Hena Waroma 5 - Sumu Yedi ya Isa Masiya 1906 Kitamo 1897 Malumbo 1905

¹ Hena lwa iyo tukiarehiwa ngalo hena luitikijo, tuoke na luworo na Izuwa hena Mzuri wetu Yesu Kristo:

² hena ye pia twawona kuingia hena luitikijo ghati ya mvono uu henagho twaimuka; na tuizihirwe ghati ya luing’idaki lwa kirumi kya Izuwa.

³ Na si huwo tiki, kake tuizihirwe pia ghati ya mawasi metu: tukitisiwa ti wasi wuareha lugumirio;

⁴ na lugumirio, lukundikio; na lukundiko, luing’idaki;

⁵ na luing’idaki tolugera nguruna; amu lukundo lwa Izuwa lwakufutiwa raa ghati ya ngoro jetu hena Ngoma Mshenete eyo tuingiwe.

⁶ Amu tukinaoke wanana, hena magheri ma kuwe Kristo ewafwie wasui‐Izuwa.

⁷ Amu kidindie hena mundu wa ngalo ungi afwe: kake ngea hena mundu wedi ungi enekara mtano kufwa.

⁸ Kake Izuwa etutogolie lukundo lwakwe, ti, magheri twereokie wang’oki, Kristo etufwie.

⁹ Kukelara muno, tukioka ingeriaha tuarehiwa ngalo hena sakame yakwe, tunekijwa ghati ya oro ya Izuwa hena ye.

¹⁰ Amu ije, magheri tuokie maring’a, tukundanywe na Izuwa hena kifwa kya Mwana wakwe, kukela muno, tukiidiwa kukundanywa, tunekijwa hena moo wakwe;

¹¹ Na si huwo tiki, kake twaizihirwa ghati ya Izuwa hena Mzuri wetu Yesu Kristo, hena ye twauhia ingeriaha lundanyo.

¹² Hena lwa iyo sandu hena mundu mwe ng’oki iingie masangeni, na kifwa hena ng’oki: na huwo kifwa kikavetia hena wandu wose, amu wose weketie ng’oki:—

¹³ amu mtano sheria ng’oki iokie masangeni: kake ng’oki teitarwayo magheri tehenaho sheria.

¹⁴ Kake kifwa kyeitore kufuma Adamu mtano Musa mtano wanga ya wala wesiketie ng’oki hena fwana ya kutekwa kwakwe Adamu, eye mwa yakwe ula eneza.

¹⁵ Kake si sa kutekwa, huwo pia kiingijo‐kya‐wesho. Amu ije hena kutekwa kwa ula mwe weingi wefwie, kukela muno mvono wa Izuwa, na kiingijo hena mvono wa mundu mwe, Yesu Kristo, uizue hena weingi:

¹⁶ Na si hena mwe eketie ng’oki, ni huwa kiingijo: amu wuchili wuzie kufuma mwe hena kuchiliwa kwa kugwa, kake kiingijo‐kya‐wesho kizie kufuma matekwa meingi hena kuarehiwa ngalo.

¹⁷ Amu ije, hena kutekwa kwa mwe, kifwa kyeitore hena mwe, kukela muno wala weuhia kuizua kwa mvono na kwa kiingijo kya ngalo weneitoria ghati ya moo hena ula mwe, ye Yesu Kristo.

¹⁸ Huwora sandu hena kutekwa kumwe wuchili wa kugwa uwazie wose: ni huwo hena mhiro mwe wa ngalo kuarehiwa ngalo kwa moo kuwazie wandu wose.

¹⁹ Amu sandu hena kugolong’a kwa mundu ula mwe weingi weoshiwe wenye ng’oki, huwo hena kuinga isikio kwa ula mwe weingi wenearehiwa ngalo.

²⁰ Na sheria iongejwe, nesa itekwa liwone kuizua; kake handu ng’oki yeizue, mvono unetie muno kuizua:

²¹ nesa, sandu ng’oki yeitore hena ngalo hena moo wa ndarasi hena Yesu Kristo Mzuri wetu.