Hena Waroma 8 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo tehena ingeriaha wuchili‐wa‐kugwa hena wala weoho ghati ya Kristo Yesu.

² Amu sheria ya Ngoma ya moo ghati ya Kristo Yesu yaniosha esimzoro hena sheria ya ng’oki na ya kifwa.

³ Amu kila sheria isiidime kukiareha, amu ya kuoka nana hena muri, Izuwa, ekiingija Mwana wakwe mwenye hena fwana ya muri wa ng’oki, na sa itasi hena ng’oki, aichilia ng’oki ghati ya muri.

⁴ Nesa itanawo la sheria lifishwe ghati yetu, tusisele hena muri, nde hena ngoma.

⁵ Amu wo weoho hena muri wekusara vindu vya muri: kake wo weoho hena ngoma vindu vya ngoma.

⁶ Amu lusaro lwa muri ni kifwa: kake lusaro lwa ngoma ni moo na luworo.

⁷ Amu lusaro lwa muri ni wuzo wanga ya Izuwa: amu toluitoriwa na sheria ya Izuwa, nete kididi toluidima kuitoriwa.

⁸ Na wala weoho ghati ya muri teweidima kumwiseja Izuwa.

⁹ Kake unywi tomuoho ghati ya muri, nde ghati ya ngoma, ije Ngoma ya Izuwa yatua ndeni henyu. Kake ije mundu akeye tenaye Ngoma ya Kristo, ye si wakwe.

¹⁰ Na ije Kristo eoho ndeni henyu, muri ufwie amu ya ng’oki, kake ngoma ni moo amu ya ngalo.

¹¹ Kake ije Ngoma yakwe ula emrushije Yesu kufuma wefwie yatua ndeni henyu, ula emrushije Kristo Yesu kufuma wefwie eneinga moo pia miri yenyu ya kufwa hena Ngoma yakwe yatua ndeni henyu.

¹² Huwora, wandwetu, uswi tu wasile, si hena muri tuikae hena mikayie ya muri:

¹³ amu ije muikaa hena mikaykie ya muri, tomuna huwo kufwa; kaka ije hena ngoma mwaifwija mihiro ya muri, munekia.

¹⁴ Amu wose werongojwa na Ngoma ya Izuwa, awa niwo waana wa Izuwa:

¹⁵ Amu tomuuhie ngoma ya wuzorowa hena fole, nde muuhie ngoma ya kuoshwa waana, henayo tuiya, Abba, Apa.

¹⁶ Ngoma mwenye eng’ola mburi hamwe na ngoma jetu, ti uswi tu waana wa Izuwa:

¹⁷ na ije waana, nawa wahoji; wahoji wa Izuwa, na wahoji hamwe na Kristo; ije yaoka ti twawawiwa hamwe naye, nesa turumishwe pia hamwe naye.

¹⁸ Amu naghamba ti maluwawo ma magheri ama temeinarwa kuringanywa na kirumi kila tunekijughuiwa.

¹⁹ Amu lunyarki lwa kuyoia kwa kilungiwe lwainda lujughuo lwa waana wa Izuwa.

²⁰ Amu kilungiwe kigeriwe si ya luhaya, si hena kukunda kwakyo kijenye, nde hena lwa ula ekigerie si,

²¹ ghati ya luing’idaki ti kilungiwe kijenye kinekijwa pia kufuma wuzoro wa kunyamarika mtano kuingia na esiwuzoro wa kirumi kya waana wa Izuwa.

²² Amu twatisiwa ti kilungiwe kyose kidiha na kiwawiwa hamwe mtano iki.

²³ Na si huwo tiki, nde na uswi wenye pia, tuna lumbulo la Ngoma, mtano uswi wenye tudiha ngoroni hetu, tukiinda kuoshwa waana, lukombolo lwa muri wetu.

²⁴ Amu hena luing’idaki tukijijwe: kake luing’idaki lula luyoyiwe si luing’idaki: amu niani eing’idaki kila ekiyoie?

²⁵ Kake ije tuing’idaki kila tusikiyoie, niho tukiinda na lugumirio.

²⁶ Na huwo Ngoma pia eughenja wunana wetu: amu totutisiwa kuomba sandu ituwe; kake Ngoma mwenye etusembia na madiho mesiidima kutetwa; na ula ejiyoa ngoro etisiwa nikini lusaro lwa Ngoma,

²⁷ amu ewasembia weshenete hena kukunda kwakwe Izuwa.

²⁸ Na twatisiwa ti hena wala wemkundie Izuwa vyose vyahira hamwe hena vyedi, hawo weitangwa hena kulula kwakwe.

²⁹ Amu wala ewatisiwa kuwoka, awa ewaarehia pia kuoka wafwananijwe na mwa ya Mwana wakwe, nesa aoke mbele ghati ya wandu weingi na wandwawo:

³⁰ na wala ewaarehie kuwoka, na awa pia ewaitange: na wala ewaitange, awa pia ewaarehie ngalo: na wala ewaarehie ngalo, awa pia ewarumishe.

³¹ Nikinira tutete hena vindu ivi? Ije Izuwa ni wa hetu, niani wanga yetu?

³² Ula esimshighie Mwana wakwe mwenye, nde emng’olie hena lwetu wose, nize asituinge pia vyose hamwe naye wesho?

³³ Niani enewalinganya wasaghurwa wa Izuwa? Ni Izuwa earehia ngalo;

³⁴ niani eye enechilia kugwa? Ni Kristo Yesu efwie, ee keba, erushijwe kufuma wefwie, eye eoho ha mkono wa kuume wa Izuwa, eye pia etusembia.

³⁵ Niani enetutanya hena lukundo lwa Kristo? wasi, kana luwawo, kana ikinyo, kana nzaa, kana wutuhu, hana ndenga, kana muhandi?

³⁶ Sandu itamiwe, hena lwako twakomwa hemusi puti; tutariwe sa maghonji hena kusinzwa.

³⁷ Hai, ghati ya vindu ivi vyose tukelie warelela hena ye etukundie.

³⁸ Amu niilejike, ti nete kifwa, nete moo, nete malaika, nete mabohio, nete vindu vya ingeriaha,

³⁹ nete vindu vya akenya, nete mawuzinya, nete wueza, nete kuforeka, nete kilungiwe kingi akeye, kineidima kututanya hena lukundo lwa Izuwa, elo luoho ghati ya Kristo Yesu Mzuri yetu.