Kufuma 4 - Sumu Yedi ya Isa Masiya 1906 Kitamo 1897 Malumbo 1905

¹ Akatalwa Musa akaghamba, Kake teweneniitikijawo, tewenenisikijawa ighon la; amu weneghamba, Mzuri takufumiaye.

² Mzuri akamburra, Niki kioho mkononi hako? Akaghamba, Ni isibo.

³ Akateta, Lighushe si. Akalighusha si, likaoka nyoka; akamatuka Musa msongorana wakwe.

⁴ Mzuri akamburra Musa, Ronga mkono wako uigure kitize: akauronga mkono wakwe akaigura, ikaoka isibo mkononi hakwe:

⁵ Nesa wawone kuitikija Mzuri Izuwa wa wawee wawo, Izuwa wa Ibrahimu, Izuwa wa Isaak, na Izuwa wa Yakobo, akufumie.

⁶ Mzuri akamburrawa, Gera mkono mbafuni hako. Akaugera mkono mbafuni: na ekinaung’ole, yoa, mkono wakwe una itaambo ijewa swee.

⁷ Akateta, Hunduiya mkono mbafuni hako. (Akauhunduiya mkono wakwe mbafuni; na ekinaung’ole mbafuni, yoa, wahunduka wedi sa muri wakwe.)

⁸ Ineoka, wasikuitikije, wasisikie ighonda la luwano lwa kuwoka, weneliitikija ighonda la luwano lwa keri.

⁹ Ineoka, wasiitikije maluwano ama meri, nete wasisikie ighonda lako, uuhe mbombe ya mfuro uitishe heomie: nayo mbombe waiuha mfuro ineoka sakame heomie.

¹⁰ Musa akamburra Mzuri, Mzuri waugu, mi si mteti, nete iwuo nete izana nete too ukinatete na mzoro wako: kake niemee wa itumbu na wa lumi mi.

¹¹ Mzuri akamburra, Niani emwarehie mundu itumu? kana niani eareha bubu, kana ming’ani, kana ewona, kana efwie meso? si mi Mzuri?

¹² Huwo ingeriaha tonga, nineoka mi na itumbu lako, ninekulosha uneviteta.

¹³ Akateta, Ee Mzuri, ingija ingeriaha hena mkono wakwe unemwingija.

¹⁴ Oro ya Mzuri ikaaka wanga ya Musa, akateta, Siye mundwenyu Harun Mlawi? Natisiwa uu ni mteti. Yoa, ezie kukuzana: akakuwona eneizihirwa ngoro yakwe.

¹⁵ Nawe uneteta naye, unegera viteto itumbuni hakwe: nami nineoka na itumbu lako na itumbu lakwe, ninemlosha wundu muneketa.

¹⁶ Naye eneteta handu hako hena wandu: eneoka hako sa itumbu, nawe uneoka hakwe sa Izuwa.

¹⁷ Na unelitika isibo ili mkononi hako, uneliarehia maluwano.

¹⁸ Akatonga Musa, akahunduka hena Yethro mkwee, akamburra, Nitonge, nakusemba, nihunduke ha wandwetu ghati ya Misri, ndeyoa wereoho mtano yoo. Yethro akamburra Musa, Tonga na luworo.

¹⁹ Mzuri akamburra Musa ghati ya Midiani, Tonga, hunduka na Misri: amu wandu wose wekikuenda ngoro wefwie.

²⁰ Musa akauha mche wakwe na waana wakwe, akawakweja wanga ya njoe akahunduka kutonga isanga la Misri: Musa akaliuha isibo la Mzuri mkononi hakwe.

²¹ Mzuri akamburra Musa, Ukitonga kuhunduka kutonga Misri, ukuyoe kumaketa maluwano mose mala nimawikie mkononi hako msongorana wa Farao: nami nineosha ngoro yakwe idindie, nete tenewashigha wandu watonge.

²² Nawe unemburra Farao, Nihuwo ateta Mzuri, Israeli niye mwana wangu, mbele wangu:

²³ Nami nakuwurra, Mshighe mwana wangu, anitumikie; nawe wasua kumshigha: yoa, ninemkoma mwana wako, mbele wako.

²⁴ Ikaoka wekitonga hena kisowoko, Mzuri akamtorana, akakunda kumkoma.

²⁵ Zipora akauha ibwe, akachwa ishimbu la mwana wakwe, akalitagha maghuni hakwe, akateta, Mzuri ngasu wa sakame we hangu.

²⁶ Akamshigha. Akateta, Mzuri ngasu niwe wa sakame, amu ya kitawane.

²⁷ Mzuri akamburra Harun, Tonga kumzana Musa shighati. Akatonga, akambona ghati ya nduwi ya Izuwa, akamnyonyoza.

²⁸ Musa akambonja Harun viteto vyose vya Mzuri amwingijija, na marighio mose amuazeria.

²⁹ Akatonga Musa na Harun, wakawunganya waghosi wose wa waana wa Israeli.

³⁰ Harun akaviteta viteto vyose Mzuri emburire Musa; akamaareha marighio mesoni ha wandu.

³¹ Wakaitikija wandu; wakasikia ti ewazia Mzuri waana wa Israeli, akajiwona nginyala jawo, wakaimama wakaomba.