, Niufwananishe na kini ufumwa wa Izuwa?

²¹ Wafwanana na chachu, mche eiuhie, akaiwisa ghati ya vighesho vitatu vya muchu, mtano ukachachwa deng’e.

²² Akavetia ghati ya viongo na kaa ekilosha, ekizoka kutonga Yerusalemi.

²³ Mwe akamburra, Ze, Mzuri? Ni wandu wafaa wekijwa.

²⁴ Akawawurra, Mukete lunyarki kuingia hena mbenge sisiri: amu weingi, namburra unywi, weneenda kuingia, wasiidime.

²⁵ Mwenye nyumba ekinaidiwe kuwuka, na kufinga luwi, mukighamba Mzuri, Mzuri, utujughuie; naye enetalwa enemburra, Sitisiwemi, mufumiehi;

²⁶ niho munewoka kuteta, Tulie msongorana wako, tukanywa, na nzieni hetu ukalosha;

²⁷ Naye eneghamba, Namburra unywi, sitisiwemi, mufumiehi; wukeni hangu, unywi wose mwaketa uwiwi.

²⁸ Uko kuneoka kiiyo na kutafuna majegho, muneikambawone Ibrahimu, na Isaak, na Yakob, na waroti wose, ghati ya ufumwa wa Izuwa,

²⁹ na unywi mwataghwa some. Na weneza kufuma kifuma‐izuwa na kigwaizuwa, kaskazini na kusini, weneikaa ghati ya ufumwa wa Izuwa.

³⁰ Yoeni, weoho wa kuidiwika weneoka wa kuwoka, weohowa wa kuwoka weneoka wa kuidiwika.

³¹ Magheri mala wakamzia wandu Wafarisayo wekimburra, Wuka aha, utonge: amu Herode akunda kukukoma.

³² Akawawurra, Tongeni, muremburra iging’a uo, Yoa, nakinya maluhungu, nahodja wandu yoo na yawo, mtano musi wa katatu neniidiwika.

³³ Kake iniwe kutonga yoo, na yawo, na mtondo, amu teidimike mroti kuteka some ya Yerusalemi.

³⁴ Ee Yerusalemi, Yerusalemi, mwenye kuwakoma waroti, na kuwagera mabwe wala wetumwe hako! kandu ako nikundie kuwunganya waana wako, sa nguku iwunganya isio si ya mazau makwe, nete tomukundie.

³⁵ Yoeni, mwashigiwe nyumba yenyu nduhu: nami namburra, Tomuneniwonawa mtano muneikamughambe, Mtasiwa ula eza hena izina la Mzuri.