Kufuma 33 - Sumu Yedi ya Isa Masiya 1906 Kitamo 1897 Malumbo 1905

¹ Mzuri akamburra Musa, Wuka, ukwee kufuma uko, we na wandu uwakweje kufuma isanga la Misri, mtano isanga nimrarie Ibrahimu, Isaak, na Yakobo, nikiteta, Hena waana wako nineling’ola.

² Ninetuma malaika kukurongoria, na ninewakinya Mkanaani, Mwamori, Mhiti, Mperizzi, Mhiwi, na Myebusi:

³ Hena isanga laizua mavee na zoke: amu sinekwea ghati yako; amu niwe wandu wa singo lidindie nisikunyamare nzieni.

⁴ Wandu wekinasikie mburi iji mbiwi, wakashiniwa: mundu asikugere mahambo makwe.

⁵ Amu Mzuri emburrie Musa, Wawurra waana wa Israeli, Unywi wandu wa singo lidindie: ninekwea ghati yako chwii, na ninekunyamara: amu ii ingeriaha ukuhambue mahambo mako, nesa nitisiwe nikini nikuketie.

⁶ Waana wa Israeli wakakuhambua mahambo mawo mbai ya nduwi Horeb.

⁷ Musa akaliuha hema, akaijenga some ya kiengo, hae na kiengo, akaliitanga Hema la mawunganyiko. Ikaoka mundu ose emwenda Mzuri akafuma kutonga na hema la mawunganyiko, lioho some ya kiengo.

⁸ Ikaoka, Musa ekinafume kutonga na hema, wandu wose wakawuka, wakaimuka mundu ose mbengeni ha hema lakwe, wakamyoia Musa, mtano ekinaingie na hema.

⁹ Ikaoka, ekiingia Musa na hema, ngujo ya ijumbi ikasea, ikaimuka mbengeni ha hema, akateta na Musa.

¹⁰ Wandu wose wakaiwona ngujo ya ijumbi yaimuka mbengeni ha hema: wandu wose wakaimuka wakaomba, mundu ose mbengeni ha hema lakwe.

¹¹ Mzuri akateta na Musa wusho hena wusho, sa mundu eteta na mbuyae. Akagharukawa kiengoni: kake esinga lakwe Yoshua, mwana na Nun, tetongaye kufuma na hema.

¹² Musa akamburra Mzuri, Yoa, waniwurra, kweja wandu awa: na tounitisiwija niani uneingija nami, Kake ughambie, Nakutisiwa hena izina, nawe wawona mvono mesoni hangu pia.

¹³ Amu ii ingeriaha, nakusemba, kwakicha nawona mvono mesoni hako, uniwonye ingeriaha njia yako, nesa niwone mvono mesoni hako: ugheshijie ti mbare ii wandu wako.

¹⁴ Akaghamba, kuoho kwangu kunetonga nawe, na ninekuinga lusowoko.

¹⁵ Akamburra, kwakicha kuoho kwako tokutonga nami, usitutike kufuma uko.

¹⁶ Amu nize inetisiwika aha ti mi na wandu wako wewona mvono mesoni hako? si amu ya kutonga kwako na uswi? ni huwo tunetanywa, mi na wandu wako, na wandu wose weoho wanga ya wusho wa masanga.

¹⁷ Mzuri akamburra Musa, Ninekiketa kindu iki ukitetie, amu wawona mvono mesoni hangu, nami nakutisiwa hena izina.

¹⁸ Akaghamba, nakusemba, uniwonye kirumi kyako.

¹⁹ Akaghamba, Nineuvetija uwedi wangu wose msongorana wako, na ninelitoranya izina la Mzuri msongorana wako; nineoka na mvono hakwe nikundie kumwinga mvono, na ninemsaria ula nikundie kumsaria.

²⁰ Akaghamba, Touidima kuniwona wusho: amu tehena mundu eneniwona, na ekia.

²¹ Mzuri akaghamba, Yoa, handu heoho mbai yangu, nawe uneimuka ibweni:

²² Na ineoka, kirumi kyangu kikivetia, ninekuwisa na lwariri lwa ibwe, na ninekufinikira na mkono wangu nikivetia.

²³ Na ninewushija mkono wangu, na uneniwona nyuma kake wusho wangu tounewonwa.