Luka 12 - Sumu Yedi ya Isa Masiya 1906 Kitamo 1897 Malumbo 1905

¹ Na matorano maghana ighana wekinawunganyike, mtano kuwatana, akawoka kuwawurra waanalosha wakwe kuwoka, Mukurinde ghati ya chachu la Wafarisayo, nilo ukeleki,

² Amu tehena kifinikirwa kikisikajughuwe ikwade, nete kiwisiwe kisikatisiwike ikwade.

³ Huwo na viteto vyose muviteta kijeni vinesikiwa ghati ya kyangaji; navyo muviweweda nyumbeni vinechilika wanga ya ghu.

⁴ Namburra unywi, wambuyaa, Musiondoke wala wakoma muri, wekiidiwa wesina kitetowa cha kuketa.

⁵ Kake ninembondja unywi niani munemwondoka. Mwondokeni ula mwenye zinya ja kukoma na kutagha ghati ya jehannum; kididi namburra, Mwondokeni uu.

⁶ Wudeghe wusano towutaghika pesa mbiri? na mtano kamwe kajo tekeiwaika msongorana wakwe Izuwa:

⁷ Kake na nyui ja mitwi yenyu jitarika jose. Musiondoke, ni keba unywi kukela wudeghe wuingi.

⁸ Namburra unywi, ose eneniitikija mi msongorana wa wandu, Mwana wa Adamu enemuitikija ula msongorana wa malaika wa Izuwa:

⁹ naye enikana msongorana wa wandu, enekanwa msongorana wa malaika wa Izuwa.

¹⁰ Mtano ose eneghamba kiteto wanga ya Mwana wa Adamu, eneshigiwa; kake ula erigha Ngoma Mshenete, teshigiwaye.

¹¹ Na weneikawemuete ghati ya masunagogi na msongorana wa wandu wabaha na wenye zinya, musikurishe wukiwa kindu ani kana nikini munetalwa, kana kuteta;

¹² amu Ngoma Mshenete enemulosha magheri mala vimbevyo kuteta.

¹³ Mundu mwe ghati ya matorano akamburra, Mlosha, umburre mundwetu anighawie wuhodji.

¹⁴ Akamburra, Mundu we, niani eniwikie mi mchili kana mghawi henyu?

¹⁵ Akawawurra, Yoeni mukurinde ghati ya kulangwa kwose, amu si hena wiingi wa mundu moo wakwe, hena mali ena.

¹⁶ Akawawurra mfwanano, ekiteta, Heokie na mundu, mmasi; ngonde yakwe ikagera muno.

¹⁷ Akakusara ngoroni, akateta, Niketeze, amu sina ha kuwunganya mafindiko mangu?

¹⁸ Akaghamba, Mineketa huwo, ninebaa kilalo, ninejenga kibaha, ninewunganyikia hoo mafindiko mangu mose, na mali mangu.

¹⁹ Nineiwurra ngoro yangu, Ngoro we, una mali meingi mewisiwe ma miaka miingi: sowoka, ule, unywe, uizihirwe.

²⁰ Izuwa akamburra, Utomode we, kio iki ngoro yako yaendwa; najo ujiwisie jineoka ja mundu ani?

²¹ Ni huwo ula ekuwisia mali, esiokie mwenye mali hakwe Izuwa.

²² Akawawurra waanalosha wakwe, Amu ii namburra, Musikurishe wukiwa hena kukia kwenyu, munela kini, nete hena muri wenyu, munedoka kini.

²³ Amu kukia ni kubaha kukela kidjo na muri kukela suke.

²⁴ Yoeni malukuru, tewehanda, nete tewefindika; tewena ha kuwisa, nete kilalo: naye Izuwa awarisha. Na unywi munetaze kuoka keba kukela ndeghe?

²⁵ Niani wenyu aidima ekirisha wukiwa kunetija wueza wakwe mkono mwe?

²⁶ Na musiidime kindu kidongo sa iki, nini kukurishia wukiwa hena vingi.

²⁷ Yoeni viwaro vimeawo; tewehira ndima nete tewefuma: nami namburra unywi, mtano Suleman hena kirumi chakwe chose tedokiwe sa kimwe chawo.

²⁸ Na mani ma ngondoni, meoho yoo, na yawo megerwa motoni, Izuwa ekimahamba huwo, teneta kumuhamba unywi, lwa luitikijo ludongo?

²⁹ Huwo musiende unywi mule kini, munywe kini, nete musioke na ngoro ja kubangabanga.

