Hena Waroma 4 - Sumu Yedi ya Isa Masiya 1906 Kitamo 1897 Malumbo 1905

¹ Tughambe kinira ti Ibrahimu, mku wetu hena muri, eiwonie?

² Amu ije Ibrahimu earehiwe ngalo hena mihiro, ena kya kukurumishia; nde si msongorana wa Izuwa.

³ Amu lighambaze itamo? Ibrahimu emwitikije Izuwa, kikatarwa hakwe hena ngalo.

⁴ Na hakwe ula ehira, wuesi toutarwa hena mvono, nde hena sile.

⁵ Kake hakwe ula esihira, nde emwitikija ula ewaarehia ngalo wasui‐Izuwa, luitikijo lwakwe lwatarwa hena ngalo.

⁶ Sandu na Daudi pia eghamba lutasio wanga ya mundu, hakwe Izuwa etara ngalo hesina mihiro,

⁷ ekiteta, Wetasiwa niwo ewe matekwa mawo meshighiwa, na ng’oki jawo jifinikirwa.

⁸ Mtasiwa mundu ula, hakwe Mzuri tetaraye ng’oki.

⁹ Lutasio ulu lughambwa wanga ya kutawanwa, kana wanga ya kusatawanwa pia? Amu twateta, Hakwe Ibrahimu luitikijo lwakwe lutariwe hena ngalo.

¹⁰ Nizera lutariwe? magheri eoho na kutawanwa, kana kusatawanwa? Si ghati ya kutawanwa, nde ghati ya kusatawanwa:

¹¹ akauhia luwano lwa kutawanwa, muhuri ya ngalo ya luitikijo eluhete magheri esimetawanwa: nesa aoke wawee wawo wose weitikija, mtano wekioka tewetawanwa, ngalo iwone kutarwa hawo;

¹² na wawee wa kutawanwa hawo wala ewo si wa kutawanwa tiki, nde na wesela pia hena mawato ma luitikijo lula lwa apa wetu Ibrahimu, eluhete ekioka esimetawanwa.

¹³ Amu lutemiano, ti eneoka mhoji wa masanga, toluokie hena Ibrahimu, nete hena mkuju wakwe, hena sheria nde hena ngalo ya luitikijo.

¹⁴ Amu ije wo weoho wa sheria ni wahoji, luitikijo luneoshwa luhaya, na lutemiano luneoshwa lusina zinya:

¹⁵ amu sheria ihira oro, kake handu hesina sheria, nete tehena itekwa.

¹⁶ Hena kindu iki nilo lwa luitikijo, luwone kuoka hena mvono; nesa lutemiano luwone kuoka dawu hena mkuju ose; si hena ula tiki egho wa sheria, nde hena ula pia egho wa luitikijo lwa Ibrahimu, eye apa wetu wose,

¹⁷ (Sandu itamiwe, Nakuosha apa wa mbare nyingi), msongorana wakwe ula emwitikije, eye Izuwa, ewainga moo wefwie, na eviitanga vindu vila visioho sandu vioho.

¹⁸ Uo wanga ya luing’idaki eitikije hena luing’idaki, nesa aoke apa wa mbare nyingi, hena kila kitetiwe, Huwo mkuju wako uneoka.

¹⁹ Na asioshwa mnana hena luitikijo, eugheshijie muri wakwe mwenye sa ichi ufwie, (ekioka wa miaka sa ighana), nete kufwa kwa ndeni yakwe Sarah:

²⁰ ee, ekiluyoa lutemiano lwa Izuwa, terighiwaye hena kusaitikija, nde akaoka eduwie hena luitikijo, ekimrumisha Izuwa,

²¹ na ekitisiwijwa dawu ti, kila ekitemiane, eidime pia kufisha.

²² Na hena lwa iyo lukatarika hakwe hena ngalo.

²³ Na teitamiwe hena lwakwe mwenye tiki, ti lutarike hakwe;

²⁴ nde hena lwetu uswi pia, na hetu lunetarika, ije tumwitikija ula emrushije Yesu Mzuri wetu kufuma wefwie,

²⁵ eye eng’oliwe hena mateshanyo metu, akarushwa hena kuarehiwa ngalo uswi.