Kufuma 38 - Sumu Yedi ya Isa Masiya 1906 Kitamo 1897 Malumbo 1905

¹ Akakiareha kisiko cha itasi la kushota cha mti wa mshitta: mikono misano wueza wakwe, na mikono misano kuarama kwakwe; kuarangamba; na mikono mitatu kutonga wanga kwakwe.

² Akaareha mbembe jakwe hena nganda jakwe ’nne; mbembe jakwe jikaoka huwo: akakifinikira na usango.

³ Akaareha viya vyose vya kisiko, masufuria makwe, na maghembe makwe, na mabakuli makwe, na mabongo makwe, na viya vya moto vyakwe viya vyakwe vyose eviareha usango.

⁴ Akaiarehia kisiko kindu sa nyavu si ya ikindo lakwe mtano ghati yakwe.

⁵ Akaareha hena kuchangarua pete nne hena nganda nne ja nyavu ya usango, handu hena mitikio.

⁶ Akaiareha mitikio ya mti wa mshitta, akaifinikira na usango.

⁷ Akaingija mitikio na pete jioho mbai ja kisiko, ya kukitika, akakiareha kisiko kisina kindu ndeni, na maboho.

⁸ Akaliareha birika la usango, na kughuu kwakwe usango, la vioo vya wache wewunganyika, wewunganyika mbengeni ha hema la mawunganyiko.

⁹ Akakiareha kiwanza: mbai wa kusini hena kusini mawaniko ma kiwanza ma nguo ya kitani kiiwitwe, mikono ighana:

¹⁰ Ngujo jawo makumeri, na mawiko mawo ma usango makumeri; vichunga vya ngujo na vijunguluko vyawo vya fetha.

¹¹ Na hena mbai ya kaskazini mawaniko ma mikono ighana, ngujo jawo makumeri, na mawiko mawo ma usango makumeri; vichunga vya ngujo na vijunguluko vyawo fetha.

¹² Na hena mbai ya kigwa‐izuwa mawaniko ma mikono makumi masano, ngujo ikumi, na mawiko mawo ikumi; vichunga vya ngujo na vijunguluko vyawo fetha.

¹³ Na hena mbai ya ngaghenya, ngaghenya mikono makumi masano.

¹⁴ Mawaniko ma mbai mwe mikono ikumi na misano; ngujo jawo ndatu na mawiko mawo matatu.

¹⁵ Na hena mbai ya keri ya mbenge ya kiwanza, uko na uko, mawaniko ma mikono ikumi na misano; ngujo jawo ndatu na mawiko mawo matatu.

¹⁶ Mawaniko mose ma kiwanza mbai jose ma nguo ya kitani kiiwitwe.

¹⁷ Na mawiko ma ngujo ma usango; vichunga vya ngujo na vijunguluko vyawo, fetha; kufinikira kwa mito yawo, fetha; na ngujo jose ja kiwanza vikajungulukwa ni fetha.

¹⁸ Na waniko la mbenge ya kiwanza liokie ndima ya sindano, ngoningoni, na ngundu, na irotome, na nguo ya kitani kiiwitwe: wueza wakwe mikono makumeri, na kutonga wanga hena kuarama kwakwe mikono misano, ma kuringanana na mawaniko ma kiwanza.

¹⁹ Ngujo jawo nne, na mawiko mawo ma usango manne; vichunga vyawo fetha, na kufinikira kwa mito yawo na vijunguluko vyawo fetha.

²⁰ Na misomari yose ya hema, na ya kiwanza mbai jose, ikaoka usango.

²¹ Kutara kwa hema, nilo hema la luwondjo, sandu latariwa, hena aghanyo la Musa, hena ndima ya Walawi, hena mkono wa Itamari, mwana wakwe Harun mkohani.

²² Naye Bezaleel mwana wa Uri, mwana wa Hur, wa mbare ya Yuda, akaareha vyose Mzuri emwaganyie Musa.

²³ Na kimwe naye Aholiab, mwana wa Ahisamach, wa mbare ya Dan, msongoi, na mwaria, na machumi wa ngoningoni, na ngundu, na irotome, na nguo ya kitani kiiwitwe.

²⁴ Thahabu yose iingia na ndima ghati ya ndima yose ya heshenete, niyo thahabu ya king’olwa, ikaoka talanta makumeri na kenda, na shekeli maghana mafungate na makumi matatu, hena shekeli ya heshenete.

²⁵ Na fetha yawo wetarika wa mawunganyiko ikaoka talanta ighana, na shekeli maghana ikumi na mafungate na makumi mafungate na sano, hena shekeli ya heshenete.

²⁶ Beka hena mundu ose, niyo ihindi la shekeli, hena shekeli ya heshenete, hena ose etonga kutarika, mwenye miaka makumeri na ekelie, hena wandu maghana ikumi kandu maghana matandatu na tatu na maghana masano na makumi masano.

²⁷ Na talanta ighana ja fetha makachangaruka mawiko ma heshenete, na mawiko ma pazia: mawiko ighana ma talanta ighana, talanta hena iwiko.

²⁸ Na vya shekeli maghana ikumi na fungate na makumi mafungate na sano akaareha vichunga vya ngujo, akajifinikira mito akajigera vijunguluko.

²⁹ Na usango ung’olwe talanta makumi mafungate, na shekeli maghana ikumi kandu keri, na maghana manne.

³⁰ Na hena uo akaareha mawiko ma mbenge ya hema la mawunganyiko, na kisiko cha usango, na nyavu yakwe ya usango, na viya vyakwe vyose.

³¹ Mawiko ma kiwanza chajunguluka, na mawiko ma mbenge ya kiwanza, na misomari yose ya hema, na misomari yose ya kiwanza kijunguluke.