Hena Waroma 3 - Sumu Yedi ya Isa Masiya 1906 Kitamo 1897 Malumbo 1905

¹ Luneto anira ena Myahudi? kana mbucha ani ioho ghati ya kutawana?

² Nyingi hena nzia yose: kuwoka kwa vyose, ti hawo yawikiwe mitinda ya Izuwa.

³ Amu nize ije mondo wesiitikije? kusaitikija kwawo kuneareha luitikijo lwa Izuwa lusioke na zinya?

⁴ Kiwawe: ee, Izuwa aoke wa kididi, nde mundu ose wa maongo; sandu itamiwe, Nesa uarehiwe ngalo ghati ya viteto vyako, na ulele magheri uingie na wuchili.

⁵ Kake ije wusiwungalo wetu wuietie luisiso ngalo ya Izuwa, tuneghambaze? Izuwa tenaye ngalo ekiza na oro? (nateta hena mikayie ya wandu).

⁶ Kiwawe: amu nizera Izuwa enemachilia masanga?

⁷ Kake ije hena maongo mangu kididi ya Izuwa iizue hena kirumi kyakwe, nini na mi pia ingeriaha nachiliwa sa mung’oki?

⁸ Na nini isioke (sandu twatetwa hena kuchunganja, na sandu mondo weghamba ti twaghamba), tukete viwiwi, nesa vyedi vize? wuchili‐wa‐kugwa wawo ni wa singisi.

⁹ Nikinira? uswi tuikee na viwiwi kukela wo? hai, nete kadongo: amu kuwoka tuwalinganye na Wayahudi na Wayonani, ti wose weoho si ya ng’oki;

¹⁰ sandu itamiwe, Tehena mwenye ngalo, hai, nete mwe;

¹¹ Tehena nete etwarija, tehena nete emwenda Izuwa;

¹² Wose wegharuka mbai, wose waoka wesina mbucha; tehena nete eketa vyedi, hai, nete mwe.

¹³ Mrangi wawo ni mbira mwaji; na malumi mawo weketa makengo; wusungu wa nyoka ni si ya miomo yawo:

¹⁴ Itumbu lawo laizua iseso na luwawo;

¹⁵ Maghu mawo ma usara kuitisha sakame;

¹⁶ Wuale na wasi ghati ya nzia jawo;

¹⁷ Na nzia ya luworo tewemaijewo,

¹⁸ Tehena fole ya Izuwa msongorana wa meso mawo.

¹⁹ Na twatisiwa ti vyose iteta sheria, iwatetia wala weoho si ya sheria; nesa itumbu lose lihujijwe, na masanga mose maetwe si ya wuchili wa Izuwa:

²⁰ amu hena mihiro ya sheria tehena mwenye muri enearehiwa ngalo mesoni hakwe: amu hena sheria ni lutwarijo lwa ng’oki.

²¹ Kake ingeriaha hesina sheria ngalo ya Izuwa yawikwa mwaji, ikioka yang’oliwa mburi na sheria na waroti;

²² niyo ngalo ya Izuwa ioho hena luitikijo lwa Yesu Kristo hawo wose weitikija; amu tehena kulelana:

²³ amu wose waketa ng’oki na waduhuka hena kirumi kya Izuwa;

²⁴ wekiarehiwa ngalo wesho na mvono wakwe hena lukombolo luoho ghati ya Masihi Yesu:

²⁵ eye Izuwa emng’olie kuoka lukundanyo, hena luitikijo, hena sakame yakwe, kuwonja ngalo yakwe amu ya luwushijio lwa ng’oki jivetie, ghati ya lugumirio lwa Izuwa;

²⁶ kuwonja, — naghamba, hena magheri ama, ngalo yakwe, awone mwenye kuoka na ngalo, na mwarehia ngalo ula ena luitikijo ghati ya Yesu.

²⁷ Kuohi kukuisisara? Kwakindwa. Na sheria ani? ya mihiro? hai, nde na sheria ya luitikijo.

²⁸ Hena lwa iyo tutara ti mundu ni wa ngalo esina mihiro ya sheria.

²⁹ Kana Izuwa ni wa Wayahudi tiki? si ye wa Mambare pia? Ee, wa Mambare pia:

³⁰ kwakicha Izuwa ni mwe, na enewaarehia ngalo wa kutawanwa kufuma luitikijo, na wa kusatawanwa hena luitikijo.

³¹ Twaioshara haya sheria hena luitikijo? Kiwawe: ee, twaiimusha sheria.