Hena Waroma 9 - Sumu Yedi ya Isa Masiya 1906 Kitamo 1897 Malumbo 1905

¹ Nighamba kididi ghati ye Kristo, sichwa maongo mi, lusaro lwangu lukiwonja mburi ghati ya Ngoma Mshenete,

² ti nina wukiwa wubaha na luwawo lusiiting’o ngoroni hangu.

³ Amu nikikunda ti mi mwenye niokie anathema hena Kristo hena lwa wandwetu, iwee langu hena muri:

⁴ ewo Waisraeli: ewo hawo kuoshiwa waana, na kirumi, na maaghanyo, na kuingwa sheria, na luhirio lwa Izuwa, na matemiano:

⁵ ewo wawo waapa, na kufuma hawo Kristo eoho hena mburi ya muri, eye wanga ya vyose, Izuwa mtasiwa ndarasi.

⁶ Esai. Kake si sa kiteto kya Izuwa kyateka. Amu siwo wose waoka Waisraeli, ewo wa kufuma hakwe Israeli:

⁷ nete, amu waoka mkuju wa Ibrahimu, wose ni waana; kake, Ghati ya Isaak mkuju wako uneitangwa.

⁸ Nikyo, si waana wa muri niwo waana wa Izuwa, kake waana wa lutemiano wetarwa hena mkuju.

⁹ Amu iki nikyo kiteto kya lutemiano, Hena kiimo iki nineza, na Sarah eneoka na mwana wa kiume.

¹⁰ Na si huwo tiki: kake Rebekah pia ekiemea hena mwe, hene apa wetu Isaak

¹¹ — Amu waana wekioka wesimewonwa, nete wesimeketa kindu akeye kyedi kana kiwiwi, nesa kulula kwakwe Izuwa hena lusaghuro kuwone kuikaa, si hena mihiro, nde hena ula aitanga,

¹² mche ewurriwe, Mbaha enemtumikia mdongo.

¹³ Sandu itamiwe, Yakobo nemkundie, kake Esau nimshishirwe.

¹⁴ Tughambe kinira? Hena wusiwungalo hakwe Izuwa? Kiwawe.

¹⁵ Amu amburra Musa, Ninemsaria ula nimsaria, na ninemketia lunini ula nimketia lunini.

¹⁶ Huwo si kya ula ekundie, nete kya ula edindika, nde kya Izuwa esaria.

¹⁷ Amu itamo limburra Farao, Hena kulula ukuuku nikuwushije, niwonyanye zinya yangu hako, na izina langu liwone kutindwa raa masangeni hose.

¹⁸ Huwora emsaria ula ekunda, na ula ekunda emgumija.

¹⁹ Uneniwurrara, Nini alandu embohia? amu niani ebighana na kila ekikundie?

²⁰ Hai kake, mundu we, uani we umtalue Izuwa? Kindu kiarehwe kinemburra ula ekiarehie, Nini uniarehe huwu?

²¹ Kana muwumbi tenaye luidimo wanga ya iwumba, hena iloilo kuareha ifungu imwe lioke kiya hena nganyi, na kingi kioke esikya nganyi?

²² Nikini ije Izuwa, ekikunda kuwonyanya oro yakwe, na kuosha zinya yakwe kutisiwika, hena lugumirio lwingi etikana na viya vya oro vyeinarwe na lutesho:

²³ na awone kutisiwija wandu lumazo lwa kirumi kyakwe wanga ya viya vya lusario, evyo eviarehie kuwoka hena kirumi,

²⁴ nivyo uswi, etuitange pia, si kufuma Wayahudi tiki, nde na kufuma Mambare pia?

²⁵ Sandu eteta pia hena Hosea, Ninewaitanga wala wandu wangu, ewo wesiokie wandu wangu; na ula mche ekundike, eye esiokie ekundike.

²⁶ Na kineoka, ti handu hala wewurriwa, unywi si wandu wangu, niho weneitangwa waana wa Izuwa eoho na moo.

²⁷ Na Isaya ewalozia Israeli, Ije kutara kwa waana ua Israeli kuoka sa mzangazi wa bahari, ishighajiko nilo linekijwa:

²⁸ amu Mzuri enekiareha kiteto kyakwe wanga ya isanga, ekikiidiwa na ekikichwa kifuhi.

²⁹ Na, sandu Isaya etetie kuwoka, Esikila Mzuri wa Sabaoth etushighie mkuju, twekioka sa Sodoma, na tukifwanana na Gomorra.

³⁰ Tughambe kinira? Ti Mambare, wesiratere ngalo, weifikie ngalo, mtano ngalo eyo ya luitikijo:

³¹ kake Israeli, wekiratera sheria ya ngalo, teweifikia sheria ila.

³² Hena lwa kini? Amu teweienda hena luitikijo, nde sa hena mihiro. Wekubighie msadara hena ibwe la msadara;

³³ Sandu itamiwe, Yoa, nawika hena Sayuni ibwe la msadara, na ibwe ibaha la mateshanyo: naye emwitikija tekagerwe nguruna.