Kufuma 5 - Sumu Yedi ya Isa Masiya 1906 Kitamo 1897 Malumbo 1905

¹ Mtano kutera wakaza Musa na Harun, wakamburra Farao, Nihuwo ateta Mzuri Izuwa wa Israeli; Ushighe wandu wangu waniarehie musi mbaha shighati.

² Akateta Farao, Mzuri niani nimsikie ighonda kuwashighiria Israeli? simitisiwemi Mzuri; nete siwashighiria Israeli.

³ Wakateta Izuwa wa Waebrania atutorana: tutonge, twakusemba, mitongie ya misi mitatu shighati tumng’olie itasi Mzuri Izuwa wetu; asitubighe na ndwari nete na muhandi.

⁴ Mfumwa wa Misri akawawurra, Nini unywi Musa na Harun muwaiting’ija wandu ndima yawo; tongeni hena miagho yenyu.

⁵ Akateta Farao, Yoa, weingi ingeriaha wandu wa isanga, na unywi muwasowosha hena miagho yawo.

⁶ Akawaaghanya Farao musi ula waimukii wa wandu, na wabaha, ekiteta,

⁷ Musiwaingewa wandu nyasi ja kuarehia matofali sa iwuo na izana, watonge wawunganye nyasi wenye.

⁸ Na wingi wa matofali wemaarehe iwuo na izana, muwagera; musiwadughushie, wanyoyia awa; amu ii weloz@, wekiteta; Tutonge tumng’olie itasi Izuwa wetu.

⁹ Muwagere wome ndima idindie, waihire; wasiing’idaki viteto vihaya.

¹⁰ Wakafuma waimuki wa wandu na wabaha, wakateta, Nihuwo ateta Farao, Simuingami nyasi.

¹¹ Na unywi, kuendieni nyasi handu mwajiwonia:

¹² Wakazarika wandu ghati ya isanga lose la Misri kuwunganya makuku handu ha mani.

¹³ Waimukii wawo wakawasarija, wakateta, Fisheni ndima jenyu; kiteto cha musi musi wakwe, sandu jioho nyasi.

¹⁴ Wakabighwa wabaha wa waana wa Israeli, waimukii wa Farao wewikiwe wanga yawo, wekiteta, Nini mwasafisha aghanyo lenyu nete iwuo, nete yoo, kuareha matofali sa kuwoka.

¹⁵ Wakaza wabaha wa waana Israeli wakamuiya Farao, wekiteta, Nini wawaketia huwu wazoro wako?

¹⁶ Tawaingwawo wazoro wako nyasi, wekituwurra. Areheni matofali: na yoa, wazoro webigwa, kake matekwa ni mawo wandu wako.

¹⁷ Akateta, Mwanyoyia unywi, mwanyoyia; amu ii mwateta, Tutonge tumng’olie itasi Mzuri.

¹⁸ Tongeni ingeriaha, mrehira ndima, nyasi tomuingwa unywi, kake munekung’ola kutara kwa matofali.

¹⁹ Wakakuwona wabaha wa waana wa Israeli wawona mawiwi, vikitekwa Musiduhushe matofali menyu, ndima ya musi musi wakwe.

²⁰ Wakawatorana Musa na Harun, weimuke kuwarongekia, wekinafume hena Farao;

²¹ Wakawawurra, Mzuri awayoe achile, mwatugera kushishirwa na kunyuka kwetu mesoni ha Farao, na mesoni ha wazoro wakwe, muwainge muhandi mkononi watukome.

²² Musa akahunduka ha Mzuri, akateta, Mzuri, nini uwaketia mawiwi wandu awa? nini uniingija huwu;

²³ Too nikinaze hena Farao kuteta naye hena izina lako, awaketia mawiwi wandu awa; twawakija nete wandu wako.