Kufuma 37 - Sumu Yedi ya Isa Masiya 1906 Kitamo 1897 Malumbo 1905

¹ Bezaleel akaareha sanduku la mti wa mshitta: mikono miri na ihindi wueza wakwe, na mkono na ihindi kuarama kwakwe, na mkono na ihindi kutonga wanga kwakwe

² Akalifinikira na thahabu izerre ndeni na some, akaliarehia lutiriwo lwa thahabu kulijunguluka.

³ Akaliarehia pete nne ja thahabu ichangaruke, hena nganda jakwe nne; nijo pete mbiri hena mbai mwe yakwe, na pete mbiri hena mbai ya keri yakwe.

⁴ Akaareha mitikio ya mti wa mshitta, akaifinikira na thahabu.

⁵ Akaingija mitikio na pete mbai ja sanduku, kulitika sanduku.

⁶ Akakiareha kiikaiyo cha lusario cha thahabu izerre mikono miri na ihindi wueza wakwe, na mkono mwe na ihindi kuarama kwakwe.

⁷ Akaareha makerubi meri ma thahabu, meshaniwe akamaareha, hena miidiwiko miri ya kiikaiyo cha lusario.

⁸ Kerubi mwe hena kuidiwika kwa mbai ii, na kerubi mwe hena kuidiwika kwa mbai ila: kufuma kiikaiyo cha lusario akamaareha makerubi ha miidiwiko yakwe miri.

⁹ Namo makerubi makaronga mazau mawo wanga, makafinikira na mazau mawo wanga ya kiikaiyo cha lusario, mawusho mawo mekiyoana; hena kiikaiyo cha lusario mawusho ma makerubi.

¹⁰ Akaiareha meza ya mti wa mshitta: mikono miri wueza wakwe, na mkono na ihindi kuarama kwakwe, na mkono na ihindi kutonga wanga kwakwe:

¹¹ Akaifinikira na thahabu izerre, akaiarehia lutiriwo lwa thahabu kuijunguluka.

¹² Akaiarehia ikindo la mkono la kujunguluka: akaliarehia ikindo lutiriwo lwa thahabu lwa kujunguluka.

¹³ Akaiarehia pete nne ja thahabu ichangaruke, akajiwika pete wanga ya nganda nne jioho ghati ya maghuu makwe manne.

¹⁴ Afuhi na ikindo jiokie pete, handu hena mitikio ya kuitikia meza.

¹⁵ Akaiareha mitikio ya mti wa mshitta, akaifinikira na thahabu, hena kuitika meza.

¹⁶ Akaviareha viya vioho wanga ya meza, mianje yakwe, na nyiko jakwe, na mabakuli makwe, na mafinikiro makwe, thahabu izerre.

¹⁷ Akakiareha kandili cha thahabu izerre: cha ishaniwe akakiareha kinara, kikolo chakwe, mbagha yakwe, mabukuli makwe, kura jakwe, na viwaro vyakwe, vikaoka huwo.

¹⁸ Na mbagha ndandatu jikifuma na misawajoni hakwe mbagha ndatu ja kinara mbai yakwe mwe, na mbagha ndatu ja kinara mbai yakwe ja keri.

¹⁹ Mabakuli matatu sa viwaro, vya lozi, hena mbagha mwe, na kura na kiwaro, na mabakuli matatu sa viwaro vya lozi hena mbagha ya keri, na kura na kiwaro; huwo ghati ya mbagha ndandatu jifumie na kinara.

²⁰ Na ghati ya kinara makaoka mabakuli manne sa lozi, kura jawo na viwaro vyawo.

²¹ Na kura si ya mbagha mbiri ghati ya kila, na kura si ya mbagha mbiri ghati ya kila, hena mbagha ndandatu jila jafuma ghati yakwe.

²² Kura jawo na mbagha jawo nijo huwo: jose ndima mwe ishaniwe ya thahabu izerre.

²³ Akaareha taa jakwe fungate, na makasi makwe, na vimwanje vyakwe, vya thahabu izerre.

²⁴ Talanta ya thahabu izerre ekiarehe, na viya vyakwe vyose.

²⁵ Akakiareha kisiko cha kufukija cha mti wa mshitta: wueza wakwe mkono mkono, na kuarama kwakwe mkono; na kutonga wanga kwakwe mikono miri; mbembe jakwe jikaoka huwo.

²⁶ Akakifinikira na thahabu izerre, na wa nga, na mbai jakwe jose, na mbembe jakwe; akakiarehia pia lutiriwo lwa thahabu lwa kujunguluka.

²⁷ Akakiarehia pete mbiri ja thahabu si ya lutiriwo lwakwe, hena nganda jakwe mbiri, jioke handu ha mitikio ya kukitika

²⁸ Akaareha mitikio ya mti wa mshitta akaifinikira na thahabu.

²⁹ Akaareha mafuta meshenete ma kugera, na fukijo lizerre la mbungo monie, hena ndima ya mughanga.