Kufuma 7 - Sumu Yedi ya Isa Masiya 1906 Kitamo 1897 Malumbo 1905

¹ Mzuri akamburra Musa, Yoa, nakung’ola we kuoka Izuwa hena Farao; eneoka Harun mundwenyu mroti wako.

² Utete vyose nikwiitanawie: na Harun mundwenyu amburre Farao, awang’ole waana wa Israeli ghati ya isanga lakwe.

³ Nami nineosha idindie ngoro yakwe Farao, ninenetija marighio mangu ghati ya isanga la Misri.

⁴ Kake Farao tenekusikia, ninegera mkono wangu wanga ya Misri, nineng’ola malweriri mangu, wandu wangu waana wa Israeli, ghati ya isanga la Misri, hena wuchili wubaha.

⁵ Wenenitisiwa Wamisri, nimi Mzuri, nikaronga mkono wangu wanga ya Misri, niwang’ole Waana wa Israeli ghati yawo.

⁶ Wakaareha Musa na Harun, sandu awatanawa Mzuri, nihuwo wearehe.

⁷ Na Musa mwenye miaka makumi manane na Harun mwenye miaka makumi manane na mitatu, wekinatete na Farao.

⁸ Mzuri akamburra Musa na Harun, ekiteta, Farao eneikaemburre unywi, ekiteta.

⁹ Ng’oleni unywi marighio, umburre Harun, Wushija isibo lako uliwirite si msongorana wa Farao, lineoka nyoka.

¹⁰ Wakaingia Musa na Harun hakwe Farao, wakateta sandu awaitanawa Mzuri: Harun akaliwirita si isibo lakwe msongorana wakwe Farao na msongorana wa wazoro wakwe, likaoka noyka.

¹¹ Farao akawaitanga wenye ng’eno wakwe na waghanga wakaareha huwo na wusawi wa Misri hena wusawi wawo.

¹² Wakawirita si mundu ose isibo lakwe, makaoka nyoka: kake isibo lakwe Harun likamija masibo mawa.

¹³ Ikaoka idindie ngoro yakwe Farao, asiwasikie, sandu etetie Mzuri.

¹⁴ Mzuri akamburra Musa, Ngoro yakwe Farao idindie, asua kuwang’ola wandu.

¹⁵ Tonga hakwe Farao heyawo; yoa, efuma kutonga mweteni; uimuke kumtorana mbai ya mfuro, uuhe isibo ligharuke nyoka mkononi hako.

¹⁶ Uremburra, Mzuri, Izuwa wa Waebrania, aniingija hako, kuteta, Ung’ole wandu wangu wanitumikie shighati; na yoa, mtano ingeriaha toisikiawe.

¹⁷ Ni huwo ateta Mzuri, Hena io unetisiwa ti nimi Mzuri: yoa, nabigha hena isibo lioho mkononi hangu mbombe ya mfuro, igharuke kuoka sakame.

¹⁸ Nguluma ja mfuro jinefwa, mfuro unenyuka; Wamisri weneshishirwa na kunywa mbombe ya mfuro.

¹⁹ Mzuri akamburra Musa, Mburre Harun, Uha isibo lako, uronge mkono wako wanga ya mbombe ya Misri, wanga ya malunyonyo na wanga ya mifuro, na wanga ya madingiri mawo na wanga ya ndiwa jose ja mbombe, nesa jioke sakame; ineoka sakame ghati ya isanga lose la Misri, na ghati ya miti @ na ghati ya mabwe.

²⁰ Wakaareha Musa na Harun huwo sandu awaitanawa Mzuri; akawushija isibo akaibigha mbombe ya mfuro mesoni ha Farao, na mesoni ha wazoro wakwe, ikagharuka mbombe yose ya mfuro kuoka sakame.

²¹ Nguluma ja mfuro jikafwa, ukanyuka mfuro, tawaidima Wamisri kunywa mbombe ya mfuro; hakaoka sakame ghati ya isanga lose la Misri.

²² Wakaareha huwo na wasawi wa Misri hena wusawi wawo: ikadinda ngoro yakwe Farao, isiwasikie; sandu etetie Mzuri.

²³ Akagharuka Farao akaza nyumbeni hakwe, nete @ tamayoaye ama.

²⁴ Wakafora Wamisri wose afuhi na mfuro, wawone kunywa mbombe; amu teweidima kunywa mbombe ya mfuro.

²⁵ Ikafika misi mifungate, kutera kwa Mzuri ekinabighe mbombe.