Kufuma 29 - Sumu Yedi ya Isa Masiya 1906 Kitamo 1897 Malumbo 1905

¹ Nikyo unewaketia uwashenetije, wanihirie hena wukohani: Uha zao ndongo, na ndorome mbiri jisina owiwi.

² Na mkate usifushwe, na mabumunda mesifushwe mearehiwe na mafuta, na mabumunda masisiri masifushwe megerwe mafuta: ma muchu wa ngano unemaareha.

³ Unemagera na mbinda mwe, unemaete na mbinda, kimwe na zao na ndorome mbiri.

⁴ Unewaete Harun na waana wakwe weri mtano mbengeni ha hema ya mawunganyiko, na unewaoja na mbombe.

⁵ Na uneuha nguo, na unemdoka Harun ikoti, na nguo ya efodi, na efodi, na cha‐mbafuni, na unemchunga na ngana ya machumo ya efodi.

⁶ Na unekigera kilemba mtwini hakwe, na unelugera lumerisia lushenete wanga ya kilemba.

⁷ Na uneuha mafuta ma kugera, unemamimina mtwini hakwe, na unemgera mafuta.

⁸ Na unewaete waana wakwe, unewadoka makoti.

⁹ Unewachunga na ngana, Harun na waana wakwe, unewagera vilemba: na wukohani wuneoka hawo hena itanawo la ndarasi: na unemshenetija Harun na waana wakwe.

¹⁰ Na uneete zao msongorana wa hema la mawunganyiko: naye Harun na waana wakwe wenegera mikono yawo wanga ya mtwi wa zao.

¹¹ Na uneikoma zao msongorana wa Mzuri, mbengeni ha hema ya mawunganyiko.

¹² Na uneuha ya sakame ya zao, uneigera wanga ya mbembe ja kisiko na kichaa chako, na unemimina sakame yose mbai ya kisiko si.

¹³ Na unemauha mafuta mose mefinikira ndeni, na kikonde kioho wanga ya mando‐ma‐ndeni, na mafigho meri, na mafuta meoho wanga yamo, unemashota wanga ya kisiko.

¹⁴ Kake nyama ya zao, na ngingo yakwe, na kitondo chakwe, unejishota na moto some ya kiengo, nilo itasi la ng’oki.

¹⁵ Uneuha na ndorome mwe; naye Harun na waana wakwe wenegera mikono yawo wanga ya mtwi wa ndorome.

¹⁶ Na uneikoma ndorome, na uneiuha sakame yakwe, uneimiza mbai na mbai wanga ya kisiko.

¹⁷ Na uneichwa ndorome vihindi, na uneoja ndeni yakwe, na maghu makwe, unemagera na vihindi vyakwe, na mtwi wakwe.

¹⁸ Na uneishota ndorome yose wanga ya kisiko: nilo itasi la kushota hena Mzuri: niyo mbungo yedi, itasi la moto hena Mzuri.

¹⁹ Na uneiuha ndorome ya keri: naye Harun na waana wakwe wenegera mikono yawo wanga ya mtwi wa ndorome.

²⁰ Na uneikoma ndorome, uneiuha ya sakame yakwe, unegera wanga ya mto wa isikio la kuume lakwe Harun, na wanga ya mto wa isikio la kuume la waana wakwe, na wanga ya kichaa kibaha cha mkono wa kuume wawo, na wanga ya kichaa kibaha cha kughu la kuume lawo, na uneimiza sakame wanga ya kisiko mbai na mbai.

²¹ Na uneuha ya sakame ioho wanga ya kisiko, na ya mafuta ma kugera, unemiza wanga ya Harun, na wanga ya nguo jakwe, na wanga ya waana wakwe, na wanga ya nguo ja waana wakwe kimwe naye: naye eneshenetijwa, na nguo jakwe, na waana wakwe, na nguo ja waana wakwe kimwe naye.

²² Na uneuha mafuta na mhongo, na mafuta mefinikira ndeni, na kikonde kioho wanga ya mando‐ma‐ndeni, na mafigho meri, na mafuta meoho wanga yawo, na kituro cha kuume: amu niyo ndorome ya kushenetija.