³⁰ Amu ama mose meendwa ni mbare ja masanga, naye waweo wenyu etisiwe, ti muvikundie ivi.

³¹ Kake endeni unywi ufumwa wakwe, huwo munenetijiwa ivi.

³² Musiondoke, unywi ifio idongo: amu Waweo wenyu aizihirwa kumuinga unywi ufumwa.

³³ Muvitaghe vila muvina, mung’ole itasi; mukuarehie vikuchu visisakaa, mali mesiduhuka, wanga, muhiwi esisongeriaho, nete ndondoworo jisinyamara.

³⁴ Amu handu mali menyu meoko, niho ngoro jenyu jineoka.

³⁵ Huwo muoke mchungwa vikudi na taa jikiaka,

³⁶ na unywi sa wandu wemuindie mzuri wawo eneikaawuke na ngasu ekiza ekibigha luwi wamujughuyie chwi.

³⁷ Keba wazoro wala, mzuri eza ewakicha wacheiwa. Amin namburra, enekuchunga, enewaikaja wala, eneza enewaindia.

³⁸ Naye ekiza lukamba lwa keri, mtano lukamba lwa katatu, akawakicha huwo, niwo keba.

³⁹ Kake yoeni ama, kwakicha ekitisiwa mwenye nyumba magheri ani eza muhiwi, kwakicha ekicheiwa, nete tekishiga nyumba yakwe kutumburwa.

⁴⁰ Na unywi mkuarehie; amu magheri msimagheshijie Mwana wa Adamu emaziia.

⁴¹ Petro akaghamba, Mzuri, watuwurra uswi mfwanano uu, kana na wose pia?

⁴² Akaghamba Mzuri, Nianira iokie kirote mwitikiji na echee, bwana embika wanga ya wazoro wakwe, awaghawie cha kula magheri makwe?

⁴³ Keba mzoro ula enemkicha mzuri wakwe ekiza na ekiketa huwo.

⁴⁴ Kididi namburra unywi, enemuosha mbaha wanga ya mali makwe mose.

⁴⁵ Kake mzoro ula ekighamba ngoroni hakwe, Mzuri wangu ashesha kuza; ekiwoka kuwabigha waghenji na wabora, kula, kunywa, kuengea;

⁴⁶ mzuri wa mzoro ula eneza musi esiugheshijie, na magheri esimatisiwe, enemchwachwa, enemwinga ifungu lakwe hamwe na wala wesiitikija.

⁴⁷ Naye mzoro ula etisiwe vila evikunda mzuri wakwe esimwarehie nete kuketa hena lukundo lwakwe, enebigwa muno:

⁴⁸ kake ula esitisiwe, naye eviarehe vila vimbe kubigwa, enebigwa kadongo. Amu ose eingwa vingi, hakwe viingi vineendwa, naye wemgeria viingi, hakwe weneneta kuenda.

⁴⁹ Nizie nigere moto masangeni; na ukioka ingeriaha uaka nikundie kini?

⁵⁰ Nina lubatijo kubatijwa nalo, nami niwoneze wukiwa mtano lunefika?

⁵¹ Mughamba nioho niete luworo masangeni? Si huwo, namburra, kake ni lughawo.

⁵² Amu too ingeriaha weneoka ghati ya nyumba mwe wasano weghawanyika, watatu hena weri, weri hena watatu.

⁵³ Weneghawanyika, wawee hena mwana, mwana hena wawee; mee hena mwana wa kiche, mwana wa kiche hena mee; mche hena mkwee, mkwee hena mche.

⁵⁴ Akawawurrawa matorano, Mukiwona ijumbi likikwea kigwa‐izuwa, chwi mughamba, Mvua izie; na ni huwo.

⁵⁵ Na ngungu ya kusini ikiruruma, mwaghamba, Ineoka ndughuri: na ni huwo.

⁵⁶ Unywi wakeleki, wusho wa si na wa wanga mwaidima kuwutwarija; nini tomutisiwa kutwarija magheri ama?

⁵⁷ Na nini tomuchila vyedi henyu wenye?

⁵⁸ Huwo ukitonga na mlinganya wako ha mchili, ukete lunyarki nzieni kushigiwa naye; asiwone kukutika hena njama, na njama akung’ola hena mbwange, na mbwange enekugera kichungoni.

⁵⁹ Nakuwurra, Toufuma uko, mtano waidiwa kuiha pesa ya kuidivika.