Hena Waroma 7 - Sumu Yedi ya Isa Masiya 1906 Kitamo 1897 Malumbo 1905

¹ Kana tomutisiwa, wandwetu, (amu nateta na wandu wetisiwa sheria), nize sheria yaitoria mundu magheri mose eoho na moo?

² Amu mche ula ena mume echungiwe hena sheria ha mume magheri eoho na moo; kake ije mume afwa, echunguka hena sheria ya mume ula.

³ Huwora ije, magheri mume eoho na moo, mche egurana na mume ungi, eneitangwa mshindi: kake ije mume afwa, ye echunguka hena sheria, na huwo teokaye mshindi, naikioka agurana na mume ungi.

⁴ Hena lwa iyo, wandwetu, unywi pia mweoshiwe wefwie hena sheria hena muri wa Kristo; nesa mugurane na ungi, eye erushiwe kufuma wefwie, tuwone kugera ndunda ha Izuwa.

⁵ Amu tukinaoke murini, malangwa ma ng’oki, emo meokie hena sheria, mehirie ghati ya marungo metu kugera ndunda hena kifwa.

⁶ Kake ingeriaha twachunguka hena sheria, tukioka twaifwia ila tweguriiweho; mtano twahira ghati ya wusha wa ngoma, na si ghati ya itamo la kae.

⁷ Tutete kinira? Sheria ni ng’oki? Kiwawe. Kake sitisiwemi ng’oki, esire hena sheria: amu sikutisiwa kulangwa, esire sheria ila ighambie, Usilangwe:

⁸ kake ng’oki, ikiwona mwanya, yaareha ndeni hangu hena aghanyo mbare yose ya kulangwa: amu hesina sheria ng’oki yafwa.

⁹ Na neokie na moo hesina sheria kandu kamwe, kake magheri aghanyo lizie, ng’oki ikaburukana, mi nikafwa.

¹⁰ Na aghanyo, leokie hena moo, ili niliwonie kuoka hena kifwa:

¹¹ amu ng’oki, ikiwona mwanya, hena aghanyo ikanikenga, na henayo ikanikoma.

¹² Huwo sheria ishenete, na aghanyo lishenete, na la ngalo, na ledi.

¹³ Kilara ekyo kyedi kyaoka hangu kifwa? Kiwawe. Kake ng’oki, nesa iwonjwe kuoka ng’oki, hena kuniarehia kifwa hena kila ekyo kyedi; — ng’oki hena aghanyo iwone kuoka ina ng’oki muno.

¹⁴ Amu twatisiwa ti sheria ni ya ngoro: kake mi ni wa muri, nataghwa si ya ng’oki.

¹⁵ Amu kila nikiareha sikitisiwemi: amu si kila nikikundie, nikyo nikiketa: kake kila nikisuie, nikyo nikiareha.

¹⁶ Kake ije kila nisikikunda, nikyo nikiareha, naighamba sheria, ti ni yedi.

¹⁷ Huwo ingeriaha si miwa nikiareha, nde ng’oki itue ghati yangu,

¹⁸ Amu natisiwa ti ghati yangu, nikyo, ghati ya muri wangu, tekitua kindu kyedi: amu kukunda kuoho hangu, kake kuareha kila ekyo kyedi ni hae.

¹⁹ Amu kila kyedi nikikundie sikiarehami; kake kila kiwiwi nisikikundie, kila nakiketa.

²⁰ Kake ije kila nisikikundie, nikyo nikiareha, si miwa nikiareha, nde ng’oki eyo itue ghati yangu.

²¹ Nawonara sheria, ti, hangu nikundie kuareha vyedi, viwiwi vioho.

²² Amu naisejwa ghati ya sheria ya Izuwa hena mundu wa ndeni:

²³ kake nawona sheria ilelana ghati ya marungo mangu, ikibighana na sheria ya lusaro lwangu, na ikiniete hena wuzoro si ya sheria ya ng’oki ioho ghati ya marungo mangu.

²⁴ Oi mundu wa wasi mi! niani enenikija kufuma muri uu wa kifwa?

²⁵ Namwanjela Izuwa hena Yesu Kristo Mzuri wetu. Huwora mi mwenye hena lusaro naitumikia sheria ya Izuwa, kake hena muri sheria ya ng’oki.