Luka 11 - Sumu Yedi ya Isa Masiya 1906 Kitamo 1897 Malumbo 1905

¹ Ikaoka, ekioho handu ekiomba, ekinaidiwe, mwanalosha wakwe mwe akamburra, Mzuri, utuloshe uswi kuomba, sa Yohana naye ewaloshie waanalosha wakwe.

² Akawawurra, Mukiomba, ghambeni, Apa, lioke ibaha izina lako.

³ Uze ufumwa wako. Kidjo chetu cha musi utuinge musi na musi.

⁴ Utushigie ng’oki jetu; amu na uswi twamshigia ose ena sile na uswi. Nete usituete kugheshwa.

⁵ Akawawurra, Niani wenyu mwenye mbuyae, enemtongia kio ghati, amburre, Ee mbuyaa, unietie mabumunda matatu;

⁶ amu mbuyaa wangu anizia ghati ya kuzoka, nete sina kindu cha kumwingia;

⁷ na ula wa nyumbeni amtalua ekighamba, Usinirishe wukiwa, luwi lwaidiwa kufingwa, na waana wangu weoho hamwe nami washinjia, siidima kuwuka nikuinge.

⁸ Namburra, Mtano kwakicha esiwuka amwinge, amu ya kuoka mbuyae wakwe, kake amu ula tena soni, enewuka, enemwinga vyose evikundia.

⁹ Nami namburra unywi, Omboni, muneingwa; endeni munewona; bigheni luwi, munejughuiwa.

¹⁰ Amu ose aomba, aingwa; ula aenda, awona; ula abigha luwi, enejughuiwa.

¹¹ Uhiwa wenyu wawee, mwana wakwe ekimuomba ibumunda, enemwinga ibwe? kana nguluma, handu ha nguluma enemwinga nyoka?

¹² kana ekimuomba iggi, enemwinga kishushe?

¹³ Huwo unywi wawiwi mukitisiwa kuwainga waana wenyu vindu vyedi, enenetaze Apa eoho wanga kuwainga wala wemwomba Ngoma Mshenete?

¹⁴ Akaoka ekikinya luhungu, luokie bubu. Ikaoka luhungu lula lukinafume, bubu akateta; matorano wakarighiwa.

¹⁵ Wengi wawo wakaghamba, Hena Beelzebul mbaha wawo maluhungu ang’ola maluhungu.

¹⁶ Wengi wekimghesha wakakunda luwano lwa wanga.

¹⁷ Naye ekitisiwa makusaro mawo akawawurra, Ufumwa wose ughawanyika ndeni yakwe ukurisha wukiwa, na nyumba ighawanyika hena nyumba yagwa.

¹⁸ Naye Shetani huwo ekighawanyika ndeni yakwe, ufumwa wakwe uneimukaze? amu unywi mughamba, nakinya maluhungu hena Beelzebul.

¹⁹ Kake mi nikikinya maluhungu hena Beelzebul, waana wenyu wamakinya hena ani? amu iyo niwo weneoka wachili wenyu.

²⁰ Kake mi nikikinya maluhungu hena kichaa cha Izuwa, ufumwa wa Izuwa umufikia.

²¹ Ena zinya mwenye nareta jakwe ekirinda kiwaza chakwe, mali makwe meikaa mashorota:

²² kake mwenye zinya ja kumkela ye eneikaeze na eneikaamlele, amsoka nareta jakwe jose ejingendiiye ekighawa vindu vyakwe.

²³ Mundu esiokie hamwe nami ni wanga yangu: naye esiwunganye hamwe nami emiza.

²⁴ Luhungu luwiwi lukimfuma mundu luvetia ghati ya handu hesina mbombe, lukienda lusowoko: lusiluwone luteta, Ninehunduka nyumbeni hangu nifumie.

²⁵ Lukiza luiwona yahaiwa yakelwakelwa.

²⁶ Chwi lutonga lutika maluhungu mafungate mawiwi kukela ye mwenye; namo meingia na meikaa hala: mtano kuidiwika kwa mundu ula kuwiwi kukela kuwoka.

²⁷ Ikaoka ekinatete ivi, mche mwe ghati ya matorano akawushija ighonda lakwe akamburra, Keba ndeni ikutikie na mawee umaamwie.

²⁸ Ye akaghamba, Ni huwo, na keba wala nawo wekisikia kiteto cha Izuwa na kukigura.