²³ Na mkate mwe, na ibumunda imwe laarehiwe na mafuta, na ibumunda isisiri imwe la mbinda ya mabumunda mesifushwe msongorana wa Mzuri:

²⁴ Na unemagera mose mikononi hakwe Harun na mikononi ha waana wakwe; na unemakuta itasi la kukuta msongorana wa Mzuri.

²⁵ Na unemauhia hena mikono yawo, unemashota hena itasi la kushota, hena mbungu yedi msongorana wa Mzuri: nilo itasi la moto hena Mzuri.

²⁶ Na uneuha kidari cha ndorome ya kushenetijwa kwakwe Harun, na unekikuta hena itasi la kukuta msongorana wa Mzuri: niyo ngata yako.

²⁷ Na unekishenetija kidari cha itasi la kukuta na kituro cha kuwushija, kikutwa, na kiwushijwa, cha ndorome ya kushenetija, ya ila hena Harun, na ila hena waana wakwe.

²⁸ Na kineoka chakwe Harun na cha waana wakwe hena itanawo la ndarasi kufuma waana wa Israeli: amu nilo itasi la kuwushija: na lineoka itasi la kuwushija kufuma waana wa Israeli la itasi la matasi mawo ma luworo, nilo ilasi la kuwushija lawo hena Mzuri.

²⁹ Na nguo jishenete jakwe Harun jineoka ja waana wakwe kutera kwakwe, wagerwe mafuta najo, na washenetijiwe najo.

³⁰ Na mwana ula eye mkohani handu hakwe enejidoka misi mifungate, ekiingia na@ hema ya mawunganyiko ahire ghati heshenete.

³¹ Na uneiuha ndorome ya kushenetija uneirugha nyama yakwe ghati ya heshenete.

³² Naye Harun na waana wakwe weneila nyama ya ndorome, na mkate uoho na mbinda, mbengeni ha hema ya mawunganyiko.

³³ Na wenevila vindu vila lukombolo lwaarehika navyo, kuwashenetija na kuwazerrija: kake mugheni asivile, amu vyasheneta.

³⁴ Na kwakicha ifungu la nyama ya kushenetija, kana la mkate, lashighajika mtano heyawo, niho unemashota mashighajiko na moto: isiliwe, amu yasheneta.

³⁵ Ni huwo unemketia Harun, na waana wakwe, hena vyose nikuaghanyie: misi mifungate unewashenetija.

³⁶ Na uneng’ola misi yose zao hena itasi la ng’oki hena lukombolo: unezerrija kisiko, ukiidiwa kukiarehia lukombolo, na unekigera mafuta, ukizerrije.

³⁷ Misi mifungate unekiarehia kisiko lukombolo, ukizerrije; nakyo kineoka kisiko kishenete muno: kyose kyakuwara kisiko kinesheneta.

³⁸ Iki nikyo uneking’ola hena kisiko; vidorome viri vya mwaka wa kuwoka musi hena musi.

³⁹ Kadorome kamwe unekang’ola heyawo: na kadorome ka keri unekang’ola chamagheri.

⁴⁰ Na kimwe na kadorome kamwe ifungo la ikumi la muchu larunganyika na ifungu la kanne la hin ya mafuta mearehiwe; na ifungu la kanne la hin ya mvinyo hena itasi la kunywea.

⁴¹ Na kadorome ka keri unekang’ola chamagheri, na unekaarehia sa itasi la nyama la heyawo, na hena itasi la kunywea, hena mbungo yedi, itasi la moto hena Mzuri.

⁴² Itasi la kushota la misi yose hena marika menyu mbengeni ha hema ya mawunganyiko msongorana wa Mzuri: niho ninetorana na unywi, nitete uko nawe.

⁴³ Niho ninetorana na waana wa Israeli, na ineshenetijwa na kirumi changu.

⁴⁴ Na nineizerrija hema ya mawunganyiko, na kisiko: ninemzerrija na Harun na waana wakwe, wanihirie hena wukohani.

⁴⁵ Nami ninetua ghati ya waana wa Israeli, na nineoka Izuwa wawo.

⁴⁶ Nawo wenetisiwa ti nimi Mzuri Izuwa wawo, niwaetie kufuma isanga la Misri, nesa nitue ghati yawo: nimi Mzuri Izuwa wawo.