Kufuma 25 - Sumu Yedi ya Isa Masiya 1906 Kitamo 1897 Malumbo 1905

¹ Mzuri akamburra Musa, ekiteta,

² Wawurra waana wa Israeli waniuhie itasi: sandu mundu ose ekundie ngoroni hakwe muuhe itasi langu.

³ Ilo nilo itasi munewauhia; thahabu, na fetha, na sango.

⁴ Na ngoningoni, na ya ngundu, na ya irotome, na kitani, na nyui ya mbuji.

⁵ Na mikota ya ng’onji mingundu, na mikota ya tahashi, na mti wa mshitta,

⁶ Mafuta ya taa, na mbungo hena marhamu, na mbungo ya kufukija.

⁷ Mabwe ma shoham, na mabwe ma kugera hena efodi, na cha mbafuni.

⁸ Waniarehie heshenete; niikae ghati yawo.

⁹ Hena vyose nikuwonja, fwana ya masikani, na fwano ya viya vyakwe vyose, nihuwo uneareha.

¹⁰ Na waarehe sanduku la mti mshitta: mikono miri na ihindi wueza wakwe, na mikono na ihindi kuarama kwakwe, na mikono na ihindi kuikaasi kwakwe.

¹¹ Unelifinikira na thahabu izerre, ndeni na some unelifinikira, uneareha wanga yakwe lutiriwo lwa thahabu mbai jose.

¹² Uneliarehia napete manne ma thahabu, unemawika wanga ya maghuu makwe manne; na mapete meri mbai yakwe mwe, na mapete meri mbai yakwe ya keri.

¹³ Uneareha mitikio miri ya mti wa mshitta, uneifinikira na thahabu.

¹⁴ Nayo mitikio uneiingija ghati ya mapete meoho mbai ya sanduku, sanduku litikwe henayo.

¹⁵ Ghati ya mapete ma sanduku ineoka mitikio isiwushijwe uko.

¹⁶ Unewika ghati ya sanduku luwondjo ninekuinga.

¹⁷ Uneareha na kiikaiyo cha lusario hena thahabu izerre: mikono miri na ihindi wueza wakwe, na mkono na ihindi kuarama kwakwe.

¹⁸ Uneareha makerubi meri ma thahabu, hena ishaniwe unemaareha, hena mito miri ya kichumbi kiikaiyo cha lusario.

¹⁹ Unearaha kerubi imwe ghati ya mwidiwiko uko, na kerubi la keri ghati ya mwidiwiko uko: hena kiikaiyo areha makerubi hena mito miri yakwe.

²⁰ Meneoka makerubi mekironga mazau wanga, mekifinikira kiikaiyo na mazau mawo na mawusho mawo mekiyoana; hena kiikaiyo cha lusario meneoka mawusho ma makerubi.

²¹ Unewika kiikaiyo cha lusario sandukuni wanga: na ghati ya sanduku unewika luwondjo ninekuinga.

²² Ninewonana nawe uko, nineteta nawe kufuma wanga ya kiikaiyo cha lusario, ghati ya makerubi meri meoho wanga ya sanduku ya luwondjo, vyose ninekuaghanya hena waana wa Israeli.

²³ Uneareha meza ya mti wa mshitta, mikono miri wueza wakwe, na mkono kuarama kwakwe, na mkono na kihindi kuikaasi kwakwe.

²⁴ Uneifinikira hena thahabu izerre, uneiarehia lutiriwo lwa thahabu mbai jose.

²⁵ Uneiarehia ikindo la vichaa vinne kujunguluka, na uneareha lutiriwo lwa thahabu hena ikindo lijunguluke.

²⁶ Uneiarehia mepete manne ma thahabu, unemawika mapete hena nganda nne jioho ghati ya maghuu makwe manne.

²⁷ Hena mkindo meneoka mapete handu henye mitikio ya kutikia meza.

²⁸ Uneareha mitikio ya mti wa mshitta, unifinikira hena thahabu, nesa meza itikwe nawo.

²⁹ Uneareha na mianje yakwe, na nyiko jakwe, na mabakuli makwe, na ndemwa jakwe, ja kumiminia thahabu izerre uneji areha.

³⁰ Uneng’ola wanga ya meza mabumunda ma luwonyanyo msongorana wangu misi yose.

³¹ Uneareha kinara cha thahabu izerre cha ishaniwe kinearehika kinara kikolo kyakwe, na mbagha jakwe, na mabakuli makwe, na kura jakwe, na viwaro vyakwe, ni huwo vineoka

³² Na mbagha ndandatu unefuma misawajoni hakwe mbagha ndatu ja kinara mbai yakwe mwe na mbagha ndatu ja kinara mbai yakwe ya keri

³³ Mabakuli matatu sa viwaro vya lozi, hena mbagha mwe, na kura na kiwaro na mabakuli matatu sa viwaro vya lozi hena mbagha ya keri, na kura na kiwaro: huwo ghati ya mbagha ndandatu jifumie na kinara.

³⁴ Na ghati ya kinara meneoka mabakuli manne sa viwaro vya lozi, kura jawo na viwaro vyawo

³⁵ Na kura si ya mbagha mbiri ghati ya kila, na kuri si ya mbagha mbiri ghati ya kila, hena mbagha ndandatu jila jafuma ghati ya kinara.

³⁶ Kura jawo na mbagha jawo jose kimwe: yose ndima ishaniwe ya thahabu izerre.

³⁷ Unekiareha taa jakwe fungate: weneasha taa jakwe, jiangaje msongorana wakwe.

³⁸ Na muhado wakwe, na vimwanje vyake thahabu izerre.

³⁹ Hena talanto ya thahabu izerre unekiareha, na viya ivi vyakwe vyose.

⁴⁰ Ureyoa, uarehe hena fwana yakwe, uwonyijwe ghati ya nduwi.