Kufuma 28 - Sumu Yedi ya Isa Masiya 1906 Kitamo 1897 Malumbo 1905

¹ Umuuhe Harun mdwenyu, na waana wakwe kimwe naye ghati ya waana wa Israeli, nesa anihirie ndima ya wukohani, Harun, Nadab na Abihu, Eleazar na Ithamar, waana wa Harun.

² Unemwarehiya Harun mundwenyu nguo ya wusheneto, hena kirumi na uwedi.

³ Unewawurra wose wena ngoro ya ng’eno, nawo wenemwarehia Harun nguo, ashenetijwe, anihirie ndima ya wukohani.

⁴ Na iji nguo wenejiareha: ya mbafuni, na efodi, na kanzu, na ikoti la machumo, na kilemba, na ngana: nawo wenemwarehia Harun mundwenyu nguo ishenete, na waana wakwe, anihirie ndima ya wukohani.

⁵ Nawo weneuha thahabu, na ngoningoni, na ngundu, na irotome, na nguo ya kitani.

⁶ Weneareha efodi hena thahabu, na ngoningoni, na ngundu, na irotome, na nguo ya kitani kiiwitwe, na ndima ya mwaria.

⁷ Vituro viri vinelunganywa hena miidiwo yakwe; ni huwo vinelunganyika.

⁸ Na ngana ya machumo ya efodi, ioho wanga yakwe, ineoka huwo, hena ndima yakwe; thahabu, ngoningoni, na ngundu, na irotome, na nguo ya kitani kiiwitwe.

⁹ Na we uneuha mabwe meri ma shoham, unesongoa wanga yamo mazina ma waana wa Israeli:

¹⁰ Mazina mawo matandatu wanga ya ibwe imwe na mazina matandatu meshighajike wanga ya ibwe la keri, hena kuwoneka kwawo.

¹¹ Hena ndima ya msongoi‐mabwe, sa kusongowa kwa muhuri, unemasongoa mabwe meri na mazina ma waana wa Israeli: unemaingija ghati ya mawiko ma thahabu.

¹² Unemawika mabwe meri wanga ya vituro vya efodi, mabwe ma lukumbusho hena waana wa Israeli: naye Harun enetika mazina mawo msongorana wa Mzuri wanga ya vituro vyakwe viri hena lukumbusho.

¹³ Na uneareha mawiko ma thahabu.

¹⁴ Na nyise mbiri ja thahabu izerre; sa nzighe unejiareha ja ndima ya kuaghosa: na unejichunga nyise ja ndima ya kuaghosa na mawiko.

¹⁵ Na uneareha cha‐mbafuni cha wuchili, ndima ya ng’eno; hena ndima ya efodi unekiareha: thahabu, ngoningoni, na ngundu, na irotome, na nguo ya kitani kiiwitwe unekiareha.

¹⁶ Ineoka ngamba kandu keri, idambo la vichaa wueza wakwe, na idambo la vichaa kuarama kwakwe.

¹⁷ Unekiizuja kuizua mabwe, mitambara minne ya mabwe: mtambara wa kuwoka, la ngundu, la muruku, na la zumaridi; mtambara wa kuwoka.

¹⁸ Mtambara wa keri, la manimani, la baharamani, na la akiki nyewa.

¹⁹ Mtambara wa katatu, la ain‐il‐hiri, la yashimu, na la yemashtu.

²⁰ Mtambara wa kanne, la zabarajadi, la jazaa, na la yashbu: menewikwa na thahabu hena maizua mawo.

²¹ Na mabwe meneoka na mazina ma waana wa Israeli, ikumi na meri hena mazina mawo, kusongowa kwa muhuri; yose hena izina lakwe, hena mbare ikumi na mbiri.

²² Uneareha wanga ya cha‐mbafuni nyise sa nzighe, ndima ya kuaghosa, thahabu izerre.

²³ Uneareha wanga ya cha‐mbafuni pete mbiri ja thahabu, unejiwika pete mbiri wanga ya mito miri ya cha‐mbafuni.