²⁹ Na matorano mekioka wembughanyikia akawoka kuteta, Irika ili ni irika iwiwi: laenda luwano; nete telineingwa luwano, lusioke luwano lwa Yunus.

³⁰ Amu sa Yunus eokie luwano hena wala wa Ninawi, ni huwo Mwana wa Adamu eneoka hena irika ili.

³¹ Mfumwa wa kiche wa kusini enewuka ghati ya wuchili na wandu wa irika ili, enewachilia; amu ezie kufuma kuidiwika kwa masanga asikie kucha kwa Sulemani, na mbaha kukela Sulemani eoho aha.

³² Wandu wa Ninawi weneimuka ghati ya wuchili na irika ili, wenelichilia: amu wechwie muti hena kutinda kwa Yunus, na mbaha kukela Yunus eoho aha.

³³ Tehena easha taa, na kuiwisa ghati ya kizembe, kana hena mbinda, kake aigera wanga ya kindu cha taa, wala weingie wawone kyangagi.

³⁴ Taa ya muri ni ijiso, na ijiso lako likioka lizerre, muri wako wose una kyangaji, kake likioka iwiwi, muri wako una kija.

³⁵ Huwo yoa, kyangaji kioho ndeni hako kisioke kija.

³⁶ Na muri wako wose ukioka na kyangaji, usioke na ifungu imwe la kija, uneoka na kyangaji pacha, sa taa ikikugera kyangaji na kuwaa kwakwe.

³⁷ Na ekinaoke ekiteta, Mfarisayo mwe emkundie ale kidjo hakwe; akaingia akaikaa si.

³⁸ Mfarisayo ekinawone akarighiwa, amu teioje mikono kuwoka esimela. Mzuri akamburra,

³⁹ Ingeriaha unywi Wafarisayo muzerrija kila kiokie some ya ndemwa na kamwanje; kake kioho ndeni henyu kiizue ikwe na uwiwi.

⁴⁰ Unywi mutomode, ula earehe cha some tearehewa cha ndeni?

⁴¹ Kake ng’oleni hena itasi vila vya ndeni, na vyose vyazerrike henyu.

⁴² Kake wukiwa wenyu Wafarisayo! amu mung’ola itasi la naana, na la mchicha, na la mbogha jose, mukishiga hae wuchili na lukundo lwakwe Izuwa: kake ivi vimbe kuareha, na vila si kuvishiga.

⁴³ Wukiwa wenyu, Wafarisayo! amu mwakunda kuikaa handu ha nganyi ghati ya masunagogi na kukeziwa kichinda.

⁴⁴ Wukiwa wenyu! amu unywi ni sa mbira jisiwonwa, wandu wejiwata wasijitisiwe.

⁴⁵ Akatalua mwe wawo waana wa wuchili, amburra, Mlosha, ukiteta ivi waturigha na uswi.

⁴⁶ Akaghamba, Na unywi waana wa wuchili, wukiwa wenyu! amu mwatikija wandu vindu visitikika, na unywi wenye tomuvikuwara vindu na kichaa chenyu kimwe.

⁴⁷ Wukiwa wenyu, amu muareha mbira ja waroti, na wawaweo wenyu wewakomie.

⁴⁸ Nihuwo muviteta vihiro vya wawawee wenyu ti muizihirwa navyo: amu wawo wewakomie, na unywi muwaarehia.

⁴⁹ Amu iyowa kucha kwa Izuwa kukaghamba, Ninewaingijia waroti na wasu, wengi wawo wenewakoma, wenewakinya;

⁵⁰ iwone kuendwa hena irika ili sakame ya waroti wose iitishwe too kuarehiwa masanga;

⁵¹ too sakame ya Habil mtano sakame ya Zakariya ekomiwe ghati na ghati ya kisiko na heshenete. Kididi, namburra unywi, ineendwa hena irika ili.

⁵² Wukiwa wenyu waana wa wuchili! amu muutikie uchunguo wa kucha, unywi wenye tomuingie, nawo weokie wekiingia muwaswije.

⁵³ Na ekinafume hala, wetama na Wafarisayo wakawoka kula ja kumteshanya muno,

⁵⁴ na kumuitara lodoo lwingi, wekimyayia, wawone kumtegha kiteto cha itumbu lakwe, nesa wawone mimulinganyijie.