Luka 10 - Sumu Yedi ya Isa Masiya 1906 Kitamo 1897 Malumbo 1905

¹ Ikuade Mzuri akasawura wengi makumi mafungate, akawatuma weri weri msongorana wa wusho wakwe kutonga kiongo chose, na handu enehatonga mwenye.

² Akawawurra, Mafindiko ni meingi, wahiri si weingiwo, amu ii muombeni Mzuri wa mafindiko, awone kuingija wahiri mafindikoni hakwe.

³ Tongeni; yoeni, namtuma unywi sa madorome ghati ya mabau.

⁴ Musitike mbinda, nete kikuchu, nete viratu, nete musimkezie mundu nzieni.

⁵ Na nyumba yose muingia kuwoka ghambeni, Luworo nyumbeni uko.

⁶ Na ekioho mwana wa luworo, luworo lwenyu lunemwikayia; kwakicha sihuwo, lunemuhunduia.

⁷ Muikae nyumbeni uko, mukila na mukinywa vya vyawo, amu muhiri ni wedi wa kuingwa awahache yakwe. Musitonge nyumba hena nyumba.

⁸ Na kiongo chose muingia, nawa wakamutigha unywi, vileni vila wamwingiiya:

⁹ muwahodje wewadjua weohoho, muwawurre, Ufumwa wa Izuwa wamusongeria unywi.

¹⁰ Na viongo vyose muviingia, wasimtigha unywi, mukifuma nzieni hakwe ghambeni,

¹¹ Mtano purughushe ghati ya kiongo chenyu yagurana na maghu metu, twamukukundia unywi, kake tisiweni ivi, ti Ufumwa wa Izuwa wamusongeria unywi.

¹² Namburra, Ineoka keba Sodoma musi ula kukela kiongo kila.

¹³ Wukiwa wako, Korazin! Wukiwa wako, Betsaida! amu vindu vila viarehike henyu, idje viarehike ghati ya Turo na Sidona, idje wechwie muti kae, wekiikaa ghati ya masambo na maifu.

¹⁴ Kake ineoka keba Turo na Sidona ghati ya kuchiliwa kukela henyu.

¹⁵ Nawe Kapernaum, unekwejwa mtano wanga? unesejwa mtano Hades.

¹⁶ Ula emusikia unywi enisikia mi: ula emudaa unywi enidaa mi: naye enidaa mi amdaa ula enitumie.

¹⁷ Wakahunduka wala makumi mafungate hena kuizihirwa, wekiteta, Mzuri, mtano maluhungu matutumikia hena izina lako.

¹⁸ Akawawurra, Nimbonie Shetani ekigwa sa kiremera kufuma wanga.

¹⁹ Namuinga unywi zinya ja kuwata nyoka na kishushe, najo zinya jose ja maring’a; nete tehena kiteto kinembinya.

²⁰ Kake amu ii musiizihirwe, amu ya maluhungu memutumikia; kake izihirweni amu ya mazina menyu kutamwa wanga.

²¹ Magheri mala akaizihirwa hena Ngoma Mshenete, Akaghamba, Nakuinga haika, Apa, Mzuri wa wanga na si, amu utewisa ivi hena wenye kucha na kutwarija, urewajughuia ngerengere: huwo, Apa, amu nihuwo kuizihira msongorana wako.

²² Vindu vyose vigerwa hangu ni Apa wangu, nete tehena mundu etisiwe Mwana niani, nde Apa, nete Apa niani, nde Mwana, naye ekundie Mwana kumjughuia.

²³ Akawagharukia waanalosha hena ngiliwata akaghamba, Keba meso meviyoa vila muviyoa unywi.

²⁴ Amu namburra, Waroti weingi na wafumwa wekundie kuviwona vila miviyoa unywi, wasiviwone, na kuvisikia vila muvisikia unywi, wasivisikie.

²⁵ Mchili mwe akaimuka ekimghesha, akateta, Mlosha, niarehe kini niuhodje moo wa tendarasi?

²⁶ Akamburra, Ghati ya Kiteto vitamiwe vindu ani?

²⁷ Wasomeze? Naye akatalua akaghamba, Mkunde Mzuri Izuwa wako, hena ngoro yako yose, na hena ngoma yoko yose, na hena zinya jako jose, na hena kucha kwako kwose; na walatya wako sa we mwenye.

²⁸ Akamburra, Watalua nezo; keta huwo, nawe unekia.

²⁹ Naye ekikunda kukuarehia uwedi akamburra Yesu, Na walatya wangu ni ani?

³⁰ Yesu akatalua akaghamba, Heokie na mundu ekisea ghati ya Yerusalemi kutonga Yeriko; akagwa ghati ya wasoki wakauha suke jakwe, wakambinya, wakatonga, wakamshiga hadongo ya kufwa.

³¹ Na akasea mkara mwe turu na nzia ila, akambona, akambetia mbai.

³² Na Mlawi huwowa, ekinafike handu hala, akambona, akambetia mbai.

³³ Kake Msamaria mwe ekizoka akamzia,

³⁴ naye ekinambone, akamsaria, akamsongeria, akamchunga arata jakwe, ekigera mafuta na mawa; akamkweja wanga ya nyamao yakwe, akamwete hena nyumba ya wagheni, akamwaja.

³⁵ Na heyawo akang’ola denari mbiri, akamwinga mwenye nyumba, akaghamba, Muwaje, najo jose unejinig’olawa, nineikanihunduke ninekuiha. Wawoneze?

³⁶ Uhi wa awa watatu eokie walatya wakwe mwenye kuguyia ghati ya wasoki?

³⁷ Akaghamba, Niye emsarie. Akamburra Yesu, Tonga, nawe warehe huwo.

³⁸ Wekinaoke wekitonga akaingia kiongo kimwe, mche, izina lakwe Martha, akamtigha nyumbeni hakwe.

³⁹ Naye eokie na rumburie, eitangwa Maryamu, naye akaikaa si maghuni ha Yesu, akamsikija viteto vyakwe.

⁴⁰ Naye Martha ebighanika hena kuhira kuingi, akamzia, akaghamba, Mzuri touwona ti mundwetu anishigia ndima mwenye?

⁴¹ Mburre anighenje. Akatalua Mzuri, akamburra, Martha, Martha, wala wasi na kubighanika hena vindu viingi:

⁴² kake kindu kimwe chikundike: amu Maryamu asawura ngata yakwe yedi, nete isikawushijwa hakwe.