²⁴ Unejiwika nyise mbiri ja thahabu ghati ya pete mbiri ja mito ya cha‐mbafuni.

²⁵ Na miidiwo miri ya nyise ja kuaghoswa uneichunga na mawiko meri, na unemawika wanga ya vituro vya efodi msongorana wakwe.

²⁶ Uneareha na pete mbiri ja thahabu, na unemawika wanga ya mito miri ya cha‐mbafuni, ghati ya lutiriwo lwakwe mbai ya efodi ndeni.

²⁷ Uneareha na pete mbiri ja thahabu, unejiwika mbai mbiri ja efodi si mbai ya some, kuiwiria machungo makwe wanga ya ngana ya machumo ya efodi.

²⁸ Wenechunga cha‐mbafuni hena pete jakwe hena pete ja efodi hena luzighe lwa ngoningoni, nesa kioke wanga ya ngana ya machumo ya efodi, na cha‐mbafuni kising’olwe ghati ya efodi.

²⁹ Naye Harun enetika mazina ma waana wa Israeli ghati ya cha‐mbafuni cha wuchili wanga ya ngoro yakwe, ekiingia heshenete, hena lukumbusho msongorana wa Mzuri misi yose.

³⁰ Nawe unewika ghati ya cha‐mbafuni cha wuchili Urim na Thumim; jineoka wanga ya ngoro yakwe Harun, ekiingia msongorana wa Mzuri: naye Haru enetika wuchili wa waana wa Israeli wanga ya ngoro yakwe msongorana wa Mzuri misi yose.

³¹ Uneareha nguo ya efodi yose ya ngoningoni.

³² Heneoka iworo wanga yakwe, ghati ghati yakwe, luneoka na lutiriwo lwa ndima yakuiwita kujunguluka iworo, sa lwa madini, isibajike.

³³ Na hena lutiriwo lwakwe lwa si uneareha makamamanga ma ngoningoni, na ngundu na irotome kujunguluka lutiriwo; na njuga ya thahabu ghati yawo kujunguluka.

³⁴ Njugha ya thahabu na kamamanga, njugha ya thahabu na kamamanga, hena lutiriwo lwa si kujunguluka.

³⁵ Nayo ineoka wanga yakwe Harun hena kuhira kwakwe: na ngori yakwe inesikiwa ekiingia na heshenete msongorana wa Mzuri, na ekifuma, asifwe.

³⁶ Na uneareha kabamba ka thahabu izerre, unesongoa wanga yakwe, sa kusongoa kwa muhuri, USHENETO HENA MZURI.

³⁷ Na unekawikia luzighe lwa ngoningoni, kaoke wanga ya kilemba; msongorana wa kilemba kaneoka.

³⁸ Kaneoka wanga ya lusinga lwakwe Harun, nesa Harun atike owiwi wa vindu vishenete waana wa Israeli wenevishenetija ghati ya mang’olwa mawo meshenete mose, na kaneoka misi yose wanga ya lusinga lwakwe, nesa vikundike msongorana wa Mzuri.

³⁹ Na uneliaghosia ikoti la nguo ya kitani, na uneareha kilemba cha nguo ya kitani, na uneareha ngana ya ndima ya sindano.

⁴⁰ Na unewaarehia waana wa Harun ma koti, na unewaarehia ngana, unewaarehia kofia, hena kirumi na hena uwedi.

⁴¹ Na unemdoka Harun mundwawo najo, na waana wakwe kimwe naye; na unewageria mafuta, unewashenitija, unewazerrija, wanihirie ndima ya ukohani.

⁴² Unewaarehia na serwali ja nguo ya kitani, kuwafinikira utuhu; kufuma kikudi mtano vigha jinefika:

⁴³ Najo jineoka wanga ya Harun, na wanga ya waana wakwe, wekiingia na hema ya mawunganyiko, kana wekisongeria kisiko wahire na handu heshenete; wasitike owiwi, na wasifwe: itanawo tendarasi hena ye na waana wakwe nyuma yakwe.