Kufuma 35 - Sumu Yedi ya Isa Masiya 1906 Kitamo 1897 Malumbo 1905

¹ Musa akawawunganya waana wa Israeli wose, akawawurra, Nivyo viteto Mzuri eaghanyie, muvikete.

² Misi mitandatu ndima ihirwe, kake musi wa kafungate uneoka henyu musi mshenete, sabato ya lusowoko hena Mzuri: ose ehira ndima musi ula enekomwa.

³ Usiashe moto ghati ya kaa jenyu musi wa sabato.

⁴ Musa akawawurra mawunganyiko mose ma waana wa Israeli, ekiteta, Nikyo kiteto Mzuri eaghanyie, ekiteta,

⁵ Uheni ghati yenyu king’olwa hena Mzuri, ose ena ngoro ianguhe, akiete, king’olwa hena Mzuri; thahabu, na fetha, na usango.

⁶ Na ngoningoni, na ngundu, na irotome, na nguo ya kitani, na nyui ja mbuji,

⁷ Na mikota ya ndorome igerwe ngundu, na mikota ya tahashi, na mti wa mshitta.

⁸ Na mafuta ma taa, na mbungo ja mafuta ma kugera, na hena mafukijo inonie,

⁹ Na mabwe ma shoham na mabwe ma kugera na efodi, namo ma cha‐mbafuni.

¹⁰ Na ose ena ngoro ya kucha aze, aviarehe vyose Mzuri eaghanyie

¹¹ Hema, hema yakwe, na funikiro lakwe, vichunga vyakwe na maboho makwe, na miti yakwe, na ngujo jakwe, na mawiko makwe;

¹² Sanduku na mitikio yakwe, kiikaiyo cha lusario, na pazia la kufinikira;

¹³ Meza na mitikio yakwe, na viya vijakwe vyose, na mabumunda ma luwondjo;

¹⁴ Kandili pia hena kuangajia, na mafuta hena taa;

¹⁵ Na kisiko cha kufukija, na mitikio yakwe, na mafuta ma kugera, na fukijo linonie na waniko la mbenge hena hakuingia ha hema;

¹⁶ Kisiko cha itasi la kushota, na nyavu yakwe ya usango, mitikio yakwe, na viya vyakwe vyose, birika na kughu kwakwe,

¹⁷ Mawaniko ma kiwaza, ngujo jakwe, na mawiko mawo, na waniko la mbenge ya kiwanza,

¹⁸ Misomari ya hema na misomari ya kiwanza, na nzighe jawo.

¹⁹ Nguo ja kutumika, kutumika ghati ya heshenete, nguo jishenete ja Harun mkohani, na nguo ja waana wakwe, ja kuhira ndima ya wukohani.

²⁰ Wunganyiko lose la waana wa Israeli likafuma msongorana wa Musa.

²¹ Wakaza, mundu ose, ngoro yakwe yambusha, na mundu ose mwenye lusaro luanguhe, wakaete king’olwa cha Mzuri hena ndima ya hema ya mawunganyiko, na hena kutumika kwakwe kwose, na hena nguo jishenete.

²² Wakaza, na wa kiume na wa kiche, wose wenye ngoro ianguhe, wakaete vilinga, na marachi, na pete, na viboho, mahambo mose ma thahabu: na mundu ose eng’olie king’olwa cha thahabu hena Mzuri.

²³ Na mundu ose, mwenye ngoningoni, na ngundu, na irotome, na nguo ya kitani, na nyui ja mbuji, na mikota ya ndorome mingundu, akajiete@

²⁴ Mundu ose eng’ola king’olwa cha fetha na usango eetie king’olwa cha Mzuri: na mundu ose mwenye mti wa mshitta hena ndima ya matumiko, akauete.

²⁵ Na wache wose wenye ngoro ya kucha wakaiwita na mikono yawo, wakakiete kila wekiiwita, na cha ngoningoni, na cha ngundu, na cha irotome, na cha kitani.

²⁶ Na wache wose ngoro jawo jawawusha hena kucha wakaiwita nyui ja mbuji.

²⁷ Wabaha wakaete mabwe ma shoham, na mabwe ma kuwika, hena efodi, na hena cha mbafuni.

²⁸ Na mbungo, na mafuta ma taa, na hena mafuta ma kugera, na hena fukijo linonie.

²⁹ Waana wa Israeli wakaete king’olwa cha ngoro Mzuri, ose wa kiume na wa kiche, mwenye ngoro ianguhe kuete hena ndima ya mbare jose, Mzuri eaghanyie iketike hena mkono wa Musa.

³⁰ Musa akawawurra waana wa Israeli, Yoa, Mzuri eitanga na izina Bezaleel mwana wa Uri, mwana wa Hur, wa mbare ya Yuda;

³¹ Na emwizuja na ngoma ya Izuwa, hena kucha, hena ng’eno, na hena kutisiwa, na hena mbare yose ya ndima;

³² Na kuareha ndima ja ng’eno, kuhira na thahabu, na fetha, na usango,

³³ Na kuchwa mabwe, na kumawika, na kusongoa mti, na kuareha ndima ya ng’eno ya mbare yose.

³⁴ Na egera ngoroni hakwe, aloshe, na ye, na Aholiab, mwana wa Ahisamachi, wa mbare ya Dan.

³⁵ Awo awaizuja na kucha kwa ngoro, kuhira ndima ya mbare jose, ya msongoi, na mhiri wa ngeno, na mchumi, hena irotome na hena nguo ya kitani, na ya kuchuma, ya wala wehira ndima ya mbare yose, na ya wala wearehia ndima ya ng’eno.