Hena Waroma 6 - Sumu Yedi ya Isa Masiya 1906 Kitamo 1897 Malumbo 1905

¹ Tughambezera? tuikae ghati ya ng’oki, nesa mvono iwone kuizua?

² kiwawe. Uswi tuifwie ng’oki, nize tuneikaawa ndeni yayo?

³ Kana tomutisiwa ti uswi wose tubatizwe ghati ya Kristo Yesu tubatizwe ghati ya kifwa kyakwe?

⁴ Hena lwa iyo tujikiwe kimwe naye hena lubatizo mtano kifwa: nesa sandu Kristo erushijwe kufuma wefwie hena kirumi kya Apa, huwo na uswi pia tusele hena wusha wa moo.

⁵ Amu ije uswi twaoka tulungana naye hena fwana ya kifwa kyakwe, tuneoka pia hena fwana ya kuruka kwakwe:

⁶ tukitisiwa iki, ti mundu wetu wa kae uwanikwe hamwe naye, nesa muri wa ng’oki uwone kuteka, tusiikaewa hena wuzoro wa ng’oki;

⁷ amu ula efwie earehiwa ngalo hena ng’oki.

^8-9 Amu ije tufwie kimwe na Kristo, twaitikija ti tunekia pia kimwe naye; tukitisiwa ti Kristo ekirushwa kufuma wefwie tefwawa; kifwa tekina zinyawa wanga yakwe.

¹⁰ Amu kifwa kila ekifwie eifwie ng’oki kandu kamwe: kake moo eoho nagho, hena Izuwa.

¹¹ Huwo na unywi pia mukutare kuoka wefwie hena ng’oki, nde weoho na moo hena Izuwa ghati ya Kristo Yesu.

¹² Hena lwa iyo ng’oki isiitore ghati ya muri wenyu, mumainge isikio malangwa mayo:

¹³ nete musimawike marungo menyu nareta ja wusiwungalo: kake mukuwike hena Izuwa sa muoho na moo kufuma wefwie, na marungo menyu sa nareta ja ngalo hena Izuwa.

¹⁴ Amu ng’oki teineoka na zinya wanga yenyu: amu tomuoho si ya sheria, nde si ya mvono.

¹⁵ Nikinira? tukete ng’oki, amu totuoho si ya sheria, nde si ya mvono? kiwawe.

¹⁶ Tomutisiwa, ti hena ula mwakuwika wenye sa wazoro hena kumwinga isikio, mu wazoro wakwe ula mwaminga isikio: ije wa ng’oki hena kifwa, kana wa kuinga‐isikio hena ngalo?

¹⁷ Kake Izuwa aanjelwe, ti, ikioka mweokie wazoro wa ng’oki, muoshijwe wa kuinga‐isikio na ngoro hena ila fwana ya ilosho muingiwe:

¹⁸ na muking’olwa ghati ya wuzoro wa ng’oki, mukaoshwa wazoro wa ngalo.

¹⁹ Nateta hena mikayie ya wandu amu ya wunana wa muri wenyu: amu sandu muwikie marungo menyu wazoro wa ikwe na wa owiwi mtano owiwi, huwo ingeriaha mawikeni marungo menyu wazoro wa ngalo hena wushenetijo.

²⁰ Amu mukinaoke wazoro wa ng’oki, mweokie esiwazoro hena ngalo.

²¹ Ni ndunda ani mwehetera magheri mala ghati ya vindu vila henavyo ingeriaha muna nguruna? amu kuidiwika kwa vindu ivi ni kifwa.

²² Kake ingeriaha mukiidiwa kuoshwa esiwazoro hena ng’oki, na kuoka wazoro hena Izuwa, muna ndunda yenyu hena wushenetijo, na kuidiwika moo wa ndarasi.

²³ Amu wuesi wa ng’oki ni kifwa, kake kiingijo‐kya‐wesho kya Izuwa ni moo wa ndarasi ghati ya Kristo Yesu Mzuri wetu.