Kufuma 40 - Sumu Yedi ya Isa Masiya 1906 Kitamo 1897 Malumbo 1905

¹ Mzuri akamburra Musa, ekiteta.

² Musi wa kuwoka wa mweji wa kuwoka unelijenga hema la hema la mawunganyiko.

³ Na unewika uko sanduku la luwondjo, na unelifinikira sanduku na pazia.

⁴ Na uneingija meza, na uneareha vindu vikundie kuarehika wanga yakwe; na uneingija kinara, na uneasha taa jakwe.

⁵ Na unekiwika kisiko cha thahabu hena fukijo msongorana wa sanduku ia luwondjo, na uneligera waniko la mbenge ya hema.

⁶ Na unekiwika kisiko cha matasi la kushota msongorana wa mbenge ya hema la hema la mawunganyiko.

⁷ Na uneliwika birika ghati na ghati ya hema la mawunganyiko na kisiko, na unegera mbombe uko

⁸ Na unekiimusha kiwanza mbai na mbai, na unemawanika mawaniko mbengeni ha kiwanza.

⁹ Na unemauha mafuta ma kugera, na uneligera mafuta hema, na vyose viohoho, na unelishenetija, na viya vyakwe vyose na linesheneta.

¹⁰ Na unekigera mafuta kisiko cha matasi ma kushota, na viya vyakwe vyose, na unekizerrija kisiko na kineoka kisiko kishenete deng’i.

¹¹ Na uneligera mafuta birika na kughuu kwakwe, na unelizerrija.

¹² Na unewaete Harun na waana, wakwe mtano na mbenge ya hema la mawunganyiko, na unewaoja na mbombe.

¹³ Na unemdoka Harun na nguo jishenete, na unemgera mafuta, na unemzerrija; nesa anitumikie ghati ya wukohani.

¹⁴ Na unewaete waana wakwe, na unewadoka na makoti.

¹⁵ Na unewagera mafuta, sandu umgerie mafuta wawee wawo, nesa wanitumikie ghati ya wukohani: amu kugerwa mafuta kwawo kuneoka kididi wukohani wa tendarasi ghati ya marika mawo.

¹⁶ Huwo akaketa Musa: hena vyose Mzuri emwaghanyie, ni huwo akaketa.

¹⁷ Ikaoka ghati ya mweji wa kuwoka wa mwaka wa keri, musi wa kuwoka wa mweji, masikani likaimushwa.

¹⁸ Musa akaliimusha masikani, akamachunga mawiko makwe, akamakweja maboho makwe, akaigera miti yakwe, akajiimusha ngujo jakwe.

¹⁹ Akaliwanika hema wanga ya masikani, akaligera finikiro la hema wanga yakwe; sandu Mzuri emwaghanyie Musa.

²⁰ Akauha akalugera luwondjo ghati ya sanduku, akakigera mitikio hena sanduku, akakigera kiikaiyo cha lusariyo wanga ya sanduku.

²¹ Akaliingija sanduku na masikani, akalikweja pazia la funikiro, akalifinikira kisiko cha luwondjo; sandu Mzuri emwaghanyie Musa.

²² Akaigera meza hemeni ha mawunganyiko, mbai ya masikani ya kaskazini, some ya pazia.

²³ Akamawika nezo mabumunda wanga yakwe msongorana wa Mzuri; sandu Mzuri emwaganyie Musa.

²⁴ Akakiwika kinara ghati ya hema la mawunganyiko, kuilikia meza, mbai ya masikani ya kusini.

²⁵ Akajiasha taa msongorana wa Mzuri; sandu Mzuri emwaghanyie Musa.

²⁶ Akakiwika kisiko cha thahabu hemani ha mawunganyiko msongorana wa pazia;

²⁷ Akashota wanga yakwe fukijo linonie; sandu Mzuri emwaghanyie Musa.

²⁸ Akalikweja waniko mbengeni ha masikaui.

²⁹ Akakiwika kisiko cha matasi ma kushota mbengeni ha masikani la hema la mawunganyiko, akamang’ola wanga yakwe matasi ma kushota na matasi ma kidjo; sandu Mzuri emwaghanyie Musa.

³⁰ Akaliwika birika ghati ya hema la mawunganyiko na kisiko, akagera mbombe uko, ya kuojia.

³¹ Naye Musa na Harun na waana wakwe wakaoja uko mikono yawo na maghu mawo;

³² Wekinaingie na hema ya mawunganyiko, na wekinasongerie na kisiko, wakaoja; sandu Mzuri emwaghanyie Musa.

³³ Akakiimusha kiwanza kya kulijunguluka masikani na kisiko, akaikweja waniko la mbenge ya kiwanza. Huwo Musa akaikurija ndima.

³⁴ Niho ijumbi likafinikira hema la mawunganyiko, uwedi wa Mzuri ukaliizuja masikani.

³⁵ Naye Musa teidimaye kuingia na hema la mawunganyiko, amu ijumbi laikee wanga yakwe, na uwedi wa Mzuri ukaliizuja masikani.

³⁶ Nalo ijumbi likinawushijwe ghati ya masikani, waana wa Israeli wakailikia kutonga hena vyaro vyawo vyose.

³⁷ Kake ijumbi lisawushijwe, tewezokawo mtano musi lawushijwa.

³⁸ Amu ijumbi la Mzuri liokie wanga ya masikani hemusi, na moto ukaoka wanga yakwe kio, mesoni ha nyumba yose ya Israeli, ghati ya vyaro vyawo vyose.